ព័ត៌មានជាតិ

សូមប្រុងប្រយ័ត្ន! អ្នកទៅទិញសាច់គោផ្សារចាមព្រែកប្រា ព្រោះអ្នកលក់សាច់គោស្លាប់ដោយសារជំងឺកូវីដ

បានផុស

៥ years មុន

នៅ

ថ្ងៃសុក្រ ៧ ឧសភា ២០២១

ដោយ

ភ្នំពេញ ៖ ស្ត្រីជនជាតិខ្មែរឥស្លាមម្នាក់ បានស្លាប់កាលពីព្រលប់ថ្ងៃទី៧ខែឧសភាដោយសារជំងឺកូវីដ១៩។

យោងតាមសេចក្តីរាយការណ៍ពីលោកព្រំ សុផល មេបញ្ជាការរងកងរាជអាវុធហត្ថខណ្ឌច្បារអំពៅបានឲ្យដឹងថា កាលពីវេលាម៉ោង៨យប់ថ្ងៃទី៧ខែឧសភានេះ ក្រុមគ្រូពេទ្យមន្ទីរពេទ្យបង្អែកខណ្ឌច្បារអំពៅបានចុះទៅដឹកសពស្ត្រីម្នាក់ឈ្មោះ ម៉ីត សៃម៉ាស់ អាយុ៥៣ឆ្នាំ ជនជាតិខ្មែរឥស្លាមមុខរបរលក់សាច់គោនៅផ្សារជនជាតិខ្មែរឥស្លាម(ផ្សារចាមព្រែកប្រា) និងមានទីលំនៅចំណុចផ្សារចាម ផ្លូវ៣៦៩ភូមិព្រែកតាពៅ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក មេបញ្ជាការរងបន្តថា ស្ត្រីរងគ្រោះបានស្លាប់កាលពីព្រលប់ថ្ងៃទី៧ ខែឧសភានៅក្នុងផ្ទះជនរងគ្រោះហើយនៅពេលដែលក្រុមគ្រូពេទ្យទៅពិនិត្យសំណាកឃើញថា មានផ្ទុកជំងឺកូវីដ១៩។ដូច្នេះហើយទើបគ្រូពេទ្យសម្រេចដឹកយកទៅបញ្ចុះតាមជំនាញគ្រូពេទ្យដោយពុំអនុញ្ញាតឲ្យក្រុមគ្រួសារធ្វើបុណ្យនៅលំនៅឋានឡើយ ព្រោះខ្លាចឆ្លងដល់សមាជិកក្នុងគ្រួសារ។

ដោយឡែកកូនចៅនិងសមាជិកក្នុងគ្រួសារចំនួន១០នាក់ ត្រូវបានគ្រូពេទ្យឲ្យធ្វើចត្តាឡីស័កចំនួន១៤ថ្ងៃ។

អ្វីដែលគួរឲ្យបារម្ភនោះ គឺមានប្រជាពលរដ្ឋជាច្រើនបានទៅទិញសាច់គោដោយពុំបានដឹងថា ស្ត្រីជាអ្នកលក់សាច់គោមានជំងឺកូវីដ១៩។ ហើយបើសង្ស័យសូមទៅពិនិត្យសំណាកឲ្យទាន់ពេលវេលា៕

ដោយ ៖ នរា