លោក សួន សេរីរដ្ឋា ប្រាប់មូលហេតុនៃការទទួលមរណភាពរបស់ ឯកឧត្តម ត្រាំ អ៊ីវតឹក

លោក សួន សេរីរដ្ឋា រដ្ឋលេខាធិការក្រសួងអភិវឌ្ឍន៍ជនបទបានថ្លែងប្រាប់កម្ពុជាថ្មី នៅរសៀលថ្ងៃទី០១ ខែមិថុនា មុននេះបន្តិចថា លោកទេសរដ្ឋមន្ត្រី ត្រាំ អ៊ីវតឹក អាយុ៧២ឆ្នាំ បានស្លាប់ដោយសារជំងឺរ៉ាំរ៉ៃរបស់គាត់ គាត់បានសុំច្បាប់សម្រាកព្យាបាលនៅក្រៅប្រទេសមួយរយៈហើយ ប្រហែលជាធ្ងន់ធ្ងរ ក៏បានយកមកវិញ ហើយនៅពេលមកដល់ព្រលានយន្តហោះអន្តរជាតិភ្នំពេញ នៅវេលាម៉ោង២ និង៣០នាទី ក៏បានស្លាប់ទៅ នេះបើតាមការជូនដំណឹងរបស់ខុទ្ទកាល័យរបស់គាត់។

ទាក់ទងបញ្ហានេះ លោក សួន សេរីរដ្ឋា បានសម្តែងការចូលរួមរំលែកទុក្ខដ៏ក្រៀមក្រំ ចំពោះមរណទុក្ខនេះ និងបានបញ្ជាក់ថា មរណភាពរបស់លោក ត្រាំ អ៊ីវតឹក គឺជាការបាត់បង់នូវធនធានមនុស្សដ៏សំខាន់របស់ជាតិ។ 

លោកជាចាស់ទុំ ដែលមានចរិតដឹកនាំស្លូតបូត ម៉ឺងម៉ាត់ និងសំដីសំដៅមួយៗច្បាស់ៗ ព្រមទាំងសាមញ្ញគួរជាទីគោរព និងយកគំរូរៀនសូត្រតាម។

លោក ត្រាំ អ៊ីវតឹក អតីតរដ្ឋមន្រ្តីក្រសួងសាធារណការ និងដឹកជញ្ជូន ហើយបច្ចុប្បន្នជាទេសរដ្ឋមន្ត្រី ទទួលបន្ទុកបេស​កកម្មពិសេស និងប្រធានក្រុមការងារថ្នាក់ជាតិប្រចាំស្រុកកំពង់លែង ខេត្តកំពង់ឆ្នាំង។ 

បន្ទាប់ពីរដ្ឋាភិបាលសម្រេចរុះរើគណៈរដ្ឋមន្រ្តី លោកបានផ្លាស់ប្តូរពីរដ្ឋមន្រ្តីក្រសួងសាធារណការ មកកាន់តួនាទីជារដ្ឋមន្រ្តីក្រសួងប្រៃសនីយ និងទូរគមនាគមន៍ ពីឆ្នាំ២០១៦ ដល់ឆ្នាំ២០២០៕ អត្ថបទ៖ កោះកែវ