ព័ត៌មានជាតិ

កម្ពុជានិងអាស៊ានប្តេជ្ញា រួមគ្នាទប់ស្កាត់ការប្រយុទ្ធប្រឆាំងនឹងភេរវកម្មឆ្លងដែន

បានផុស

៥ years មុន

នៅ

ថ្ងៃព្រហស្បតិ៍ ១០ មិថុនា ២០២១

ដោយ

ភ្នំពេញ ៖ កម្ពុជានិងបណ្តាប្រទេសចំនួន៩ផ្សេងទៀតបានប្តេជ្ញារួមគ្នាទប់ស្កាត់ការប្រយុទ្ធប្រឆាំងនឹងភេរវកម្មឆ្លងដែននៅក្នុងតំបន់អាស៊ាន។

ការប្តេជ្ញានេះបានធ្វើឡើងនៅថ្ងៃទី១០ ខែមិថុនា ឆ្នាំ២០២១ នៅក្នុងកិច្ចប្រជុំឧត្តមមន្ត្រីអាស៊ាន ស្ដីពីក្រុមការងារប្រឆាំងភេរវកម្ម លើកទី១៧ នៃឧក្រិដ្ឋកម្មឆ្លងដែន តាមរយៈប្រព័ន្ធវីដេអូដែលភាគីកម្ពុជាចូលរួមដោយនាយឧត្តមសេនីយ៍ កែវ វណ្ណថន អគ្គនាយករងអន្តោប្រវេសន៍ និងជាអនុប្រធានក្រុមការងារSOMTC អនុប្រធាននាយកដ្ឋាននិងតំណាងមកពីនាយកដ្ឋានពាក់ព័ន្ធដែលជាសមាជិកផងដែរ។

នៅក្នុងកិច្ចប្រជុំនេះ បណ្ដាប្រទេសអាស៊ានតម្រូវឲ្យធ្វើបទបង្ហាញស្ដីពីបច្ចុប្បន្នភាពនៃយុទ្ធសាស្ត្រជាតិ និងកិច្ចខិតខំប្រឹងប្រែងក្នុងការប្រឆាំងនឹងអំពើភេរវកម្ម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយឧត្តមសេនីយ៍ កែវ វណ្ណថន បានលើកឡើងថា បើទោះបីជាជួបឧបសគ្គដោយសារជំងឺកូវីដ១៩ កម្ពុជានៅតែមានវឌ្ឍនភាពលើក្របខណ្ឌច្បាប់ក្នុងការប្រយុទ្ធប្រឆាំងភេរវកម្ម និងបទល្មើសពាក់ព័ន្ធ ដោយច្បាប់ចំនួន២ត្រូវបានអនុម័តក្នុងឆ្នាំ២០២០ រួមមានច្បាប់ស្ដីពីការសំអាតប្រាក់ និងហិរញ្ញប្បទានភេរវកម្ម និងច្បាប់ស្តីពីការប្រឆាំងហិរញ្ញប្បទានដល់ការរីកសាយភាយអាវុធមហាប្រល័យ។

នាយឧត្តមសេនីយ៍ បានបន្តថា មន្ត្រីអនុវត្តច្បាប់ និងក្រសួង ស្ថាប័នពាក់ព័ន្ធក៏ចូលរួមក្នុងការពង្រឹងការអនុវត្តច្បាប់នេះឲ្យមានប្រសិទ្ធភាពផងដែរ។

បន្ថែមពីនេះ នាយឧត្តមសេនីយ៍ បានបញ្ជាក់ថា ចំពោះការដោះស្រាយបញ្ហាប្រឈមផ្សេងៗទៀត ក្រុមការងារពាក់ព័ន្ធត្រូវរួមគ្នាចែករំលែកមតិយោបល់ និងបទពិសោធន៍ក្នុងការឆ្លើយតបទៅនឹងបទល្មើសនានាក្នុងអំឡុងពេលនៃការរីករាលដាលនៃជំងឺកូវីដ១៩នេះ។

នាយឧត្តមសេនីយ៍ ក៏បានបន្ថែមទៀតថា «កិច្ចប្រជុំនាថ្ងៃនេះ គឺជាឧទាហរណ៍ដ៏ល្អមួយ នៃកិច្ចសហប្រតិបត្តិការដ៏រឹងមាំជាមួយភាគីពាក់ព័ន្ធនៃប្រទេសអាស៊ាន ហើយឯកឧត្តមជឿជាក់ថា ភាគីទាំងអស់ នឹងនៅតែបន្តធ្វើការរួមគ្នាយ៉ាងជិតស្និទដើម្បីញ៉ាំងឲ្យការអភិ វឌ្ឍសហគមន៍របស់យើងកាន់តែមានភាពប្រសើរឡើងថែមទៀត»។

គួរបញ្ជាក់ថា កិច្ចប្រជុំលើកទី១៧នេះគឺដឹកនាំដោយSOMTC ឥណ្ឌូណេស៊ី ក្នុងគោលបំណងពិភាក្សាលើយុទ្ធសាស្ត្រ និងកិច្ចខិតខំប្រឹងប្រែងថ្នាក់ជាតិ ក្នុងការប្រឆាំងភេរវកម្ម, ឯកសារនៃការអនុវត្តការងារ និងទិសដៅនាពេលអនាគតសម្រាប់ការងារពាក់ព័ន្ធនឹងវិស័យនេះ។

ទន្ទឹមនឹងនេះ កិច្ចប្រជុំនេះ ក៏ជាឱកាសសម្រាប់ភាគីនីមួយៗរួមគ្នាផ្ដល់យោបល់ ពិនិត្យសារឡើងវិញនូវកម្មវិធីការងាររបស់SOMTCទាក់ទងនឹងការប្រឆាំងភេរវកម្ម ដែលជាផ្នែកមួយនៃផែនការសកម្មភាពរបស់អាស៊ានក្នុងការប្រយុទ្ធប្រឆាំងនឹងភេរវកម្ម៕

ដោយ ៖ សំអឿន