មន្ត្រីធនធានទឹក និងឧតុនិយមប្រាប់ស្ថានភាពអាកាសធាតុ និងកម្ពស់ទឹកទន្លេ

ស្ថានភាពអាកាសធាតុធ្លាក់ភ្លៀង និងកម្ពស់ទឹកទន្លេនៅកម្ពុជា មិនទាន់ជាការព្រួយបារម្ភធ្ងន់ធ្ងរ​នោះ​ទេ ខណៈដែលទឹកទន្លេបន្តស្រកចុះជារៀងរាល់ថ្ងៃ។

លោក ចាន់ យុត្ថា រដ្ឋលេខាធិការ និងជាអ្នកនាំពាក្យក្រសួងធនធានទឹក និងឧតុនិយម បានប្រាប់​កម្ពុជា​ថ្មី នៅរសៀលថ្ងៃនេះថា (ថ្ងៃសុក្រ) ស្ថានភាពអាកាសធាតុនៅកម្ពុជា មានភាពប្រក្រតី​ជា​មធ្យម​ច្រើនឆ្នាំ ដែលលោកសំដៅទៅលើទឹកភ្លៀង​ដែលបាន​ធ្លាក់រ៉ាយប៉ាយ។

អ្នកនាំពាក្យរូបនេះ បន្តថា ចំពោះស្ថានភាពទឹកទន្លេ ក៏មិនទាន់មានអ្វីគួឱ្យព្រួយបារម្ភនោះដែរ ដោយ​សារ​តែទឹក​នឹងបន្តស្រក​ចុះ​បន្ថែមទៀត ខណៈដែលកម្ពស់ទឹកនៅទាបនៅឡើយពោលគឺទើបតែ​ឃើញ​ងើបឡើង​បន្តិចដោយសារ​តែព្យុះ​នាពេលកន្លងទៅ ប៉ុន្តែឥឡូវនេះ គឺចាប់ផ្ដើម​ស្រកចុះវិញ​ហើយ ដូច្នេះមិនមានអ្វីជាបញ្ហាចោទនោះទេចំពោះស្ថានភាពទឹកទន្លេ។

លោក ចាន់ យុត្ថា ឱ្យដឹងទៀតថា នៅក្នុងសប្តាហ៍នេះ ភ្លៀងនឹងបន្តធ្លាក់រ៉ាយប៉ាយដោយសារតែ កម្ពុជា​ទទួល​រងនូវឥទ្ធិ​ពល​ខ្យល់មូសុងនៅក្នុងកម្រិតបង្គួរ។ លោកថា តំបន់មួយចំនួន អាចមាន​ការ​ប្រឈម នៅក្នុងរយៈពេលខ្លី ដូចជាខេត្តព្រះសីហនុកន្លងមក មានជំនន់នៅតំបន់ទំនាបមួយចំនួន ប៉ុន្តែដោយសារតែ ហេដ្ឋារចនាសម្ព័ន្ធដកទឹករបស់ខេត្តមានការរៀបចំបានច្រើន ដូច្នេះមិនមាន​ការជន់​លិច ដូចឆ្នាំកន្លងមកនោះទេ។

លោក ចាន់ យុត្ថា បានបញ្ជាក់ទៀតថា “ដោយសារឥឡូវនេះ វាមិនមានអ្វីជាជោគជាំធ្ងន់ធ្ងរនោះទេ ខណៈដែលពេលនេះ គឺនៅ​ដើមរដូវវស្សានៅឡើយ ហើយប្រសិនបើភ្លៀងនៅតែបន្តធ្លាក់ វាជា​ស្ថាន​ភាព​មួយ​អំណោយផលដល់ដំណាំស្រូវនារដូវវស្សារបស់ប្រជាកសិករ ហើយចំពោះការព្រួយ​​បារម្ភ​មិន​មានអ្វីធ្ងន់ធ្ងរនោះទេ”។

បើតាមអ្នកនាំពាក្យរូបនេះ នៅក្នុងរយៈពេលប៉ុន្មានថ្ងៃកន្លងមកនេះ នៅតំបន់ផ្ទៃរងទឹកភ្លៀងរបស់ទន្លេមេគង្គ ទាំងក្នុងប្រទេសថៃ និងឡាវ និងផ្នែកខ្លះនៃប្រទេសវៀតណាម មិនមានភ្លៀងធ្លាក់ច្រើននោះទេ ពោលគឺទឹកបន្តស្រកចុះ។

ក្រសួងធនធានទឹក និងឧតុនិយម នៅថ្ងៃទី២២ មិថុនា បានប្រកាសថា ចាប់ពីថ្ងៃ២៣-២៩ មិថុនា កម្ពុជា នឹងរងឥទ្ធិពល​ពីជ្រលងសម្ពាធទាបនៃប្រទេសចិន និងខ្យល់មូសុងនិរតីក្នុងល្បឿនបង្គួរ ធ្វើ​ឱ្យបណ្តាខេត្តមួយចំនួនធ្លាក់ភ្លៀងក្នុងកម្រិតតិចទៅមធ្យម៕ ដោយ៖ ឡេង ដេត