ព័ត៌មានជាតិ

ការងារស្តារប្រឡាយ ទួលពង្រទី២ ជាង៦គីឡូម៉ែត្រ សម្រេចបាន៤០ភាគរយហើយ

បានផុស

៤ years មុន

នៅ

ថ្ងៃសុក្រ ២ កក្កដា ២០២១

ដោយ

បើទោះបីរាជធានីភ្នំពេញកំពុងប្រឈមមុខការរីករាលដាលនៃជំងឺកូវីដ-១៩ក៏ពិតមែន អាជ្ញាធរនៅតែបន្តការកសាងហេដ្ឋារចនាសម្ព័ន្ធនានា មានទាំងការស្តារប្រឡាយ លូ ការស្ថាបនាលូថ្មីៗជាដើម ដើម្បីបម្រើផលប្រយោជន៍ប្រជាពលរដ្ឋទូទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងនៅថ្ងៃទី០២ កក្កដា នេះ ក្រុមការងាររបស់រដ្ឋបាលរាជធានីភ្នំពេញ បានកំពុងស្តារប្រឡាយទួលពង្រទី២ ស្ថិតនៅភូមិសាស្ត្រសង្កាត់ចោមចៅ២ និងចោមចៅទី១ ខណ្ឌពោធិ៍សែនជ័យ។

លោក ដួង ចាន់សារ៉ាត់ ប្រធានអង្គភាពលូទឹក បូមទឹក នៃមន្ទីរសាធារណការនិងដឹកជញ្ជូនរាជធានីភ្នំពេញបានឲ្យដឹងនៅព្រឹកថ្ងៃទី០២ កក្កដានេះថា ដោយមានការយកចិត្តទុកដាក់និងការចង្អុលណែនាំពីលោក ឃួង ស្រេង អភិបាលរាជធានីភ្នំពេញ ក្នុងការដោះស្រាយបញ្ហាលិចលង់ មន្ទីរសាធារណការនិងដឹកជញ្ជូនរាជធានីភ្នំពេញ ដែលមានអង្គភាពលូទឹក បូមទឹក និងស្ថានីយ៍ចម្រោះទឹកកខ្វក់ បានកំពុងធ្វើសកម្មភាពស្តារប្រឡាយ ទួលពង្រទី២ ស្ថិតនៅភូមិសាស្ត្រសង្កាត់ចោមចៅ២និងចោមចៅទី១ ខណ្ឌពោធិ៍សែនជ័យ ដើម្បីបង្ហូរទឹកភ្លៀងនិងទឹកកខ្វក់ពីផ្លូវជាតិលេខ៣ទៅកាន់ប្រឡាយព្រែកហា។

លោក ដួង ចាន់សារ៉ាត់ បានបន្តថា ប្រឡាយទួលពង្រទី២ ស្ថិតនៅភូមិសាស្ត្រសង្កាត់ចោមចៅ២និងចោមចៅទី១ នៃខណ្ឌពោធិ៍សែនជ័យ។ ប្រឡាយនេះមានប្រវែង៦១០០ម៉ែត្រ មានទទឹងពី១០ម៉ែត្រទៅ ១៥ម៉ែត្រ និងមានជម្រៅចាប់ពី២,៥ម៉ែត្រ ទៅ៣,៥ម៉ែត្រ ។ ប្រឡាយនេះ មានតួនាទីជាប្រឡាយមេបង្ហូរទឹកភ្លៀងនិងទឹកកខ្វក់ពីផ្លូវជាតិលេខ៣ទៅកាន់ប្រឡាយព្រែកហា ដែលអាចកាត់បន្ថយទឹកជំនន់ ទឹកភ្លៀងនៅភាគខ្លះនៃខណ្ឌកំបូល រួមមានសង្កាត់ប្រទះឡាងនិងខណ្ឌពោធិ៍សែនជ័យ រួមមានសង្កាត់ចោមចៅ២និងចោមចៅ១និងភាគខ្លះ នៃខណ្ឌដង្កោរួមមានសង្កាត់ព្រៃសជាដើម។

លោក ដួង ចាន់សារ៉ាត់ បានបញ្ជាក់ថា ការងារស្តារប្រឡាយនេះបានចាប់ផ្តើមដំណើរការ កាលពីថ្ងៃទី២៧ ខែឧសភា ឆ្នាំ២០២១ហើយ បើគិតត្រឹមថ្ងៃទី០២ ខែកក្កដា ឆ្នាំ២០២១នេះ ជាលទ្ធផលស្តារបានប្រវែង ២៥០០ម៉ែត្រ ស្មើនឹង៤០%នៃផែនការ។ ការងារស្តារប្រឡាយទួលពង្រទី២នេះ តាមផែការការងារគឺ ប្រើប្រាស់រយៈពេលចំនួន៣ខែ ដោយគ្រោងនឹងស្តារបញ្ចប់នៅចុងខែសីហាឆ្នាំ២០២១នេះ៕

អត្ថបទ៖ ស្រីរ័ត្ន

សូមចុចអាន៖ ករណីពលរដ្ឋបន្តទន្ទ្រានដីភ្នំនៅស្រុកគីរីវង់ រដ្ឋបាលខេត្តតាកែវនឹងចាត់ការតាមផ្លូវច្បាប់

Related Topics:ការស្ដារប្រព័ន្ធលូ