លោកយាយអាយុ ១០១ឆ្នាំ ទើបទទួលវ៉ាក់សាំងកូវីដនៅកម្ពុជាទម្លាយអាថ៌កំបាំងធ្វើឱ្យអាយុវែង

កាលពីប៉ុន្មានមួយសប្តាហ៍មុន លោកយាយ ហូ ខាំ ដែលមានអាយុវែងដល់ទៅ ១០១ឆ្នាំ ជាអ្នករស់នៅរាជធានីភ្នំពេញ បានធ្វើឱ្យមហាជនផ្ទុះការចាប់អារម្មណ៍ម្ដងមកហើយ ក្រោយពេលលោកយាយ អញ្ជើញទៅទទួលការចាក់វ៉ាក់សាំងការពារកូវីដ-១៩ នៅមណ្ឌលអនុវិទ្យាល័យចតុមុខ ទាំងសុខភាពមាំមួនល្អគួរឱ្យស្ញើចសរសើរ។ នេះបើតាមប្រភព​ពី​សម្ព័ន្ធគ្រូពេទ្យ​សហភាព​សហព័ន្ធ​យុវជន​កម្ពុជា។

ថ្មីៗនេះទៀតសោត លោកយាយ បានប្រាប់អាថ៌កំបាំងមួយចំនួន ដែលមានឥទ្ធិពលជាខ្លាំង ក្នុងការធ្វើឱ្យលោកយាយមានព្រះជន្មវែង សុខភាពនៅល្អ សាច់ចាំ ហើយស្មារតីចងចាំនៅល្អរហូតសព្វថ្ងៃ។ លោយយាយ ហូ ខាំ បញ្ជាក់ថា រឿងងាយៗ ដែលគ្រប់គ្នាអាចយកទៅអនុវត្តន៍ជាទម្លាប់រស់នៅប្រចាំថ្ងៃបាន រួមមាន៖

១. បរិស្ថានរស់នៅ និងរបបគេងទៀងទាត់៖ ជារៀងរាល់ថ្ងៃលោកយាយ តែងតែសម្រាន្តនៅម៉ោង ៩:៣០ យប់ និងភ្ញាក់នៅម៉ោង5ព្រឹក ហើយលោកយាយសម្រាកថ្ងៃត្រង់ ១ម៉ោងជារៀងរាល់ថ្ងៃ

២. ទម្លាប់ហាត់ប្រាណជាប្រចាំ៖ លោកយាយតែងតែហាត់ប្រាណទៀងទាត់ ទោះបីចាស់ក៏ដោយ ការលើកដៃ ជើង និងតោងដើរចុះឡើងៗ មិនដែលខាន

៣. របបទទួលទាន៖ លោកយាយទទួលទានបាយតិចបំផុត តែលោកយាយទទួលទានបន្លែ និងត្រីច្រើន ជាពិសេសលោកយាយចូលចិត្តពិសាត្រីសាលម៉ុន ហើយលោកយាយទទួលទានផ្លែឈើច្រើន (២គីឡូក្នុងមួយថ្ងៃ គ្រប់ប្រភេទផ្លែឈើ និងតាមរដូវកាលផ្លែឈើទៀតផង)។ ក្រៅពីនេះលោកយាយ ក៏មានទម្លាប់ពិសារទឹកច្រើន និងទៀងទាត់ ថែមទៀតផង៕

ស្រ្តី​​​វ័យជាង ១០០ ឆ្នាំនេះ មាន​ឈ្មោះ ហូ ខាំ (ជាភាសាខ្មែរ) HO VVE YOR KHAM (ផ្លូវការជាភាសាបារាំង) បានមកទទួលវ៉ាក់សាំង sinovac កាលពីថ្ងៃ ១៦ ខែ មិថុនា។ លោកយាយជាជនជាតិខ្មែរ កើតនៅថ្ងៃទី ២២ ខែសីហា​ឆ្នាំ ១៩២០។

លោកយាយ បានទៅរស់នៅប្រទេស​បារាំងកាលពីឆ្នាំ១៩៨០ រហូតទទួលបានសញ្ជាតិបារាំង ហើយបានត្រលប់មករស់នៅប្រទេសកម្ពុជាវិញកាលពី៣ -៤ ឆ្នាំមុន៕

ប្រភព: Heng Sok Kung