ព័ត៌មានជាតិ

ឃាត់ខ្លួនអ្នកលួចកាត់ខ្សែភ្លើងម្នាក់ និងម្នាក់ទៀតកំពុងគេចខ្លួន

បានផុស

៣ years មុន

នៅ

ថ្ងៃអង្គារ ១៣ កក្កដា ២០២១

ដោយ

ជនសង្ស័យម្នាក់ក្នុងចំណោមគ្នា២នាក់ ត្រូវបានកម្លាំងប៉ុស្តិ៍ស្រះចក នៃអធិការដ្ឋាននគរបាលខណ្ឌដូនពេញឃាត់ខ្លួនក្នុងសកម្មភាពលួចកាត់ខ្សែភ្លើងពីប្រអប់បង្គោលបណ្តាលឲ្យដាច់ភ្លើងផ្ទះគេ។

ករណីលួចកាត់ខ្សែភ្លើងនោះកើតឡើង នៅចំណុចមុខផ្ទះលេខ២៣៦០ ផ្លូវលេខ៤៥ ភូមិ១៧ សង្កាត់ស្រះចក ខណ្ឌដូនពេញ រាជធានីភ្នំពេញ កាលពីថ្ងៃទី១២ ខែកក្កដា ឆ្នាំ២០២១ វេលាម៉ោង០៣ និង៣០នាទីដែល កម្លាំងជំនាញផ្នែកយុត្តិធម៌ និងកម្លាំងប៉ុស្តិ៍នគរបាលរដ្ឋបាលស្រះចក នៃអធិការដ្ឋាននគរបាលខណ្ឌដូនពេញ បានធ្វើការឃាត់ខ្លួនជនសង្ស័យ០១នាក់ឈ្មោះ ចែម សុភ័ក្រ ភេទប្រុស អាយុ២១ឆ្នាំ ជនជាតិខ្មែរ មុខរបរ និងទីលំនៅមិនពិតប្រាកដ(ឃាត់ខ្លួន) ។ ទី២-ឈ្មោះ ខ្មៅ ភេទប្រុស អាយុប្រហែល២៧ឆ្នាំ (គេចខ្លួន)។ ចំណែកវត្ថុតាងចាប់យកមានដង្កាប់ដងជ័រ ពណ៌ក្រហមលឿងមួយ,ដែកសរសៃមានទំពក់ ដងជ័រ ពណ៌ក្រហម ប្រវែងប្រហែល១ម៉ែត្រ មួយដើម និងពិលឆ្លុះពាក់លើក្បាល ពណ៌ខ្មៅក្រហមមួយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនរងគ្រោះឈ្មោះ កែវ សត្យានរលក្ខណ៍ ភេទប្រុស អាយុ៣១ឆ្នាំ ជនជាតិខ្មែរ មុខរបរ បុគ្គលិកក្រុមហ៊ុន THE BOX ស្នាក់នៅផ្ទះលេខ១៧៣ ផ្លូវលេខ២១BT សង្កាត់បឹងទំពុន ខណ្ឌមានជ័យ រាជធានីភ្នំពេញ។

សមត្ថកិច្ចបានឲ្យដឹងថា នៅថ្ងៃទី១២ ខែកក្កដា ឆ្នាំ២០២១ វេលាម៉ោង០៣និង៣០នាទី ជនសង្ស័យ និងបក្ខពួកបាននាំគ្នាធ្វើសកម្មភាពលួចកាត់ខ្សែភ្លើងទំហំ៤×៧៥ មីលីម៉ែត្រ ពីប្រអប់បង្គោលភ្លើងលេខPTT១២២៧-៥០៥B ស្ថិតនៅចំណុចមុខផ្ទះលេខ២៣៦០ ផ្លូវលេខ៤៥ ភូមិ១៧ សង្កាត់ស្រះចក ខណ្ឌដូនពេញ បានសម្រេចបណ្តាលដាច់ចរន្តអគ្គិសនី ពេលនោះជនរងគ្រោះ បានចេញមកក្រៅឃើញជនសង្ស័យទាំង០២នាក់កំពុងធ្វើសកម្មភាពស្រាវយកខ្សែភ្លើងពីបង្គោល ភ្លាមនោះជនរងគ្រោះ និងអ្នកជិតខាងបាននាំគ្នាដេញចាប់បានជនសង្ស័យឈ្មោះ ចែម សុភ័ក្រ រួមនឹងវត្ថុតាង យកមកប្រគល់ឲ្យសមត្ថកិច្ចធ្វើការសាកសួរ ចំណែកបក្ខពួកគេចខ្លួនបាត់។