ចង់ទៅលេងខ្នងផ្សារ​ត្រូវរង់ចាំមួយសប្តាហ៍ទៀត ​អាចបើកឡើងវិញ

អនុប្រធានមន្ទីរទេសចរណ៍ខេត្តកំពង់ស្ពឺ លោក រស់ សុខ បានប្រាប់កម្ពុជាថ្មី នៅព្រឹកថ្ងៃទី ១៩ ខែកក្កដានេះថា តំបន់រមណីយដ្ឋានខ្នងផ្សារ អាចបើកឡើងវិញ នៅសប្តាហ៍ក្រោយ បន្ទាប់ពីបានបិទ ជិត ១ សប្តាហ៍មកនេះ។

អាជ្ញាធរមូលដ្ឋាន បានសម្រេចបិទខ្នងផ្សាររយៈពេល ១៤ ថ្ងៃ កាលពីថ្ងៃទី​១៤ ខែកក្កដា ព្រោះព្រួយបារម្ភពីការឆ្លងរីករាលដាលនៃជំងឺកូវីដ១៩។

លោក រស់ សុខ បានឱ្យដឹងថា ខ្នងផ្សារគឺបិទរយៈពេលខ្លី ដោយសារតែសហគមន៍ព្រួយ​បារម្ភពីការឆ្លងរីករាលដាលនៃជំងឺកូវីដ១៩ ខណៈនៅកម្ពុជាមួយរយៈនេះ ការឆ្លងរាលដាលបានផ្ទុះឡើង សឹងគ្រប់កន្លែង ជាពិសេសនៅតំបន់ទីប្រជុំជន និងកន្លែងដែលមាន​មនុស្សទៅលេងច្រើន។

លោកថា ប្រជាពលរដ្ឋនៅក្នុងសហគមន៍ ពួកគាត់ព្រួយបារម្ភថាពួកគាត់ មិនទាន់ទទួលបានវ៉ាក់សាំងនៅឡើយ។ លោក រស់ សុខ អនុប្រធានស្ដីទីមន្ទីរទេសចរណ៍​ខេត្តកំពង់​ស្ពឺបញ្ជាក់ថា តំបន់ទេសចរនេះ នឹងបើកឡើងវិញ ប្រហែល១ អាទិត្យទៀត នៅពេលដែល​ស្ថាន​ភាព​រាងធូរស្រាលបន្តិច។

ខ្នងផ្សារ ជាតំបន់ព្រៃភ្នំដ៏ធំមួយដែលស្ថិតនៅក្នុងភូមិតាំងបំពង តំបន់រលាក់កងជើង ឃុំតាសាល ស្រុកឱរ៉ាល់ ខេត្ត​កំពង់ស្ពឺ។ ខ្នងផ្សារជាទីតាំងប្រសព្វមុំបីដែលផ្សាភ្ជាប់ខេត្តចំនួនបីគឺ កោះកុង កំពង់ស្ពឺ និងពោធិ៍សាត់។

ខ្នងផ្សារ ជាតំ​បន់មួយដែលសំបូរទៅព្រៃឈើក្រាស់ ជ្រលងភ្នំខ្ពស់ៗ វាលស្រល់ដ៏ស្រស់ស្អាត និងសំបូរទៅដោយ​សត្វព្រៃ​កម្រ​ជាច្រើន​ប្រភេទ៕ ដោយៈ ឡេង ដេត