ប្រទះឃើញសពត្រីផ្សោត ១ ក្បាល​​ទម្ងន់ជិត ១០០ គីឡូអណ្ដែតទឹកមកទើរលើ​ឆ្នេរ​ពយជំទាវម៉ៅ

សាកសពត្រីផ្សោតមួយក្បាលមានទម្ងន់ជិត១០០គីឡូក្រាម ត្រូវគេប្រទះឃើញងាប់អណ្តែតទឹកមកទើនៅលើឆ្នេរខ្សាច់​ពយជំទាវម៉ៅ ស្ថិតនៅក្នុងភូមិសាស្រ្តស្រុកព្រៃនប់ ខេត្តព្រះសីហនុ។

ហេតុការណ៌ប្រទះឃើញសាកសពត្រីផ្សោតនេះ បានកើតមានឡើងនៅយប់ថ្ងៃទី១៩ ខែកក្កដា ឆ្នាំ២០២១។ ហ្វេសប៊ុកផេកផ្លូវការរបស់មន្ទីរកសិកម្ម ខេត្តព្រះសីហនុ បានបញ្ជាក់ថា ករណីនេះ បន្ទាប់ពីទទួលបានការណែនាំពីលោក គួច ចំរើន អភិបាលនៃគណៈអភិបាលខេត្តព្រះសីហនុ មន្រ្តីជំនាញជលផល បានចុះពិនិត្យមើលត្រីផ្សោត ១ក្បាល ដែលបានងាប់អណ្តែតមកទើឆ្នេរពយជំទាវម៉ៅ ខេត្តព្រះសីហនុ។

ឆ្លងតាមការពិនិត្យរបស់មន្រ្តីជំនាញ ត្រីផ្សោតនេះមានទង្ងន់ ប្រហែល៩០គីឡូ ប្រវែងបណ្តោយ ២,២៤ម ទទឹង០,៦០ម ជាប្រភេទ ផ្សោតឃ្លៀច(Indo-Pacific humpoback dolphin)ឈ្មោល។

ផ្សោតប្រភេទនេះ មាននៅតំបន់កោះព្រិង ឆ្នេរខែម មុខរាម នៅប្រជុំកោះរ៉ុង ជាប្រភេទសត្វកម្រដែលត្រូវការពារដោយអនុត្រឹក្យលេខ១២៣ អ.ន.ក្រ។ តាមការសន្និដ្ឋាន ត្រីផ្សោតឃ្នៀចនេះ បានងាប់ដោយសារជាប់ឧបករណ៍នេសាទ​(មង)៕

អត្ថបទ៖ ស៊ុយ ចាន់ធា