ព័ត៌មានជាតិ

យប់ដំបូងសមត្ថកិច្ចឃាត់យានយន្តល្មើសបម្រាមគោចរបានជាង១៦០គ្រឿង

បានផុស

១ year មុន

នៅ

ថ្ងៃសៅរ៍ ៣១ កក្កដា ២០២១

ដោយ

លោកវរសេនីយឯក សាន សុខសីហា អ្នកនាំពាក្យស្នងការនគរបាលរាជធានីភ្នំពេញ បានមានប្រសាសន៍នៅថ្ងៃទី៣១ ខែកក្កដានេះថា ចាប់ពីម៉ោង៩យប់ថ្ងៃទី៣០ ដល់ម៉ោង៣ទៀបភ្លឺថ្ងៃទី៣១ ខែកក្កដានេះសមត្ថកិច្ចចម្រុះបានធ្វើការឃាត់ជនយានយន្តដែលល្មើសនឹងបម្រាមគោចររបស់សាលារាជធានីភ្នំពេញចំនួន១៦៤គ្រឿង ក្នុងនោះម៉ូតូចំនួន១១៨គ្រឿង និងរថយន្តចំនួន៤៦គ្រឿង។ប៉ុន្តែមិនមានឃាត់មនុស្សទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តថា ក្នុងចំណោមយានយន្តទាំងនោះសមត្ថកិច្ចបានធ្វើការផាកពិន័យរួចរាល់បានចំនួន២២គ្រឿង ក្នុងនោះរថយន្តចំនួន១៤គ្រឿង និងម៉ូតូចំនួន៨គ្រឿងនិងនាំយកមករក្សាទុកនៅកន្លែងសមត្ថកិច្ចរថយន្តចំនួន៣៧គ្រឿងនិងម៉ូតូចំនួន៣៧គ្រឿងហើយក្រៅពីនេះបានធ្វើការណែនាំ និងអប់រំគាត់។

លោកបានបន្តទៀតថា នៅថ្ងៃទី១នៃការអនុវត្តទៅលើវិធានការរបស់សាលារាជធានីភ្នំពេញនេះឃើញថាបងប្អូនប្រជាពលរដ្ឋយើងមានការយល់ដឹងច្រើននិងបានចូលរួមអនុវត្តទៅតាមការណែនាំរបស់អាជ្ញាធរមានសមត្ថកិច្ច។ មានពលរដ្ឋតិចតួចប៉ុណ្ណោះដែលនៅល្មើសនិងបំពានការហាមឃាត់នេះ។

លោកបានបន្ថែមថា «សម័យការនេះហើយ មិនមែនពួកគាត់មិនដឹងទេ គឺគាត់មិនបានចូលរួមអនុវត្តតែម្តងធម្មតាការផ្សព្វផ្សាយមានទាំងអស់ទាំងផ្សព្វផ្សាយផ្ទាល់តាមបណ្តាញសង្គមយើងឃើញហើយគ្រប់ផេកស្ថាប័នសារព័ត៌មាន គឺមានផ្សាយច្បាស់ណាស់ទាំងសារាចរណ៍ណែនាំរបស់រដ្ឋាភិបាល ក៏ដូចជាសេចក្តីជូនដំណឹងរបស់សាលារាជធានីភ្នំពេញ។ ម្យ៉ាងទៀតបម្រាមគោចរនេះ មិនមែនជារឿងថ្មីនោះទេ គឺយើងធ្លាប់បានអនុវត្តដែរ ដូចនេះគាត់គួរតែយល់ហើយ»។

លោកសង្ឃឹមថា នៅយប់នេះ ឬយប់ជាបន្តបន្ទាប់ទៀត ចំនួនពលរដ្ឋដែលល្មើសនឹងកាន់តែមានការថយចុះជាបន្តបន្ទាប់ទៀត ដើម្បីចូលរួមទប់ស្កាត់ជំងឺកូវីដ១៩ទាំងអស់គ្នា ពិសេសវីរុសបំប្លែងថ្មីដែលតាដែលមានការចម្លងលឿននិងមានគ្រោះថ្នាក់ដល់អាយុជីវិតច្រើន។ លោកបានបន្ថែមទៀតថា ការអនុវត្តបម្រាមគោចរនេះ គឺដើម្បីជួយសង្គ្រោះប្រជាពលរដ្ឋយើងទាំងអស់គ្នាទេ។

គួរបញ្ជាក់ថា សាលារាជធានីភ្នំពេញ បានដាក់ចេញសេចក្ដីប្រកាសស្តីពីការអនុវត្តបម្រាមគោចរចាប់ពីម៉ោង៩និង០០នាទីយប់ ដល់ម៉ោង៣និង០០នាទីទៀបភ្លឺ រយៈពេល១៤ថ្ងៃ ចាប់ពីថ្ងៃទី២៩ ខែកក្កដាដល់ថ្ងៃទី១២ ខែសីហា ឆ្នាំ២០២១ខាងមុខនេះ ដើម្បីទប់សស្កាត់ជំងឺកូវីដ១៩ពិសេសវីរុសដែលតា៕

អត្ថបទ ៖ សំអឿន