មួយសប្តាហ៍ ពលរដ្ឋ៨២៧​នាក់ ល្មើសបម្រាមគោចរម៉ោង​៨យប់ដល់ម៉ោង៣ទៀបភ្លឺ

នៅក្នុងរយៈពេលត្រឹមតែមួយសប្តាហ៍ មានពលរដ្ឋចំនួន៨២៧នាក់ បានល្មើសបម្រាមគោចររបស់រដ្ឋបាលរាជធានីភ្នំពេញ ចាប់ពីម៉ោង ៨យប់ដល់ម៉ោង ៣ទៀបភ្លឺ។

អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា បានប្រាប់សារព័ត៌មានកម្ពុជាថ្មីថា ចាប់ពីថ្ងៃទី៦ រហូតមកដល់ព្រឹកថ្ងៃទី១២ ខែឧសភា សមត្ថកិច្ចបានធ្វើការឃាត់ខ្លួនប្រជាពលរដ្ឋដែលបានល្មើសនឹងបម្រាម​គោចរចំនួន ៨២៧នាក់ ក្នុងនោះធ្វើការសាកសួរនៅតាមអធិការដ្ឋានខណ្ឌចំនួន១៨នាក់ធ្វើការណែនាំអប់រំឲ្យវិលត្រឡប់ទៅលំនៅដ្ឋានវិញចំនួន៥៨៦នាក់បញ្ជួនទៅធ្វើចត្តាឡីស័កចំនួន២១៤នាក់ ធ្វើការពិន័យអន្តរកាលចំនួន៥នាក់និងបញ្ជួនទៅតុលារការចំនួន២នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យរូបនេះ បានឱ្យដឹងថា សមត្ថកិច្ចនៅតែបន្តអនុវត្តល្បាតតាមតំបន់ក្រហម តំបន់លឿងទុំ និងតំបន់លឿងជាប្រចាំ​ពិសេសអនុត្តបម្រាមគោចរពេលយប់ពីម៉ោង៨យប់ដល់ម៉ោង៣ទៀបភ្លឺតាមបញ្ជាយ៉ាងម៉ឺងម៉ាត់របស់លោក ស ថេត ស្នងការរាជធានីភ្នំពេញ។

ក្នុងនោះមានការចល័តកងកម្លាំងសមត្ថកិច្ចរាល់យប់នៅគ្រប់ខណ្ឌដែលដឹកនាំដោយស្នងការរងដើម្បីត្រួតពិនិត្យការអនុវត្តបម្រាមគោលចរនេះ។

អ្នកនាំពាក្យស្នងការរាជធានី ក៏អំពាវនាវឱ្យប្រជាពលរដ្ឋចូលរួមអនុវត្តតាមការណែនាំរបស់រដ្ឋបាលរាជធានីភ្នំពេញ ឱ្យបានខ្ជាប់ខ្ជួនចៀសវាងការផាកពិន័យ ក្នុងពេលរាដែលសមត្ថកិច្ចចុះល្បាតគ្រប់កន្លែង៕

អត្ថបទ៖សំអឿន