ព័ត៌មានជាតិ
វារីអគ្គិសនីអានុភាព ១៥០ មេហ្កាតវ៉ាត់ទៀត ចាប់ផ្តើមសាងសង់នៅចុងឆ្នាំនេះ
ភ្នំពេញ ៖ វារីអគ្គិសនីស្ទឹងតាតៃលើដែលមានអានុភាព១៥០មេហ្កាវ៉ាត់ ដែលមានទីតាំងនៅស្រុកថ្មបាំង ខេត្តកោះកុងវិនិយោគដោយក្រុមហ៊ុន China National Heavy Machinery Corporation របស់ចិននោះ នឹងចាប់ផ្តើមដំណើរការសាងសង់ជាផ្លូវការនៅត្រីមាសទី៤ឆ្នាំ២០២១ខាងមុខនេះ។
លោក ពេជ ស៊ី យ៉ុន ប្រធានមន្ទីររ៉ែនិងថាមពលខេត្តកោះកុងបានមានប្រសាសន៍នៅព្រឹកថ្ងៃទី២១សីហានេះថា វារីអគ្គិសនីស្ទឹងតាតៃលើ នឹងចំណាយពេលសាងសង់រួចរាល់រហូតដល់ឆ្នាំ២០២៦ខាងមុខ។ បច្ចុប្បន្ននេះក្រុមហ៊ុនកំពុងធ្វើផ្លូវចូលទៅទីតាំងសម្រាប់ឱ្យគ្រឿងចក្រ ងាយស្រួលចេញចូលក្នុងការដំណើរការសាងសង់។
លោក សុខ សុទ្ធី អភិបាលរងនិងជាអ្នកនាំពាក្យសាលាខេត្តកោះកុងបានមានប្រសាសន៍ថា គម្រោងសាងសង់វារីអគ្គិសនីស្ទឹងតាតៃលើ បានប៉ះពាល់ដល់ប្រជាពលរដ្ឋចំនួនជាង១០គ្រួសារ ហើយអាជ្ញាធរខេត្តបានរៀបចំគោលនយោបាយដោះស្រាយជួនពួកគាត់រួចរាល់ និងប៉ះពាល់បន្ទាយប្រតិបត្តិការសឹករងដែលខេត្តបានរកទីតាំងថ្មីជំនួសរួចរាល់ហើយដែរ។
កាលពីថ្ងៃទី៨ ខែធ្នូ ឆ្នាំ២០២០ កន្លងទៅនេះក្រសួងរ៉ែ និងថាមពល អគ្គិសនីកម្ពុជានិងអាជ្ញាធរអគ្គិសនីកម្ពុជាបានចុះហត្ថលេខាលើកិច្ចព្រមព្រៀងជាមួយក្រុមហ៊ុន China National Heavy Machinery Corporation របស់ចិន លើគម្រោងសាងសង់វារីអគ្គិសនីស្ទឹងតាតៃលើ បន្ទាប់ពីរាជរដ្ឋាភិបាលបានអនុម័តលើគម្រោងនេះរួចមក។
គម្រោងវារីអគ្គិសនីស្ទឹងតាតៃលើ ដែលមានវិនិយោគក្នុងតម្លៃជាង៣៨៩ លានដុល្លារ គឺជាគម្រោងមួយដែលមានសក្ដានុពលវារីអគ្គិសនី ប្រើប្រភពទឹករបស់ស្ទឹង២គឺស្ទឹងកែប និងស្ទឹងតាតៃ ដោយសាងសង់ទំនប់ ២ កាត់ស្ទឹងទាំង២ បង្កើតជាអាងស្តុកទឹក២ ភ្ជាប់គ្នាទៅវិញទៅមក ដោយទួណែលបង្ហូរទឹកក្រោមដី។
ប្រភពទឹកដែលតភ្ជាប់គ្នានេះ គ្រោងទម្លាក់យកមកផលិតថាមពលអគ្គិសនី នៅអគារថាមពលដែលមានអានុភាពសរុប ១៥០មេហ្គាវ៉ាត់ ស្ថិតនៅចម្ងាយ ១៣គីឡូម៉ែត្រ ក្រោមទំនប់ទឹកស្ទឹងកែបតាមបំពង់ទួណែលបង្ហូរទឹកក្រោមដី។
គម្រោងនេះ ផ្ដល់សម្បទានរយៈពេល ៣៩ឆ្នាំ ក្នុងនោះ៤ឆ្នាំសម្រាប់ការសាងសង់ និង៣៥ឆ្នាំសម្រាប់ការធ្វើអាជីវកម្ម។ បរិមាណមូលដ្ឋាននៃថាមពលអគ្គិសនីផលិតប្រចាំឆ្នាំលក់ឱ្យអគ្គិសនីកម្ពុជាគឺជាមធ្យម ៥២៧លានគីឡូវ៉ាត់ម៉ោង ហើយលក់ក្នុងតម្លៃ ៧,៩២សេនអាមេរិក ក្នុង១គីឡូវ៉ាត់ម៉ោង។
បើតាមលោក ពេជ ស៊ីយ៉ុន បានបន្តទៀតថា បច្ចុប្ប្ននេះខេត្តកោះកុងមានវារីអគ្គិសនីចំនួន៤រួមមានវារីអគ្គិសនីស្រែអំបិល ដែលមានអានុភាព១៨មេហ្កាវ៉ាត់ វារីអគ្គិសនីស្ទឹងតាតៃមានអានុភាព២៤៦មេហ្កាវ៉ាត់ វារីអគ្គិសនីឬស្សីជ្រុំ មានអានុភាព៣៣៨មេហ្កាវ៉ាត់ និងវារីអគ្គិសនីស្ទឹងតាតៃលើដែលមានអានុភាព១៥០មេហ្កាវ៉ាត់ ដែលនឹងចាប់ផ្តើមសាងសង់ជាផ្លូវការនៅក្នុងត្រីមាសទី៤នៃឆ្នាំ២០២១នេះ៕
អត្ថបទ៖ សំអឿន
-
ព័ត៌មានជាតិ១ ថ្ងៃ agoសមត្ថកិច្ចឃាត់ខ្លួនជនសង្ស័យជនជាតិថៃ២នាក់និងខ្មែរម្នាក់ ករណីជួញដូរសារធាតុញៀន
-
ព័ត៌មានអន្ដរជាតិ៦ ថ្ងៃ agoខេត្ត Kochi នៅជប៉ុនផ្តល់ប្រាក់ ១២៥ដុល្លារឲ្យអ្នកនៅលីវ ចំណាយលើការណាត់ចួបបង្កើតស្នេហា
-
ព័ត៌មានជាតិ៧ ថ្ងៃ agoទេសចរគួរដឹងអ្វីខ្លះ ពេលទៅកម្សាន្តតំបន់អេកូទេសចរណ៍រ៉ាមសារសម្រស់កោះហានក្នុងខេត្តស្ទឹងត្រែង?
-
ព័ត៌មានអន្ដរជាតិ១ សប្តាហ៍ agoត្រាំ ពន្លះ WSJ ថា ជាសារព័ត៌មានវង្វេងផ្លូវ និងជាកាកសំណល់នយោបាយ
-
ព័ត៌មានជាតិ៥ ថ្ងៃ agoតំណាងអយ្យការសម្រេចចោទប្រកាន់លោកផ្កាយបីនិងលោកផ្កាយពីរ រួមអ្នកពាក់ព័ន្ធ៤នាក់ផ្សេងទៀត
-
ព័ត៌មានអន្ដរជាតិ៧ ថ្ងៃ agoវិមានក្រឹមឡាំង៖ ពូទីន ត្រៀមជួបហ្សេលេនស្គី ទាល់តែមានការចុះហត្ថលេខាលើកិច្ចព្រមព្រៀងសន្តិភាព
-
ព័ត៌មានជាតិ៧ ម៉ោង agoទាហានថៃបាញ់កាំភ្លើង៩គ្រាប់ មុខអនុព័ន្ធយោធាអាម៉េរិក ចិន រុស្ស៊ី ជប៉ុន ដែលចុះសង្កេតការណ៍នៅអូរស្មាច់
-
សន្តិសុខសង្គម៥ ថ្ងៃ agoតុលាការខេត្តកំពត បង្គាប់ឲ្យឃុំខ្លួនមន្ត្រីនគរបាលដែលគប់កែវស្រាលើអ្នកចាប់ទឹកកកដាក់ពន្ធនាគារ