សម្ដេចតេជោ ហ៊ុន សែន ណែនាំឲ្យអភិបាលរាជធានី-ខេត្ត ត្រូវសម្រេចឲ្យបានឆាប់រហ័ស នូវការចាក់វ៉ាក់សាំងជូនប្រជាជន

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានណែនាំដល់គណៈអភិបាលរាជធានី-ខេត្ត ត្រូវខិតខំប្រឹង​ប្រែង​លើការប្រយុទ្ធ និងទប់ស្ដាត់ការរាតត្បាតជំងឺកូវីដ-១៩ ហើយត្រូវសម្រេចឲ្យបានឆាប់រហ័ស នូវការចាក់វ៉ាក់​សាំង ជូនប្រជាពលរដ្ឋក្នុងមូលដ្ឋានរបស់ខ្លួន។

សម្ដេចតេជោ ហ៊ុន សែន នៅថ្ងៃទី២៨ ខែសីហា ឆ្នាំ២០២១ បានចេញសេចក្ដីណែនាំ ស្ដីពី ការពង្រឹងការអនុវត្ត យុទ្ធនាការជាតិ ចាក់វ៉ាក់សាំងកូវីដ-១៩ ជុំទី១។​​ ក្នុងសេចក្ដីណែនាំនេះ សម្ដេចតេជោនាយករដ្ឋមន្ត្រី បានណែនាំថា គណៈអភិបាលរាជធានី-ខេត្ត ត្រូវប្រមូលផ្ដុំការយកចិត្តទុកដាក់ និងការខិតខំប្រឹងប្រែង លើការប្រយុទ្ធ និងទប់ស្កាត់​ការឆ្លងរាលដាល នៃជំងឺកូវីដ-១៩ ដោយចាត់ទុកជាការងារស្នូលអាទិភាពខ្ពស់ បំផុតរបស់ខ្លួន ជាពិសេសត្រូវ​សម្រេច​ឲ្យបានឆាប់រហ័ស នូវការចាក់វ៉ាក់សាំងជូនប្រជាជន នៅក្នុងមូលដ្ឋានក្រោមសមត្ថកិច្ច របស់ខ្លួន ដែលជា​ខ្សែក្រវ៉ាត់ការពារទី១ និងជាយុទ្ធសាស្រ្ដគន្លឹះ របស់រាជរដ្ឋាភិបាល ក្នុង សមរភូមិប្រយុទ្ធនឹងជំងឺកូវីដ-១៩។

ទន្ទឹមនេះ គណៈអភិបាលរាជធានី-ខេត្ត ត្រូវរាយការណ៍ប្រចាំថ្ងៃ និងជាប់ជាប្រចាំអំពីវឌ្ឍនភាព នៃការគ្រប់គ្រង និងការអនុវត្តការងារចាក់វ៉ាក់សាំងកូវីដ-១៩​ នៅក្នុងមូលដ្ឋានក្រោមសមត្ថកិច្ច របស់ខ្លួន ជូនគណៈកម្ម ការចំពោះ​កិច្ច ចាក់វ៉ាក់សាំង ដើម្បីជាមូលដ្ឋានក្នុងការតាមដាន និងត្រូវត្រួតពិនិត្យការងារ ចាក់វ៉ាក់សាំងដោយប្រើប្រាស់ គំរូ​តារាងព័ត៌មាន ដែលត្រូវបានរៀបចំដោយ គណៈកម្មការចំពោះកិច្ចចាក់វ៉ាក់សាំងកូវីដ -១៩ ក្នុងក្របខណ្ឌទូ​ទាំង​ប្រទេស។

ជាមួយគ្នានេះ នៅក្នុងសេចក្ដីណែនាំ របស់សម្ដេចតេជោ ហ៊ុន សែន ក៏បានស្នើឲ្យគណៈអភិបាលរាជធានី-ខេត្ត ត្រូវរៀបចំធ្វើបច្ចុប្បន្នភាពឡើងវិញ ឲ្យបានច្បាស់លាស់ និងឆាប់រហ័សអំពីចំនួនប្រជាជន ជាក់ស្ដែងនៅមូលដ្ឋាន ដែលត្រូវចាក់វ៉ាក់សាំងកូវីដ-១៩ ជាពិសេសនៅកម្រិតថ្នាក់ឃុំ-សង្កាត់ និងញែកចែកចេញចំនួនប្រជាជន​ចំណាក​ស្រុក ដែលអាចទទួលការចាក់វ៉ាក់សាំងកូវីដ-១៩ នៅទីកន្លែងផ្សេង ដើម្បីមានមូលដ្ឋានច្បាស់លាស់ ក្នុងការកែ​សម្រួល​ផែនការចាក់វ៉ាក់សាំង ដោយផ្អែកតាមចំនួនប្រជាជនជាក់ស្ដែង នៅក្នុងមូល ដ្ឋាន ក៏ដូចជាឈាន​ទៅសម្រេច​បិទបញ្ចប់យុទ្ធនាការចាក់វ៉ាក់សាំង នៅមូលដ្ឋាននោះ។

ប៉ុន្តែមុនសម្រេច បិទបញ្ចប់យុទ្ធនាការចាក់វ៉ាក់សាំង នៅមូលដ្ឋាននីមួយៗ និងចល័តទៅកាន់ទីកន្លែងផ្សេងទៀត, ក្រុម​​ការងារយុទ្ធនាការចាក់វ៉ាក់សាំង នៅតាមមូលដ្ឋាននីមួយៗ ត្រូវធ្វើការជូនដំណឹងជាសាធារណៈ អំពីការត្រៀម​បិទបញ្ចប់​យុទ្ធនាការចាក់វ៉ាក់សាំងនេះ និងត្រូវសហការជាមួយអាជ្ញាធរមូលដ្ឋាន ដើម្បីសម្រេច បិទបញ្ចប់​យុទ្ធនាការ​ចាក់វ៉ាក់សាំង នៅទីតាំងមូលដ្ឋាននោះ៕

អត្ថបទ៖ ឃួន សុភ័ក្រ