ព័ត៌មានជាតិ

បិទខ្ទប់ ផ្សារអូរបីជាន់ បណ្តោះអាសន្ន ក្រោយរកឃើញ អ្នកវិជ្ជមានកូវីដ-១៩

បានផុស

៣ years មុន

នៅ

ថ្ងៃអាទិត្យ ២៩ សីហា ២០២១

ដោយ

រដ្ឋបាលស្រុកអូរជ្រៅ បានសម្រេចបិទខ្ទប់ ផ្សារអូរបីជាន់ ជាបណ្តោះអាសន្ន ក្រោយរកឃើញអ្នកវិជ្ជមាន កូវីដ-១៩ នៅព្រឹកថ្ងៃទី២៩ ខែសីហា ឆ្នាំ២០២១នេះ។ ផ្សារអូរបីជាន់ ស្ថិតនៅភូមិថ្នល់បត់ ភូមិអូរបីជាន់ ឃុំអូរបីជាន់ ស្រុកអូជ្រៅ ខេត្តបន្ទាយមានជ័យ។

លោក យឹម សំណាង អភិបាលស្រុកអូរជ្រៅ បានអំពាវនាវឲ្យប្រជាពលរដ្ឋ ដែលប្រកបអាជីវកម្ម ក្នុងផ្សារអូរ បីជាន់ និងតាមផ្ទះជុំវិញផ្សារទាំងអស់ទៅយកសំណាក ដើម្បីធ្វើតេស្តរហ័សរកកូវីដ-១៩ ឲ្យបានទាន់ពេល ។ លោកថា ដោយសារមានការឆ្លងរាលដាល នៃជំងឺកូវីដ-១៩ នៅទីតាំងផ្សារអូរបីជាន់នេះ ទើបរដ្ឋបាលស្រុកអូរជ្រៅ សហការជាមួយមន្ត្រីសុខាភិបាល ចុះយកសំណាកតេស្តរហ័ស (Rapid Test) ដល់អាជីវករលក់ នៅក្នុងផ្សារអូរបីជាន់ និងប្រជាពលរដ្ឋចូលទៅទិញ ចាប់ផ្តើមពីវេលាម៉ោង៨ និង០០នាទីព្រឹក ថ្ងៃទី២៩ ខែសីហា ឆ្នាំ២០២១ ទៅស្ថិតនៅបរិវេណ ផ្សារអូរបីជាន់នេះតែម្ដង។

លោកអភិបាលស្រុក បានស្នើឲ្យអាជីវករ និងប្រជាពលរដ្ឋ ចូលរួមសហការ ក្នុងការប្រយុទ្ធប្រឆាំង និងទប់ស្កាត់ការរីករាលដាលជំងឺកូវីដ-១៩ ជាពិសេសអនុវត្តវិធានការ របស់ប្រមុខរាជរដ្ឋាភិបាលកម្ពុជា ៣កុំ ៣ ការពារ ផងដែរ៕

អត្ថបទ៖ វ៉ាន់ ណាង