Connect with us

ព័ត៌មានជាតិ

ភ្នំពេញនៅសល់២៥សាលារៀនធ្វើជាមណ្ឌល ចត្តាឡីស័ក និងព្យាបាលអ្នកជំងឺកូវីដ-១៩

បានផុស

នៅ

ប្រធានមន្ទីរអប់រំ យុវជន និងកីឡារាជធានីភ្នំពេញ បានឱ្យដឹងថា រហូតមកដល់ពេលនេះនៅសល់សាលារៀនប្រមាណ២៥ប៉ុណ្ណោះនៅរាជធានីភ្នំពេញជាមណ្ឌលចត្តាឡីស័ក និងមណ្ឌលព្យាបាលជំងឺកូវីដ-១៩ ខណៈកាលពីមុនមានរហូតដល់ទៅជាង១០០សាលា។ លោកបានបន្តថា នៅពេលផ្ទុះព្រឹត្តិការណ៍សហគមន៍ ២០កុម្ភៈ ដំបូងមានសាលាជាង១០០ ត្រូវបានសាលារាជធានីភ្នំពេញ និងក្រសួងសុខាភិបាលយកធ្វើជាមណ្ឌលចត្តាឡីស័ក និងមណ្ឌលព្យាបាលជំងឺកូវីដ-១៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡារាជធានីភ្នំពេញ បានមានប្រសាសន៍នៅរសៀលថ្ងៃទី៣ ខែកញ្ញានេះថា ដោយសារស្ថានភាពជំងឺកូវីដ-១៩មានភាពធូរស្រាលបានកាត់បន្ថយទីតាំងព្យាបាល និងទីតាំងធ្វើចត្តាឡីស័កមកនៅសល់ត្រឹម២៥សាលាវិញ ក្នុងនោះមណ្ឌលចត្តាឡ័ស័កចំនួន៥សាលារួមមាន ទី១ វិទ្យាល័យ ប៊ុន រ៉ានី ហ៊ុនសែន វត្តភ្នំ ទី២ សាលាបឋមសិក្សា អូហ្គុរ៉ាត្រកៀត ទី៣ សាលាបឋមសិក្សា និងអនុវិទ្យាល័យ ហ៊ុន សែន ព្រៃវែង ទី៤ សាលាបឋមសិក្សា អង្គបឹងចក និងទី៥ វិទ្យាល័យ ជា ស៊ីម ឈូកវ៉ា។

លោកបានបន្ថែមទៀតថា មណ្ឌលព្យាបាលជំងឺកូវីដ-១៩មានចំនួន៩ រួមមានទី១ សាលាបឋមសិក្សា និងអនុវិទ្យាល័យ ហ៊ុន សែន ពោធិ៍ចិនតុង ទី២ វិទ្យាល័យ ចំណេះទូទៅ និងបច្ចេកទេស ហ៊ុន សែន ជម្ពូវ័ន ទី៣ សាលាបឋមសិក្សា សុភមង្គល ទី៤ វិទ្យាល័យ ហ៊ុន សែន បុរី១០០ខ្នង ទី៥ វិទ្យាល័យ សម្ដេច ហ៊ុន សែនភ្នំពេញថ្មី ទី៦ វិទ្យាល័យ ជា ស៊ីម សាមគ្គី ទី៧ វិទ្យាល័យ កំបូល ទី៨ សាលាបឋមសិក្សា កំបូលនិងទី៩ សាលាបឋមសិក្សា និងអនុវិទ្យាល័យ សម្ដេចតេជោ ហ៊ុន សែន ដង្កោ។

លោកប្រធានមន្ទីរអប់រំ រាជធានីភ្នំពេញ បានបន្ថែមថា មណ្ឌលយកសំណាកចំនួន២សាលា ទី១ វិទ្យាល័យ បាក់ទូក និងទី២ សាលាបឋមសិក្សា កន្ទោក។ ចំណែកមណ្ឌលស្នាក់នៅរបស់គ្រូពេទ្យស្ម័គ្រចិត្តមានចំនួន៥សាលា ទី១ សាលាបឋមសិក្សា ទួលគោក ទី២ វិទ្យាល័យ ឥន្ទ្ររទេវី ទី៣ សាលាមត្តេយ្យសិក្សា ទួលគោក ទី៤ សាលាបឋមសិក្សា អង្គបឹងចក និងទី៥ សាលាបឋមសិក្សា កំបូល។

លោក ហែម ស៊ីណារ៉េត បានបញ្ជាក់ថា ក្រៅពីនេះក៏បានយកសាលារៀនចំនួន៤ធ្វើជាទីបញ្ជាការស្រាលរបស់រដ្ឋបាលខណ្ឌរួមមាន ទី១ សាលាបឋមសិក្សា បាក់ទូក ទី២ សាលាបឋមសិក្សា ច្បារអំពៅ១ ទី៣ វិទ្យាល័យ ទួលអំពិល និង៤ សាលាបឋមសិក្សា កែវ មុន្នី។

លោក ឃួង ស្រេង អភិបាលនៃគណៈអភិបាលរាជធានីភ្នំពេញ បានជំរុញឱ្យអាជ្ញាធរខណ្ឌទាំង១៤ និងអង្គភាពពាក់ព័ន្ធមួយចំនួនទៀត ត្រូវរៀបចំចាត់ចែងសំអាតអនាម័យ បរិស្ថាននៅក្នុងសាលានានានៅក្នុងមូលដ្ឋានរបស់ខ្លួនឱ្យបានស្អាត ដើម្បីត្រៀមបើកសាលារៀនឡើងវិញ ទៅតាមអនុសាសន៍ដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្រោយសិស្សានុសិស្ស ខកខានមិនបានចូលរៀនយូរណាស់ហើយ ដោយសារការរីករាលដាលជំងឺកូវីដ-១៩។

លោកអភិបាលបានជំរុញឱ្យអាជ្ញាធរខណ្ឌ និងស្ថាប័នពាក់ព័ន្ធ ត្រូវបញ្ជូនអ្នកជំងឺទៅតាមសាលារៀនមួយចំនួនត្រូវបានរដ្ឋបាលរាជធានីភ្នំពេញ និងក្រសួងសុខាភិបាលយកជាទីតាំងសម្រាប់ធ្វើជាកន្លែងចត្តាឡីស័ក និងធ្វើជាកន្លែងព្យាបាលជំងឺកូវីដ-១៩ ទៅដាក់នៅមណ្ឌលព្យាបាលផ្សេងវិញ ដូចជា នៅទីតាំងរៀបអាពាហ៍ពិពាហ៍ ស៊ូព្រីមៀរ សែនសុខ ជាដើម។

គួរបញ្ជាក់ថា កាលពីថ្ងៃទី៣១ ខែសីហា ឆ្នាំ២០២១កន្លងទៅនេះ សម្តេចតេជោ ហ៊ុន សែន បានចេញសារសម្លេងបន្ទាន់មួយ ដោយណែនាំឱ្យក្រសួងអប់រំ យុវជន និងកីឡា សហការជាមួយអាជ្ញាធរ រាជធានី ខេត្ត ដើម្បិពិនិត្យមើលលើការបើកសាលារៀនឡើងវិញ នៅតាមភូមិ ឃុំដែលមិនមានការឆ្លងជំងឺកូវីដ-១៩  និងកន្លែងដែលឆ្លងតិច ដោយមិនត្រូវរង់ចាំការបើកសាលារៀនព្រមគ្នានៅទូទាំងប្រទេសនោះឡើយ ប៉ុន្តែត្រូវរក្សាគម្លាតសុវត្ថិភាព និងគោរពតាមវិធានការសុខាភិបាលឱ្យបានខ្ជាប់ខ្ជួន៕

អត្ថបទ៖ សំអឿន

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម