ព័ត៌មានជាតិ

ស្រូវវស្សាជិត១៦,០០០ហិតា អាចនឹងងើបចេញពីផលប៉ះពាល់ដោយគ្រោះរាំងស្ងួត

បានផុស

៥ years មុន

នៅ

ថ្ងៃអាទិត្យ ៥ កញ្ញា ២០២១

ដោយ

ថ្ងៃទី៤ ខែកញ្ញា ចុងសប្តាហ៍នេះ នៅក្នុងដំណើរបំពេញការងារចុះពិនិត្យមើលស្ថានភាពទឹក នៅអាងម្កាក់ ទំនប់ទ្វារទឹកធារាសាស្ត្រ នៅក្នុងឃុំពង្រលើ ស្រុកជីក្រែង របស់លោក ទៀ សីហា អភិបាលខេត្តសៀមរាប សេចក្តីរាយការណ៍របស់លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទ ល្បឿនការងារបង្ករបង្កើនផលដំណាំស្រូវវស្សាឆ្នាំ២០២១នេះ បាន១៨៩ ៧២០ហិតា ស្មើនឹង ៩៩.៩៩%នៃផែនការ ក៏ប៉ុន្តែនៅក្នុងអំឡុងខែសីហានេះដែរ គ្រោះរាំងស្ងួតបានបង្កឲ្យមានផលប៉ះពាល់លើដំណាំស្រូវទាំងនោះជិត១៦ ០០០ហិកតា លើ៨ស្រុកក្នុងចំណោម១២ក្រុង-ស្រុក ស្មើនឹង៤១ឃុំ ៣២១ភូមិ ជាង១៤ ០០០ គ្រួសារ។ ក្នុងនេះដែរ ស្រុកជីក្រែងទទួលរងផលពាល់ច្រើនជាងគេស្មើនឹង ៦ ៦០០ហិកតា ក្នុងនេះស្រូវស្រាលលើផ្ទៃដី២ ៨៨០ហិតា ត្រូវទទួលរងនូវការខូចខាត ប្រជាកសិករប្រហែល ៣ ០០០គ្រួសារ រស់នៅលើ១២ឃុំ ១៣៣ភូមិ បានទទួលរងនូវការខូចខាតនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីរាយការណ៍របស់លោកប្រធានមន្ទីរកសិកម្មបានបង្ហាញថា ក្នុងអំឡុងដើមខែកញ្ញានេះ ខេត្តសៀមរាប មានភ្លៀងធ្លាក់ជាបន្តបន្ទាប់ ហើយបើស្ថានភាពបែបនេះ នៅតែមានបន្តទៀត ស្រូវស្រែជិត១៦ ០០០ហិកតា នឹងត្រូវបានងើបចេញពីផលប៉ះពាល់ ហើយផ្ទៃដីស្រូវស្រាលដែលខូចខាតនៅស្រុកជីក្រែង ជិត ៣ ០០០ហិកតា អាចនឹងមានលទ្ធភាព ស្តារដោយការសាបព្រួសឡើងវិញ ប្រហែលជាជិត២ ៣០០ហិកតា។ ការត្រៀមលក្ខណៈ ស្តារដំណាំស្រូវវស្សាចេញពីការខូចខាតសម្រាប់ឆ្នាំ២០២១នេះ ក្រសួងកសិកម្ម រុក្ខាប្រមាញ់ និងនេសាទ បានផ្តល់ស្រូវពូជសម្រាប់ខេត្តសៀមរាប ប្រមាណជា ២០០០តោន។

យ៉ាងណាក៏ដោយ លោកអភិបាលខេត្ត បានជម្រុញឲ្យមន្ត្រីជំនាញ ប្រើប្រាស់ឲ្យអស់លទ្ធភាព អាងទឹកធារាសាស្ត្រទំនប់ម្កាក់ ដែលមានវិសាលភាពគ្របដណ្តប់ទៅលើ៩ឃុំនៃស្រុកជីក្រែង ជាពិសេសនោះគឺការគ្រប់គ្រងចែកចាយទឹកដល់សហគមន៍ប្រកបដោយតម្លាភាព។

លោក នួន ច័ន្ទគ្រឹស្នា ប្រធានមន្ទីរធនធានទឹក និងឧត្តុនិយមខេត្តសៀមរាប បង្ហាញថា អាងទឹកទំនប់ម្កាក់អាចស្តុកទឹកបានប្រមាណជា ២០លានម៉ែត្រត្រីគុណ ដែលមានវិសាលភាពគ្របដណ្តប់ចំនួន៩ឃុំ លើ១២ឃុំរបស់ស្រុកជីក្រែង និងមានសមត្ថភាពស្រោចស្រពលើផ្ទៃដីស្រែប្រមាណ ២៥ ០០០ហិតា។ ឆ្នាំនេះប្រជាកសិករ បង្កបង្កើនផលស្រូវប្រាំងជាង ១ម៉ឺនហិតា និងធ្វើស្រែវស្សាជាង៣ម៉ឺនហិតា ដែលទំហំចែកចាយនេះ វាលើសពីសមត្ថភាពរបស់អាងម្កាក់ រួមទាំងមានជួបប្រទះគ្រោះរាំងស្ងួតបន្ថែមទៀត ទើបបញ្ហាផលប៉ះពាល់ស្រូវកណ្តាល-ស្រូវធ្ងន់ និងការខូចខាតផលស្រូវស្រាលត្រូវបានកើតឡើង។

លោកបន្ថែមឲ្យដឹងថា ១សប្តាហ៍ចុងក្រោយនេះ កំពស់ទឹកអាងម្កាក់ បានឡើងលើកូដបាតទ្វារទឹកប្រមាណ ៨៥០មីល្លីម៉ែត្រ និងសង្ឃឹមថា កំពស់ទឹកនេះនឹងបន្តមានកំណើនបន្ថែមទៀត សម្រាប់ការជួយសង្គ្រោះផលប៉ះពាល់៕

អត្ថបទ៖ គឿនវេត