អគារថ្មី នៃស្នងការដ្ឋាននគរបាលរាជធានីភ្នំពេញ នឹង​ត្រូវ​បញ្ចប់ការសាងសង់ នៅដើមឆ្នាំ ២០២២ខាងមុខ

សំណង់អគារថ្មី នៃស្នងការដ្ឋាន នគរបាលរាជធានីភ្នំពេញ​ ដែលបំពាក់ដោយឧបករណ៍ និងសម្ភារ:ទំនើបៗ នោះ នឹង​ត្រូវ​បញ្ចប់ការសាងសង់ នៅដើមឆ្នាំ២០២២ខាងមុខ។ នេះបើតាមការឲ្យដឹងពីលោកវរសេនីយ៍ឯក សាន សុខ​សីហា ជំនួយការស្នងការ និងជាអ្នកនាំពាក្យ នៃស្នងការដ្ឋាន នគរបាលរាជធានីភ្នំពេញ។

លោកវរសេនីយ៍ឯក សាន សុខសីហា​ បានឲ្យដឹងនៅថ្ងៃទី៧ ខែកញ្ញានេះថា លោកឧត្ដមសេនីយ៍ឯក ស ថេត អគ្គ​ស្នងការ​រង និងជាស្នងការ នៃស្នងការដ្ឋាន នគរបាលរាជធានីភ្នំពេញ តែងតែចុះត្រួតពិនិត្យជាប្រចាំ ចំពោះការសាង​សង់សំ​ណ​ង់​អគារថ្មីនេះ ដើម្បីធ្វើយ៉ាងណា ឲ្យបញ្ចប់ការសាងសង់ នៅដើមឆ្នាំ២០២២ ខាងមុខ។

អ្នកនាំពាក្យរូបនេះ បានឲ្យដឹងបន្តថា សំណង់អគារថ្មី នៃស្នងការដ្ឋាន នគរបាលរាជធានីភ្នំពេញ បានចាប់ ផ្ដើមសាង​សង់ កាលពីខែឧសភា ឆ្នាំ២០១៩មកម្លេះ ហើយការសាងសង់មានការយឺតយ៉ាវខ្លះ ដោយសារតែ ការរាតត្បាត នៃ​ជំងឺកូវីដ​-១៩ ព្រោះឧបករណ៍ និងសម្ភារៈខ្លះ ត្រូវបានបញ្ជាទិញពីក្រៅប្រទេស។ អគារនេះ មានកម្ពស់​ ៩ជាន់ និង​មានទំហំ ៤០ម x ៥០ម ហើយត្រូវបានបំពាក់ដោយឧបករណ៍ និងសម្ភារ:ទំនើបៗ និងមានគុណភាព ដើម្បីឲ្យ​សា​ក​​​​សម​​ជា​អគារថ្មី នៃស្នងការដ្ឋាន នគរបាលរាជធានីភ្នំពេញ៕

អត្ថបទ៖ ឃួន សុភ័ក្រ