ស្ត្រីវិជ្ជមាន ជំងឺកូវីដ-១៩​ សម្រាលកូនប្រុស ដោយសុវត្ថិភាព

ស្ត្រីម្នាក់ មានវិជ្ជមានជំងឺកូវីដ-១៩ បានសម្រាលបានកូនប្រុស ដោយសុវត្ថិភាពទាំងម្តាយ និងកូនក្នុងមណ្ឌលព្យាបាលវិទ្យាល័យ ហ៊ុន សែនភូមិថ្មី ស្ថិតនៅភូមិថ្មី សង្កាត់ឡាបានសៀក ក្រុងបានលុង ខេត្តរតនគិរី។

ករណីនេះជាលើកទី៥ហើយនៅក្នុងខេត្តរតនគិរី ដែលមានអ្នកជំងឺត្រូវបានក្រុមគ្រូពេទ្យជួយសម្រាលកូនបានជោគជ័យនៅមណ្ឌលព្យាបាល។

ស្រ្តីដែលក្រុមគ្រូពេទ្យ​ជួយសម្រាលកូន ដោយជោគជ័យមានឈ្មោះ សៀង ណាក់ អាយុ៣៥ឆ្នាំ ជនជាតិខ្មែរ រស់នៅភូមិ៣ ឃុំត្រពាំងក្រហម ស្រុកកូនមុំ ខេត្តរតនគិរី បានចូលមកសម្រាកព្យាបាលជំងឺកូវីដ-១៩ នៅថ្ងៃទី៤ ខែកញ្ញា ឆ្នាំ២០២១ ហើយបានឈឺពោះសម្រាលកូននៅវេលាម៉ោង៣ជិតភ្លឺ ថ្ងៃទី១៥ ខែកញ្ញា ឆ្នាំ២០២១នេះ។

ទាំងម្តាយ និងកូនមានសុខភាពល្អ និងត្រូវបានមើលថែទាំយ៉ាងយកចិត្តទុកដាក់ពីក្រុមគ្រូពេទ្យប្រចាំការនៅមណ្ឌលព្យាបាលផ្ទាល់។

ប្រជាពលរដ្ឋក្នុងខេត្តរតនគិរី ក៏ដូចជាក្រុម គ្រួសារ អ្នកជំងឺ បានសម្ដែងការគោរព កោតសរសើរ ចំពោះ ការតាំងចិត្តភាពអង់អាច ក្លាហានរបស់ក្រុមគ្រូពេទ្យជួរមុខ បានលះបង់ទាំងកម្លាំងកាយកម្លាំងចិត្ត ក្នុងការ បម្រើសេវាសុខភាព និងសង្គ្រោះប្រជាពលរដ្ឋក្នុងពេលមានជំងឺកូវីដ-១៩៕

អត្ថបទៈ វុទ្ធឦសាន