អគារមន្ទីរពេទ្យតម្លៃជាង ១ លានដុល្លារ បញ្ចប់ការ​សាងសង់​នៅចុងឆ្នាំនេះ

មន្ទីរពេទ្យបង្អែកស្រុកក្រូចឆ្មារថ្មីដែលមានតម្លៃជាង ១.៤លានដុល្លារអាមេរិក បំពាក់ដោយគ្រឿងបរិក្ខារទំនើបៗគ្រោងបញ្ចប់ការសាងសង់នៅចុងឆ្នាំ២០២១នេះ ដើម្បីផ្តល់សេវាជួនប្រជាពលរដ្ឋ។

លោកបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តត្បូងឃ្មុំដែលបានចុះពិនិត្យការដ្ឋាន​សាងសង់មន្ទីរពេទ្យបង្អែកស្រុកក្រូចឆ្មារនេះ កាលពីម្សិលមិញបានបញ្ជាក់ថា មន្ទីរពេទ្យបង្អែកស្រុកក្រូចឆ្មារនេះ ជាអំណោយរបស់សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុ នរ៉ានី ហ៊ុនសែន តាមរយៈលោកឧបនាយករដ្ឋមន្ត្រី ជា សុផារ៉ា ប្រធានក្រុមការងាររាជរដ្ឋាភិបាល ចុះជួយខេត្តត្បូងឃ្មុំ ដែលមានតម្លៃរហូតដល់១.៤លានដុល្លារ បំពាក់ដោយបរិក្ខារទំនើបៗ កំពុងដំណើរការសាងសង់បានប្រមាណជិត​៨០%​ហើយ ដែលគ្រោងបញ្ចប់ការសាងសង់នាអំឡុងចុងឆ្នាំ២០២១ខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ទីរពេទ្យបង្អែកស្រុកក្រូចឆ្មារដ៏ធំ និងទំនើបថ្មីស្រឡាងនេះ មានកម្ពស់​៤​ជាន់​ ទំហំ៤,១៣៧ម៉ែត្រក្រឡា សាងសង់លើផ្ទៃដីទំហំ១៣,២២៩ម៉ែត្រក្រឡា ខណៈមន្ទីរបង្អែកស្រុកក្រូចឆ្មារបង្កើតឡើងតាំងពីឆ្នាំ១៩៦៦ មកម្ល៉េះ៕

អត្ថបទ៖ សំអឿន