ព័ត៌មានជាតិ

វិស័យឧស្សាហកម្មឈានមុខគេនៅខេត្តកំពង់ស្ពឺគ្របដណ្ដប់ជាង ៤៧% នៃទំហំសេដ្ឋកិច្ចខេត្តទាំងមូល

បានផុស

១ year មុន

នៅ

ថ្ងៃពុធ ៩ កក្កដា ២០២៥

ដោយ

ខណៈកម្ពុជាជាប្រទេសពឹងផ្អែកលើវិស័យកសិកម្ម ដោយឡែកខេត្តកំពង់ស្ពឺដែលនៅមិនឆ្ងាយពីរាជធានីភ្នំពេញ វិស័យឧស្សាហកម្មជាវិស័យឈានមុខគេមានអត្រាគ្របដណ្តប់រហូតដល់ ៤៧% នៃទំហំសេដ្ឋកិច្ចខេត្តទាំងមូល។ នេះបើតាមការគូសបញ្ជាក់ពីលោក ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ។

ក្នុងឱកាសចូលរួម “សម្ពោធអគារសិក្សា អគារទីចាត់ការ ផ្ទះស្នាក់នៅគ្រូ និងសមិទ្ធផលនានានៅក្នុងខេត្តកំពង់ស្ពឺ” ក្រោមវត្តមានសម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា លោក ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺបានលើកពីភូមិសាស្ត្រខេត្តកំពង់ស្ពឺ និងវិស័យសក្ដានុពលដែលជំរុញការអភិវឌ្ឍសេដ្ឋកិច្ចរបស់ខេត្តកំពង់ស្ពឺ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ជាម ច័ន្ទសោភ័ណ បានគូសរំលេចពីវិស័យអាទិភាពធំៗចំនួន ៣ ដែលជាចលករយ៉ាងសំខាន់ក្នុងជំរុញសន្ទុះអភិវឌ្ឍសេដ្ឋកិច្ចខេត្តកំពង់ស្ពឺប្រកបដោយភាពវិជ្ជមាន ក្នុងនោះវិស័យឧស្សាហកម្មគ្របដណ្តប់ប្រមាណ ៤៧% វិស័យកសិកម្មប្រមាណ ៣១% និងសេវាកម្មប្រមាណ ២១%។

ផ្អែកលើកត្តាភូមិសាស្ត្រអំណោយផល ការអភិវឌ្ឍហេដ្ឋារចនាសម្ព័ន្ធ ផ្លូវគមនាគមន៍មានភាពប្រទាក់ក្រឡាគ្នា បានបង្កលក្ខណៈអំណោយផលយ៉ាងល្អដល់វិស័យកសិកម្ម វិស័យកសិឧស្សាហកម្ម ទេសចរណ៍ធម្មជាតិ-និងវិស័យឧស្សាហកម្ម មានការរីកចម្រើនជាបន្តបន្ទាប់។ នេះបើតាម លោក ជាម ច័ន្ទសោភ័ណ។

ទំហំសេដ្ឋកិច្ចខេត្តមានប្រមាណជាង ១៩០០ លានដុល្លាអាមេរិក មានកំណើន ៥,៧% និងផលិតផលសរុបសម្រាប់មនុស្សម្នាក់ៗ (GDP Per Capita) មានប្រមាណ ២,០០០ ដុល្លារអាមេរិក ក្នុងឆ្នាំ២០២៣។

បច្ចុប្បន្នខេត្តមានតំបន់សេដ្ឋកិច្ចពិសេសកំពុងដំណើរការចំនួន ១ និង ៣ តំបន់ទៀតកំពុងរៀបចំនីតិវិធីស្នើសុំ រួមទាំងមានសួនឧស្សាហកម្មសរុបចំនួន ៧ កន្លែង, មានរោងចក្រសហគ្រាស គ្រឹះស្ថានសរុប ១.៤៤២ កន្លែង មានកម្មករនិយោជិតសរុប ២៥៣ ៩៤៦នាក់។

បើតាមលោកអភិបាលខេត្ត ផ្អែកតាមរបាយការណ៍ពីក្រុមប្រឹក្សាអភិវឌ្ឍន៍កម្ពុជា ក្នុងឆ្នាំ ២០២៤ ខេត្តកំពង់ស្ពឺទទួលបានការវិនិយោគច្រើនជាងគេចំណាត់ថ្នាក់លេខ ១ លើទំហំទុនវិនិយោគលើសពី ៥ លានដុល្លារ៕