ព័ត៌មានជាតិ

ខេត្តព្រៃវែងសេសសល់ប្រាសាទពីរ សាងសង់មុនសម័យអង្គរ

បានផុស

៥ years មុន

នៅ

ថ្ងៃចន្ទ ២០ កញ្ញា ២០២១

ដោយ

ខេត្តព្រៃវែងមានសំណង់បេតិកភណ្ឌប្រាសាទបុរាណចំនួនពីរនៅសេសសល់ រួមទាំងទួលបុរាណជាង ៤០០ សាងសង់មុនសម័យអង្គរ។

លោក អ៊ុក សេរីវុធ ប្រធានមន្ទីរវប្បធម៌ខេត្តព្រៃវែងបានឲ្យដឹងថា ទូទាំងខេត្តព្រៃវែងនៅសល់សំណង់ប្រាសាទបុរាណតែពីរប៉ុណ្ណោះ និងទួលបុរាណជាង ៤០០ ខ្លះសល់តែគ្រឹះ និងខ្លះបាត់រូបរាងអស់ហើយ។

ប្រាសាទដែលនៅសេសសល់រូបរាងគឺប្រាសាទព្រះវិហារច័ន្ទ និងប្រាសាទចៅស្រុក។ ប្រាសាទទាំងពីរនេះកសាងឡើងមុនសម័យអង្គរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមលោកប្រធានមន្ទីរ សំណង់ប្រាសាទទាំងពីរនៅសល់រូបរាង ៧០ ទៅ ៨០ ភាគរយ ហើយតែងតែមានភ្ញៀវមកទស្សនាជាហូរហែ មុនពេលផ្ទុះរាលដាលជំងឺកូវីដ។

ជាក់ស្ដែងប្រាសាទព្រះវិហារច័ន្ទ ស្ថិតនៅក្នុងភូមិរោងដំរី ឃុំជើងភ្នំ ស្រុកបាភ្នំ ខេត្តព្រៃវែង។ ប្រាសាទនេះមានខឿនធ្វើអំពីថ្មបាយក្រៀម កសាងឡើងមុនសម័យអង្គរចន្លោះពីសតវត្សទី១ ដល់ចុងសតវត្សទី៦។

ចំណែកប្រាសាទចុងស្រុក (អ្នកស្រុកហៅព្រៃដើមស្រុក ឬព្រះធាតុ) មានទីតាំងស្ថិតនៅភូមិបឹងជ័រ ឃុំព្រៃទឹង ស្រុកស៊ីធរកណ្ដាល ខេត្តព្រៃវែង។ ប្រាសាទចុងស្រុក មានចម្ងាយប្រហែល ៣៨គីឡូម៉ែត្រ ពីទីរួមខេត្តព្រៃវែង។ ប្រាសាទនេះមានសភាពទ្រុឌទ្រោមធ្វើពីឥដ្ឋ និងថ្មភក់ កសាងឡើងនៅសតវត្យរ៍ទី៧ មានឬសដើមជ្រៃព័ទ្ធតួប្រាសាទ។ នៅក្នុងប្រាសាទ ក៏មានរូបព្រះគោមួយអង្គធ្វើអំពីថ្មភក់ មានអំណាចខ្លាំងពូកែជាទីគោរពបូជា។

ក្រៅពីនេះបើតាមលោក អ៊ុក សេរីវុធ នៅក្រុងព្រៃវែងមានទួលបុរាណមួយគឺទួលបារាយណ៍អណ្ដែត ជាទីតាំងសម្រាប់បន់ស្រន់សម្រាប់អ្នកស្រុក ហើយអាជ្ញាធរក៏បានរៀបចំក្លាយជារមណីយដ្ឋានសម្រាប់ភ្ញៀវទេសចរណ៍៕

អត្ថបទ៖ ប៊ុណ្ណារ៉ា