ផ្ទុះកំប៉ុងហ្គាសនៅផ្ទះបាយ បង្កជាអណ្តាតភ្លើងឆាបឆេះផ្ទះ១ខ្នង អស់គ្មានសល់

ផ្ទះ១ខ្នង និងសម្ភារ:ក្នុងផ្ទះមួយចំនួនទៀត ត្រូវបានអគ្គិភ័យឆាបឆេះអស់គ្មានសល់ ដែលបង្កឡើងដោយសារការ ផ្ទុះកំប៉ុងហ្គាសនៅផ្ទះបាយ បង្កជាអណ្តាតភ្លើងឆាបឆេះតែម្តង។ ហេតុការណ៍គ្រោះអគ្គិភ័យនេះ បានកើតឡើង នៅវេលាម៉ោង ១០ និង៥នាទី យប់ថ្ងៃទី១៩ ខែកញ្ញា ឆ្នាំ២០២១ នៅចំណុចក្រុមទី២៤ ភូមិបោះពោធិ៍ ឃុំអូរដំបង១ ស្រុកសង្កែ ខេត្តបាត់ដំបង។

សមត្ថកិច្ច បានឲ្យដឹងថា ក្នុងករណីគ្រោះអគ្គិភ័នេះ បានបណ្តាលឲ្យឆាបឆេះផ្ទះ១ខ្នង ទំហំ៧មx៩ម ធ្វើពីឈើលើថ្មក្រោម ប្រក់ស័ង្កសី។ ម្ចាស់ផ្ទះមានឈ្មោះ អ៊ិច សារី ភេទប្រុស អាយុ៦៣ឆ្នាំ រស់នៅក្នុងភូមិឃុំ កើតហេតុខាងលើ។ក្នុងនោះ ក៏បានធ្វើឲ្យខូចខាតសម្ភារៈប្រើប្រាស់ ក្នុងផ្ទះទាំងស្រុងផងដែរ។ ចំពោះមូលហេតុ នៃការឆាបឆេះនេះ បណ្តាល មកពីផ្ទុះកំប៉ុងហ្គាសតូចក្នុងផ្ទះបាយ។

ក្រោយទទួលបានសេចក្តីរាយការណ៍ភ្លាមៗ សមត្ថកិច្ចបានចេញឡានពន្លត់អគ្គិភ័យ១គ្រឿង និងប្រើប្រាស់ទឹកអស់ចំនួន២ឡាន ទើបគ្រប់គ្រងស្ថានភាពបាន មិនរាលដាលដល់ផ្ទះអ្នកដទៃ ហើយមិនបង្កឲ្យមានគ្រោះថ្នាក់ដល់មនុស្សណាម្នាក់ឡើយ៕

អត្ថបទ៖ សៅ សារិទ្ធ