អ្នករត់ឡានតាក់ស៊ី និយាយថា ភ្ជុំបិណ្ឌឆ្នាំនេះ មិនឡើងថ្លៃឈ្នួលដឹកអ្នកដំណើរនោះទេ

អ្នករត់តាក់ស៊ី នៅតាមបណ្តោយផ្លូវជាតិលេខ១ ពីរាជធានីភ្នំពេញ ទៅខេត្តស្វាយរៀង បាននិយាយថា ពួកគេមិនមានគម្រោងឡើងថ្លៃ ក្នុងការដឹកជញ្ជូនភ្ញៀវក្នុងស្រុក ចេញពីភ្នំពេញទៅលេងស្រុកកំណើត នាថ្ងៃឈប់សម្រាក ៣ថ្ងៃ នៃពិធីបុណ្យភ្ជុំបិណ្ឌនោះទេ។

លោក ប៊ុន ហេង អ្នករត់តាក់ស៊ី ពីភ្នំពេញទៅខេត្តស្វាយរៀង បានឲ្យដឹងនៅថ្ងៃទី៣០ ខែកញ្ញានេះថា ចំពោះរូបលោក​ផ្ទាល់ គឺពុំមានគម្រោងឡើងថ្លៃឈ្នួល ដឹកអ្នកដំណើទៅលេងស្រុក នាថ្ងៃឈប់សម្រាកខាងមុខនេះឡើយ គឺធ្វើយ៉ាងណាឲ្យតែមានម៉ូយដឹក គ្រាន់បើជាងអត់។

លោក ហេង បញ្ជាក់ទៀតថា តម្លៃដឹកពីភ្នំពេញ ទៅខេត្តស្វាយរៀង គឺម្នាក់ថ្លៃ ២០០០០រៀល ចំពោះរថយន្តតូចហើយរថយន្ត ១៥កៅអីថ្លៃ ១៥០០០រៀល។

ទាក់ទង និងការធ្វើដំណើចេញទៅស្រុកកំណើត របស់ប្រជាពលរដ្ឋនេះដែរ លោកវរសេនីយ៍ទោ ឯក សារ៉ន អធិការរងនគរបាលខណ្ឌច្បារអំពៅ ទទួលបន្ទុកសណ្តាប់ធ្នាប់ ចរាចរណ៍ បានឲ្យដឹងថា រាល់ថ្ងៃបុណ្យជាតិ ពិសេសគឺថ្ងៃឈប់សម្រាក គឺភាគច្រើនបងប្អូនកម្មករ ច្រើននាំគ្នាជិះម៉ូតូឌុបគ្នា ទៅស្រុកកំណើត។ ចំពោះរថយន្តតាក់ស៊ី គឺច្រើនតែមនុស្សចាស់ៗ និងក្មេងតូចៗជិះប៉ុណ្ណោះ ហើយរថយន្តតាក់ស៊ី ចេញពីច្បារអំពៅទៅតាមបណ្តាខេត្តវិញ គឺមកដល់ពេលនេះ មានប្រមាណជាង ១០គ្រឿងប៉ុណ្ណោះ។ ក្រៅពីនេះពួកគេ ប្រកបមុខរបរផ្សេងៗ អស់ហើយ ព្រោះតែមុខរបររត់តាក់ស៊ី មិនសូវមានភ្ញៀវ។

លោកអធិការរង បានបន្តថា អ្នកដំណើរដែលចេញទៅស្រុកកំណើត គឺច្រើនចេញនៅថ្ងៃកៀកបុណ្យភ្ជុំធំឯណោះ។ចំពោះសណ្តាប់ធ្នាប់របៀបរៀបរយវិញ គឺបងប្អូនអ្នកដំណើរ បានគោរពតាមការណែនាំ របស់សមត្ថកិច្ចល្អណាស់៕

អត្ថបទ៖ នរា