ព័ត៌មានជាតិ

ស្នងការនគរបាលខេត្ត ផ្តើមបើកវេទិកាជួបជាមួយប្រជាពលរដ្ឋ ក្រោយលោក ម៉ៅ ធនិន មកកាន់តំណែងជាអភិបាលខេត្តកំពត

បានផុស

៣ years មុន

នៅ

ថ្ងៃសៅរ៍ ១៦ តុលា ២០២១

ដោយ

លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត នៅថ្ងៃទី១៦ ខែតុលា ឆ្នាំ២០២១ នេះ បានអះអាងថា នឹងបើកវេទិកាជាមួយប្រជាពលរដ្ឋនៅសង្កាត់ក្រាំងអំពិល ក្រុងកំពត នៅវេលាម៉ោង៣រសៀល ថ្ងៃទី១៩ ខែតុលា ឆ្នាំ២០២១ ខាងមុខ នៅពហុកីឡាដ្ឋានខេត្តកំពត ដើម្បីស្វែងរកដំណោះស្រាយផ្សេងៗ ជាពិសេសទាក់ទងគោលនយោបាយភូមិ ឃុំ មានសុវត្ថិភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឧត្តមសេនីយ៍ទោ ម៉ៅ ច័ន្ទមធុរិទ្ធ ធ្លាប់បានប្រកាសដែរថា លោកនឹងរៀបចំបង្កើតនូវកម្មវិធី ដើម្បីចុះជួបបងប្អូនប្រជាពលរដ្ឋតាមបណ្តាឃុំសង្កាត់ទាំង៩៣ ដើម្បីស្វែងរកបញ្ហាផ្សេងៗនិងដំណោះស្រាយជូនបងប្អូនប្រជាពលរដ្ឋ និងធ្វើអោយគោលនយោបាយភូមិ ឃុំ មានសុវត្ថិភាពកាន់តែមានប្រសិទ្ធភាពខ្ពស់ ។ លោកថា មេប៉ុស្តិ៍ទាំងអស់ និងត្រូវមានវត្តមានចូលរួមក្នុងវេទិការនេះ ពីព្រោះលោកនឹងចុះធ្វើវេទិការនេះដោយផ្ទាល់ រួមទាំងជំនាញពាក់ព័ន្ធផ្សេងៗទៀត ហើយក្នុងករណីមេប៉ុស្តិ៍ណាមិនអាចយកបេះដូងពីប្រជាពលរដ្ឋក្នុងមូលដ្ឋានរបស់ខ្លួនបានទេ ដំណោះស្រាយ គឺត្រូវយកអ្នកផ្សេងមកជំនួស។

ជាការកត់សម្គាល់ គម្រោងបើកវេទិកាជាមួយប្រជាពលរដ្ឋ លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពតនេះ បានកើតឡើងក្រោយពីលលេចលឺព័ត៌មានពីការផ្លាស់ប្តូរតំណែងអភិបាលខេត្តមួយចំនួន ហើយលោក ម៉ៅ ធនិន ដែលគេដឹងថា ជាមន្ត្រីម្នាក់ពូកែខាងដោះស្រាយបញ្ហាក្រៅប្រព័ន្ធតុលាការជូនប្រជាពលរដ្ឋនោះ នឹងទៅកាន់ជាអភិបាលខេត្តកំពតជំនួសលោក ជាវ តាយ។

លោកឧត្តមសេនីយ៍ទោ ម៉ៅ ច័ន្ទមធុរិទ្ធ ធ្លាប់បានសរសេរលើហ្វេសប៊ុករបស់ខ្លួនថា លោកពិតជាសប្បាយរីករាយ ដែលបានធ្វើការងារជូនលោក ម៉ៅ ធនិន អភិបាលខេត្តកំពតថ្មី ហើយសង្ឃឹមថា លោកនឹងទទួលបាននូវបទពិសោធន៍ល្អៗ ដើម្បីធ្វើជាត្រីវិស័យក្នុងការពង្រឹងការងារការពារសន្តិសុខ សណ្តាប់ធ្នាប់ ក្នុងខេត្តកំពត អោយកាន់តែប្រសើរឡើងថែមទៀត។

គួររំលឹកថា ថ្មីៗនេះរាជរដ្ឋាភិបាលបានសម្រេចផ្លាស់ប្តូរតំណែងអភិបាលខេត្តចំនួន៧រូប ហើយក្នុងនោះក៏មានលោក ម៉ៅ ធនិន អតីតអភិបាលខេត្តពោធិ៍សាត់ផងដែរ ដែលលោក ម៉ៅ ធនិន ជាអភិបាលខេត្តមួយរូប តែងតែបានជួយដោះស្រាយបញ្ហាជូនប្រជាពលរដ្ឋក្រៅប្រព័ន្ធតុលាការបានយ៉ាងច្រើន ចាប់ពីពេលដែលលោកឡើងកាន់តំណែងជាអភិបាលខេត្តពោធិ៍សាត់ ហើយក៏ទទួលបានការសាទរ និងគោរពស្រឡាញ់យ៉ាងខ្លាំងពីប្រជាពលរដ្ឋ។

សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅក្នុងពិធីប្រកាសចូលកាន់តំណែងអភិបាល នៃគណៈអភិបាលខេត្តបាត់ដំបង កាលពីថ្ងៃទី១១ ខែតុលា បានស្នើសុំឱ្យមន្ត្រីថ្នាក់ដឹកនាំមូលដ្ឋាន តាមរាជធានី-ខេត្តនីមួយៗរៀបចំក្រុមការងារ និងយកចិត្តទុកដាក់លើការងារដោះស្រាយជម្លោះ “ក្រៅប្រព័ន្ធតុលាការ” ដោយសិក្សាតាមគំរូលោក ម៉ៅ ធនិន។

បើតាមសម្តេច ស ខេង ការងារដោះស្រាយជម្លោះ “ក្រៅប្រព័ន្ធតុលាការ” មិនមែនដោយសារមិនទុកចិត្តរដ្ឋបាលនៅថ្នាក់ក្រោមនោះទេ តែវាជាជម្រើសរើសរបស់ប្រជាពលរដ្ឋ ដើម្បីដោះស្រាយជម្លោះ និងដើម្បីទទួលបានសំណើពីប្រជាពលរដ្ឋយកមកដោះស្រាយជូនពួកគាត់។

សម្តេចក្រឡាហោមបញ្ជាក់ថា “អាជ្ញាធរយើងត្រូវតែហ៊ានប្រឡូកក្នុងការដោះស្រាយជម្លោះ ម៉ៅ ធនិន គាត់មានវិធីដោះស្រាយមួយ សុំឱ្យសិក្សាមើល ចំណុចណា ដែលជាបទពិសោធន៍យើងក៏គួរយកមករៀន ដែលបទពិសោធន៍ដោះស្រាយ”។

ជាមួយគ្នានោះ សម្តេច ស ខេង ក៏បានស្នើសុំឱ្យអាជ្ញាធរមូលដ្ឋាន កុំបិទមតិរបស់ប្រជាពលរដ្ឋ ហើយទុកឱ្យប្រជាពលរដ្ឋមានមតិយោបល់ក្នុងន័យស្ថាបនា និងត្រូវទទួលខុសត្រូវ៕

ដោយ ៖ កោះកែវ

Related Topics:ខេត្តកំពត