ចាប់ខ្លួនមេខ្យល់បាន​ ធ្លាយ​តម្លៃនាំពលករ​ចូលទៅ​ថៃ

ខេត្តបាត់ដំបង÷ ពលករជិត៦០នាក់ក្នុងនោះរកឃើញមុខមេខ្យល់១នាក់ ​កំពុងនាំគ្នាសម្រុកលួចឆ្លងដែនចូលទឹកដីថៃដោយខុសច្បាប់ និង​ត្រូវបាន​សមត្ថកិច្ចចម្រុះចុះប្រតិបត្តិការបង្ក្រាបទប់ស្កាត់បានទាន់ពេលវេលា។

ការឃាត់ខ្លួនធ្វើឡើងរវាងកម្លាំងវរសេនាតូចនគរបាលការពារព្រំដែន​គោក​លេខ​៨១៩ ដឹកនាំដោយលោកវរ:សេនីយ៍ឯកម៉ង់ ស៊ី ជាមួយ​កម្លាំងកងពលពលតូចថ្មើជើងលេខ៥៣ រួមទាំងកងកម្លាំង​វរៈ​លេខ​​៥០៤ផង។

លោកវរ:សេនីយ៍ ម៉ង់ សុី​បាន​ឲ្យ​ដឹង​ថា កម្លាំងចម្រុះបង្ក្រាបនិងឃាត់ខ្លួនពលករ​ដែល​​លួច​ឆ្លងដែន​ទៅថៃ​កាលពី​ថ្ងៃ​ទី​១៦​ខែតុលាឆ្នាំ២០២១ ត្រង់ចំណុចភូមិសាស្ត្រក្នុងឃុំបឹងរាំង ស្រុកកំរៀងខេត្តបាត់ដំបង សរុបចំនួន៥៩នាក់ក្នុងនោះ​មាន​មេខ្យល់១នាក់ផងឈ្មោះឈន ត្រាន់ ភេទប្រុសអាយុ៣៩ឆ្នាំ រស់នៅ ភូមិបឹងរាំង ឃុំបឹងរាំង ស្រុកកំរៀងដែលគេស្គាល់ថាជាមុខសញ្ញាមេខ្យល់ យ៉ាងសកម្មហើយធ្លាប់យកថ្លៃនាំផ្លូវពីពលរដ្ឋជាពលកររហូតចាប់ពី ៥០០០បាតទៅ៧០០០បាតក្នុងម្នាក់។

តាមសមត្ថកិច្ចស្រង់សម្តីជនសង្ស័យជាមេខ្យល់ឈ្មោះឈន ត្រាន់បានសារភាពប្រាប់សមត្ថកិច្ចថា ខ្លួនពិតជាទទួលស្គាល់កំហុសបាននាំពលករខ្មែរ លបលួចឆ្លងដែនដោយខុសច្បាប់ចូលក្នុងទឹកដីថៃពិតប្រាកដមែន ប៉ុន្តែខ្លួនគ្រាន់តែស៊ីឈ្មោះ​”ឡេក”ប៉ុណ្ណោះដែលខ្លួនបានកម្រៃជើងសារក្នុងម្នាក់ៗពីពលករចំនួន១០០០បាត។

បើទោះចម្លើយមេខ្យល់បែបណាក្នុងករណីខាងលើ បច្ចុប្បន្នសមត្ថកិច្ចនគរបាលជំនាញ បាន​រៀបចំកសាងសំណុំរឿងដើម្បីបញ្ជូនមេខ្យល់១នាក់ខាងលើអនុវត្តតាមនីតិវិធី៕

អត្ថបទ៖ សៅ សារិទ្ធ