លោក វ៉ី សំណាង ៖ ស្ថានភាពទឹកស្ទឹងព្រែកត្នោត ក្នុងភូមិសាស្រ្ដខេត្តកំពង់ស្ពឺ ស្រកចុះជិត ២០សង់ទីម៉ែត្រហើយ

អភិបាលខេត្តកំពង់ស្ពឺ បានឲ្យដឹងថា គិតត្រឹមរសៀលថ្ងៃទី២៦ ខែតុលានេះ ស្ថានភាពទឹកស្ទឹងព្រែកត្នោតក្នុងភូមិ​សា​ស្រ្ដខេត្តកំពង់ស្ពឺ បានស្រកចុះជិត ២០សង់ទីម៉ែត្រហើយ។

លោក វ៉ី សំណាង អភិបាល នៃគណៈអភិបាលខេត្តកំពង់ស្ពឺ បានសរសេរនៅលើគណនីហ្វេសប៊ុក របស់លោក​រសៀល​ថ្ងៃនេះថា និយាយជារួមយើងអាចសន្និដ្ឋានបានថា ប្រសិនបើគ្មានភ្លៀងនៅផ្នែកខាងលើ ក្នុងចន្លោះពីមួយថ្ងៃ ទៅពីរថ្ងៃទៀត ស្ថានភាពទឹកនឹងវិលទៅរក សភាពធម្មតាវិញហើយ។ ប៉ុន្តែបើតាមការជូនដំណឹង របស់ក្រសួងធនធានទឹក និងឧតុនិយម បានបញ្ជាក់ថា នៅថ្ងៃទី២៧ តុលា អាចមានព្យុះធំមួយ នឹងមកដល់ព្រះរាជាណាចក្រកម្ពុជាយើងទៀត។

លោក វ៉ី សំណាង បានអំពាវនាវដល់ប្រជាពលរដ្ឋ ដែលរស់នៅតាមបណ្ដោយសន្តរស្ទឹងព្រែកត្នោត ជាពិសេសអ្នករស់ នៅផ្នែកខាងក្រោម សូមមេត្តាប្រុងប្រយ័ត្នឲ្យបានខ្ពស់ ដើម្បីជៀសវាងនូវគ្រោះថ្នាក់ ដែលអាចកើតឡើងជាយថាហេតុ៕