ផ្លូវ​លំជនបទ ក្លាយ​ជា​ទីលាន​ចាក់​សំរាម អាជ្ញាធរ​ណែនាំច្រើន​ដង​ នៅ​តែ​គ្មានប្រសិទ្ធភាព

អ្នកម៉ៅការប្រមូលសំរាម ដឹកយកទៅចាក់បង្ហៀរពេញផ្លូវ ធំក្លិនអសោច ធ្វើឲ្យប៉ះពាល់ដល់សុខភាពប្រជាពលរដ្ឋរស់តំបន់នោះ ដោយមិនគោរពទៅតាមអាជ្ញាធរបានកំណត់ទីតាំងឱ្យចាក់។     

ប្រជាពលរដ្ឋនៅភូមិសាស្ត្រផ្ទះ ១០០ ខ្នង នៅថ្ងៃទី០៥វិច្ឆិកា បាននាំគ្នាទទូចសុំឲ្យអាជ្ញាធរពាក់ព័ន្ធ ចុះពិនិត្យមើលតំបន់ចាក់សំរាមនេះផង ព្រោះបច្ចុប្បន្នគំនរសំរាមពោរពេញទៅដោយភាពកខ្វក់ ប៉ះពាល់ផ្នែកបរិស្ថានយ៉ាងធ្ងន់ធ្ងរ។

ពួកគាត់លើកឡើងថា៖ ជាពិសេសភ្ញៀវទេសចរណ៍ធ្វើដំណើរតាមផ្លូវជាតិលេខ ០៧ ចាប់ពីស្ទឹងត្រែងទៅព្រំប្រទល់ប្រទេសឡាវ បានរងនូវក្លិនអាសោចិ៍ពីគំនរសំរាមនេះ ក្នុងពេលដែលអ្នកម៉ាវការប្រមូលសំរាម គ្មានការទទួលខុសត្រូវចំពោះកាតព្វកិច្ចរបស់ខ្លួនឡើយ។   

លោកវាន់ ថុន ប្រជាពលរដ្ឋ រស់នៅភូមិគីឡូប្រាំបីបានបញ្ជាក់ថា ពួកគាត់រងនូវក្លិនស្អុយនេះជាច្រើនខែឆ្នាំមកហើយ ដោយសារតែក្រុម អ្នកម៉ាវការប្រមូលសំរាមរបស់លោកជា គួង មិនគោរពទៅតាមអាជ្ញាធរកំណត់ទីតាំងឲ្យចាក់ចេះតែចាក់់បន្តបន្តមកបង្ហៀរស្ទើរតែពេញផ្លូវលំនិងជិតដល់ផ្លូវជាតិលេខ ០៧ទៅហើយ។   

លោកបន្តថា ភាពគ្មានការទទួលខុសត្រូវនេះបានធ្វើឲ្យប៉ះពាល់ដល់សុខភាពរស់នៅរបស់ប្រជាពលរដ្ឋ ដោយសារក្លិនស្អុយជះមកតាមខ្យល់និងរុយទាំងហ្វូងហើរមករោមស្ទើរតែហូបបាយក៏ពុំបាន។        

បញ្ហាប្រឈមនេះ លោកស្នើសុំឲ្យស្ថាប័នពាក់ព័ន្ធនៅក្នុងខេត្តស្ទឹងត្រែងពិនិត្យមើលនិង​ធ្វើការផ្លាស់ប្ដូរ ក្រុមអ្នកប្រមូលសំរាមនេះចេញពីខេត្តស្ទឹងត្រែងតែម្ដង ដើម្បីបញ្ចៀសនូវភាពទទួលខុសត្រូវ។   

ទាក់ទងនឹងបញ្ហាខាងលើនេះ អ្នកសារព័ត៌មានបានទាក់ទងទៅលោកជា គួងអ្នកទទួលម៉ៅការដឹកសំរាមចេញក្នុងខេត្តស្ទឹងត្រែង ចូលហើយតែគ្មានអ្នកទទួល។       

ជាមួយគ្នានេះលោកសាយ កុសល អភិបាលក្រុងស្ទឹងត្រែងធ្លាប់បានបញ្ជាក់ថា ក្រុមអ្នកម៉ាវការប្រមូលសំរាមនេះ លោកបានធ្វើការណែនាំជារឿយៗរួចមកហើយ តែមិនយកការណែនាំទៅអនុវត្តនោះទេ បែរជាផ្គើនហើយនៅតែបន្តចាក់សំរាមរាយប៉ាយ នៅទីតាំងចាក់សំរាមនោះគ្មានការទទួលខុសត្រូវចំពោះការងាររបស់ខ្លួន។       

លោកអភិបាលក្រុងបានបន្តថា បញ្ហាប្រឈមនេះ អាជ្ញាធរក្រុងនឹងប្រជុំគណៈបញ្ជាការឯកភាពក្រុងនិងអនុវត្តតាមការស្នើសុំរបស់ប្រជាពលរដ្ឋ ហើយធ្វើលិខិតស្នើសុំទៅគណអភិបាលខេត្ត ដើម្បីធ្វើការផ្លាស់ប្ដូរក្រុមអ្នកប្រមូលសំរាមនេះចេញ ដោយអនុវត្តទៅតាមគោលការណ៍ច្បាប់អន្តរក្រសួង ស្ដីពីបរិស្ថានដើម្បីលើកស្ទួយសោភណ្ឌភាពទីក្រុងស្អាត ឈានទៅលើកកម្ពស់ សុខភាពរស់នៅរបស់ប្រជាពលរដ្ឋ។     

ក្រុមអ្នកម៉ាវការប្រមូលសំរាមនៅក្រុងស្ទឹងត្រែងនេះ ប្រជាពលរដ្ឋនៅក្នុងក្រុងមិនពេញចិត្តឡើយ ដោយសារតែសំរាម ទុកគរនៅតាមមុខផ្ទះ និងនៅតាមទីតាំងផ្សេងៗ ពីរឬបីថ្ងៃទើបប្រមូលម្ដង ជួនកាលមួយសប្តាហ៍ក៏មានដែរទុកឲ្យសំរាមនោះស្អុយរលួយជះក្លិនអាក្រក់ប៉ះពាល់ដល់សុខភាពសាធារណៈ៕

អត្ថបទ៖ ងិនលីម