ក្រសួង​ប្រកាស​លទ្ធផល​ចុះពិនិត្យ​ទីតាំង​ទន្ទ្រាន​ដីព្រៃលិច​ទឹក​ ក្នុង​ខេត្ត​ពោធិ៍សាត់​

ក្រសួងរៀបចំដែនដី នគរូបនីយកម្ម និងសំណង់ នៅថ្ងៃទី ៥ ខែវិច្ឆិកា ឆ្នាំ ២០២១ បានប្រកាសលទ្ធផលនៃការចុះ ពិនិត្យទីតាំងដីដែលត្រូវបានទន្ទ្រានក្នុងដែនព្រៃលិចទឹកនៃតំបន់បឹងទន្លេសាបស្ថិតក្នុងភូមិសាស្ត្រខេត្តពោធិ៍សាត់។

ប្រតិភូ ក្រុមការងារអន្តរក្រសួង បានចេញវិធានការឱ្យរដ្ឋបាលខេត្តពោធិ៍សាត់ ចេញលិខិតណែនាំទៅអាជ្ញាធរស្រុក ឃុំ បញ្ឈប់ការពិនិត្យ បញ្ជាក់លើលិខិតសុំកាន់កាប់ដីក្នុងដែនព្រៃលិចទឹក ព្រមទាំងចេញលិខិតបដិសេធ លើរាល់លិខិតដែលបានចេញរួចពីមុនមក និងចាត់វិធានការបញ្ឈប់ការចូលទន្ទ្រានដីដែនព្រៃលិចទឹកបន្តទៀត និងធ្វើអត្តសញ្ញាណអ្នកដែលបានចូលទន្ទ្រាន ដើម្បីធ្វើការដកហូតដី និងចាត់វិធានការផ្លូវច្បាប់ កសាងសំណុំរឿងបញ្ជូនទៅតុលាការ។

ទន្ទឹមនឹងវិធានការផ្លូវច្បាប់ ជនល្មើសត្រូវដាំដើមឈើឡើងវិញ លើផ្ទៃដីដែលបានទន្ទ្រាន ហើយកងរាជអាវុធហត្ថត្រូវចាត់កម្លាំងចុះល្បាតតាមគោលដៅ ដើម្បីទប់ស្កាត់ការទន្ទា្រនដីព្រៃលិចទឹក និងចាត់វិធានការផ្លូវច្បាប់។

ដោយឡែកចំពោះប្រជាពលរដ្ឋដែលបានដាំដំណាំ ពិសេសដំណាំស្រូវ ត្រូវទុកពេលឱ្យប្រមូលផលស្រូវ រួចស្នើធ្វើលិខិតទទួលកំហុស និងប្រគល់ដីព្រៃលិចទឹកជូនរដ្ឋវិញ៕