មកដឹងតម្លៃគ្រឿងសមុទ្រ លក់នៅខេត្តកែប និងកំពត នាដើមសប្ដាហ៍នេះ

បើទោះជាថ្ងៃដើមសប្តាហ៍ ពុំសូវមានក្រុមភ្ញៀវទៅដើរលេងកម្សាន្ដ នៅខេត្តកែបច្រើនក៏ដោយ តែបើក្រលេកមើលការលក់ដូរគ្រឿងសមុទ្រ នៅក្នុងខេត្តមួយនេះ ហាក់នៅតម្លៃធម្មតា គ្មានភាពប្រែប្រួលឡើយ ដែលនេះជាកត្តាមួយបង្កភាពងាយស្រួល ដល់ប្រជាពលរដ្ឋមានលទ្ធភាព អាចប្រកបអាជីវកម្មរកប្រាក់ចំណូលផ្គត់ផ្គង់ជីវភាព និងចិញ្ចឹមគ្រួសារបានកាន់តែប្រសើរ។នេះបើយោងតាមការលើកឡើង ពីលោក ឯម រតន៍មុន្នី ប្រធានមន្ទីរពាណិជ្ជកម្មខេត្តកែប នៅថ្ងៃទី ១៤ ខែធ្នូ ឆ្នាំ ២០២១នេះ។

ទោះជាយ៉ាងណាក្តីលោក ឯម រតន៍មុន្នី ប្រធានមន្ទីរពាណិជ្ជកម្មខេត្តកែប បានបញ្ជាក់ថា ទោះជាប្រទេសកម្ពុជាយើង ជាពិសេសខេត្តកែប កំពុងរងនូវវិបត្តិខ្លះៗ ដោយសារកូវីដ-១៩ តែការលក់ដូរទំនិញ និងគ្រឿងសមុទ្រ គឺមានហាង ឆេងធម្មតា (តម្លៃទូទៅ)។ ប៉ុន្តែមានពេលខ្លះ តម្លៃគ្រឿងសមុទ្រអាចមានហាងឆេងឡើង ចុះបន្តិចបន្តួច តែក៏មិនឡើងថ្លៃហួសហេតុពេក នោះដែរ។

លោកប្រធានមន្ទីរ បានបញ្ជាក់ផងដែរថា សម្រាប់តម្លៃទូទៅក្នុងសប្តាហ៍នេះ ដូចជា៖ បង្គាស្រស់លេខ១ ក្នុង១គីឡូក្រាម តម្លៃ ៥០,០០០៛,មឹកស្រស់លេខ ១ ក្នុង ១គីឡូក្រាម តម្លៃត្រឹមតែ ៤៥,០០០៛ ឬ៤០,០០០៛ ,ក្តាមសេះលេខ ១ មានតម្លៃ ៦៥,០០០៛។ ចំណែកមុខទំនិញផ្សេងៗ ទៀត គឺមានភាពប្រែប្រួលបន្តិចបន្តួច។

ដោយឡែកបើយោងតាម ការលើកឡើងពីលោក ស្រី កុម្ភៈ ប្រធានមន្ទីរពាណិជ្ជកម្មខេត្តកំពត ក៏បានបញ្ជាក់ផងដែរថា តម្លៃគ្រឿងសមុទ្រ រួមទាំងមុខទំនិញផ្សេងៗ នៅទីផ្សារខេត្តកំពត ក៏មានហាងឆេងប្រហាក់ប្រហែលគ្នានឹងខេត្តកែបដែរ។ ជួនកាលអាចខុសគ្នាបន្តិចបន្តួចប៉ុណ្ណោះ ហើយទោះជាបែបណា លោកនឹងខិតខំជំរុញឲ្យរាល់មុខទំនិញ ក្នុងស្រុកមានលំនឹង និងមានគុណភាពខ្ពស់ ដើម្បីប្រកួតប្រជែងមុខទំនិញនានា ក្នុងទីផ្សារក្នុងស្រុក របស់យើង៕

អត្ថបទ៖ សេង ណារិទ្ធ