សម្ដេចតេជោ អំពាវនាវឲ្យម្ចាស់រថយន្ត ជ្រកក្រោមផ្លាកលេខផ្សេងៗដែលគ្មានពន្ធ សូមរួសរាន់ទៅបង់ពន្ធ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអំពាវនាវដល់ម្ចាស់រថយន្ត ដែលជ្រកក្រោមផ្លាកលេខផ្សេងៗ ដែលគ្មានពន្ធ សូមទៅបំពេញកាតព្វកិច្ចពន្ធ និងអាករនាំចូល ដើម្បីទទួលបានការបញ្ចុះតម្លៃ ១០ភាគរយ។

សម្ដេចតេជោនាយករដ្ឋមន្ត្រី បានថ្លែងក្នុងពិធីសម្ពោធសណ្ឋាគារ HYATT REGENCY ភ្នំពេញ នៅព្រឹ​ក​ថ្ងៃទី ១៥ ខែធ្នូនេះថា នៅសល់តែប៉ុន្មានទៀតនោះទេ គឺត្រូវដាច់ឆ្នាំ ២០២១ ចូលដល់ឆ្នាំ ២០២២ហើយ។ ដូច្នេះសម្ដេចតេជោ បានអំពាវនាវដល់ម្ចាស់រថយន្ត ដែលជ្រកក្រោមផ្លាកលេខផ្សេងៗ ដែលគ្មានពន្ធ សូមប្រញ៉ាប់ទៅបង់ពន្ធ ដើម្បីទទួលបានការបញ្ចុះតម្លៃ។

សម្ដេចតេជោ ហ៊ុន សែន បានថ្លែងយ៉ាងដូច្នេះថា «ថ្ងៃនេះ ជាថ្ងៃទី ១៥ហើយ នៅសល់តែ ១៥ថ្ងៃទៀតទេ អំពាវនាវចំពោះម្ចាស់រថយន្ត ដែលមិនទាន់បានបង់ពន្ធ សូមអញ្ជើមកបង់ពន្ធឲ្យបានរូសរាន់ ដើម្បីទទួលបានភាពអនុគ្រោះ ១០ភាគរយ»។

សម្ដេចតេជោនាយករដ្ឋមន្ត្រី ធ្លាប់បានបញ្ជាក់រួចហើយថា មិនឲ្យមានព្រឹត្តិការណ៍ដដែលៗ ទៅលើបញ្ហារថយន្តគ្មានពន្ធ ជ្រកក្រោមផ្លាកលេខផ្សេងៗ បើកបរនៅលើដងផ្លូវទៀតនោះទេ ហើយចំពោះរថយន្តចង្កូចស្ដាំ ក៏ត្រូវយកទៅកែចង្កូចផង​ដែរ។

សម្ដេចតេជោ បានបន្ថែមថា «អញ្ចឹងអ្នកដែលមិនទាន់បានបង់ពន្ធ រូសរាន់មកបង់ពន្ធ ក្រោយថ្ងៃទី ៣១ ធ្នូ បង់ពន្ធពេញ អត់បានអា ១០ភាគរយទេ ព្រោះរឿងនេះ ជារឿងយករកស៊ីរត់ពន្ធ យកឡានមកជិះអត់ពន្ធ ត្រូវចូលមកបង់ពន្ធ ទទួលបាននូវការអនុគ្រោះ ១០ភាគរយ»៕

អត្ថបទ៖ ឃួន សុភ័ក្រ