ព័ត៌មានជាតិ

មកស្គាល់កូនប្រុសស្រីទាំង ០៥ នាក់ សម្តេចវិបុលបញ្ញា សុខ អាន

បានផុស

៥ years មុន

នៅ

ថ្ងៃព្រហស្បតិ៍ ២៣ ធ្នូ ២០២១

ដោយ

សម្តេចវិបុលបញ្ញា សុខ អាន បានទទួលមរណភាពនាថ្ងៃទី១៥ ខែមីនា ឆ្នាំ២០១៧នេះ ក្នុងជន្មាយុ៦៦ឆ្នាំ ដោយរោគាពាធ។ សម្តេចគឺជាឥស្សរជនកំពូលមួយរូបក្នុងជួរថ្នាក់ដឹកនាំកម្ពុជា តាំងពីការដួលរលំនៃរបបប៉ុលពតនៅឆ្នាំ១៩៧៩។

សម្តេចវិបុលបញ្ញា សុខ អាន បានកាន់តួនាទីជាឧបនាយករដ្ឋមន្ត្រី និងជារដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី មុនពេលសម្តេចទទួលមរណភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចវិបុលបញ្ញា សុខ អាន បានចូលរួមយ៉ាងសកម្មបូជាកម្លាំងកាយចិត្តបញ្ញាស្មារតី ក្នុងការចូលរួមស្តារនិងកសាងប្រទេសជាតិ។ ការងារដ៏លេចធ្លោក្នុងប្រវត្តិសាស្រ្តកម្ពុជាគឺសម្តេចវិបុលបញ្ញា បានដឹកនាំគណៈប្រតិភូកម្ពុជាតស៊ូយ៉ាងស្វិតស្វាញបំផុតក្នុងយុទ្ធនាការស្វែងរកការគាំទ្រ សម្រាប់ការចុះបញ្ជីរមណីយដ្ឋានប្រាសាទព្រះវិហារ រហូតសម្រេចបានជោគជ័យជាប្រវត្តិសាស្រ្ត ក្នុងកិច្ចប្រជុំគណៈកម្មាធិការបេតិកភណ្ឌពិភពលោកលើកទី៣២ នៅថ្ងៃទី៧ ខែកក្កដា ឆ្នាំ២០០៨ នៅក្រុងកេបិក ប្រទេសកាណាដា។ សម្តេចវិបុលបញ្ញា ក៏បានជំរុញឱ្យមានការដាក់បញ្ចូលសម្បតិ្តបេតិកភណ្ឌរូបីនិងអរូបីជាច្រើនទៀតទៅក្នុងបញ្ជីបេតិកភណ្ឌពិភពលោក។

លោកជំទាវ ថេង អាយអាន្នី និងបុត្រាបុត្រីទាំង ០៥ នាក់ របស់សម្តេចវិបុលបញ្ញា សុខ អាន

ជីវប្រវត្តិរបស់សម្តេចវិបុលបញ្ញា សុខ អាន បានបញ្ជាក់ថា សម្តេចនិងលោកជំទាវ ថេង អាយអាន្នី មានបុត្រាបុត្រីចំនួន ០៥ នាក់គឺ៖

១/ លោកស្រី សុខ សូម៉ា

២/ លោក សុខ ពុទ្ធិវុធ

៣/ លោក សុខ សូកាន

៤/ លោក សុខ សូកេន

៥/ លោក សុខ សង្វារ

កូនប្រុសទាំងបួននាក់របស់សម្តេចវិបុលបញ្ញា សុខ អាន ត្រូវបានព្រះមហាក្សត្រនៃត្រាស់បង្គាប់តែងតាំងមុខតំណែងជារដ្ឋលេខាធិការ និងអនុរដ្ឋលេខាធិការនៅតាមក្រសួង៤ផ្សេងគ្នា។

កូនប្រុសទាំង៤នាក់នោះរួមមានលោក សុខ សូកាន ត្រូវបានតែងតាំងជារដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ តាមព្រះរាជក្រឹត្យចុះថ្ងៃទី១៦ ខែធ្នូឆ្នាំ២០២០។

លោក សុខ សូកេន បានឡើងជារដ្ឋលេខាធិការក្រសួងការបរទេស និងសហប្រតិបត្តិការអន្តរជាតិតាមព្រះរាជក្រឹត្យចុះថ្ងៃទី១៨ ខែធ្នូឆ្នាំ២០២០ បន្ទាប់ពីលោកកាន់តំណែងជាអនុរដ្ឋលេខាធិការក្នុងក្រសួងនេះចាប់តាំងពីឆ្នាំ២០១៦មក។

លោក សុខ សង្វារ ត្រូវតែងតាំងជាអនុរដ្ឋលេខាធិការក្រសួងទេសចរណ៍តាមព្រះរាជក្រឹត្យកាលពីថ្ងៃទី១៥ ខែធ្នូឆ្នាំ២០២០ បន្ទាប់ពីលោកបានកាន់ជាអគ្គនាយករងនៃអាជ្ញាធរជាតិអប្សរាអស់រយៈពេល៧ឆ្នាំរួចមក។

ដោយឡែកកូនប្រុសច្បងរបស់សម្តេច សុខ អាន ដែលជាកូនប្រសាររបស់សម្តេចតេជោនាយករដ្ឋមន្ត្រី ហ៊ុន សែន គឺលោក សុខ ពុទ្ធិវុធ ជារដ្ឋលេខាធិការ នៃក្រសួងប្រៃសណីយ៍ និងទូរគមនាគមន៍៕

អត្ថបទ៖ ប៊ុណ្ណារ៉ា