អតិថិជន​រងផល​ប៉ះពាល់​ដោយសារ​កូវីដ​ ​នៅតែ​អាចស្នើ​រៀបចំ​ឥណទាន​ឡើងវិញ​ក្រោមគោលនយោបាយថ្មី​

អតិថជន​ដែលរងផលប៉ះពាល់ដោយសារជំងឺកូវីដ១៩ នៅតែអាចស្នើសុំរៀបចំឥណទានឡើងវិញ ក្រោមគោលនយោបាយថ្មី ខណៈចំនួនអតិថិជនស្នើសុំរៀបចំឡើងវិញបានធ្លាក់ចុះនៅក្នុងកម្រិតតិចតួចនៅប៉ុន្មានខែកន្លងមកនេះ។

លោក កាំង តុងងី ប្រធាន​នាយកដ្ឋាន​ទំនាក់ទំនង ​នៃ​សមាគម​មីក្រូហិរញ្ញវត្ថុ​កម្ពុជា មានប្រសាសន៍ថា “នៅប៉ុន្មានខែចុងក្រោយនេះ នៅតែមានអ្នកស្នើសុំរៀបចំឥណទានឡើងវិញ គ្រាន់តែស្ថិតនៅក្នុងចំនួនតិចតូច ខណៈគោលនយោបាយរៀបចំឥណទានឡើងវិញបានបញ្ចប់ក្នុងឆ្នាំ ២០២១ ហើយ។ ប៉ុន្តែនៅចុងឆ្នាំនេះ ធនាគារជាតិ​នៃ​កម្ពុជា​ (NBC) បានដាក់នូវគោលនយោបាយថ្មី ប៉ុន្តែមិនផ្សព្វផ្សាយជាសាធារណទេ ដោយសារតែគោលនយោបាយនេះ សម្រាប់តែផ្ទៃក្នុងវិស័យប៉ុណ្ណោះ”។

លោក កាំង តុងងី បញ្ចាក់ថា គោលនយោបាយថ្មីនេះ សម្រាប់អតិថិជនដែលរងផល​ប៉ះពាល់​ដោយសារកូវីដ១៩ មិនធ្លាប់ស្នើសុំរៀបចំឥណទានឡើងវិញ គឺគាត់អាចទទួលបានការរៀប​ចំឥណ​ទានឡើងវិញ ក្នុងលក្ខខណ្ឌបន្ធូរបន្ថយ ដូចឆ្នាំ ២០២០ និង២០២១។ ដោយឡែកអតិថិជន ដែលធ្លាប់បានរៀបចំឥណទានឡើងវិញហើយ គាត់នៅតែអាចសុំធ្វើការរៀបចំឥណទានឡើងវិញ ប៉ុន្តែក្នុងលក្ខខណ្ឌមួយដែលគេនៅបន្ដឹង មានន័យថា គេប្រើប្រាស់លក្ខខណ្ឌធម្មតា ដូច្នេះកាលណាគេរៀបចំឥណទានឡើងវិញជូនគាត់ មានន័យថាគាត់ប្រឈម នឹងការប៉ះពាល់នូវប្រវត្តិឥណទានរបស់គាត់មួយចំនួន។

ទិន្ន័យពីការិយាល័យឥណទានកម្ពុជា បង្ហាញថា គិតត្រឹមខែវិច្ឆិកា ឆ្នាំ២០២១ វិស័យហិរញ្ញវត្ថុ (ធនាគារ និងមីក្រូហិរញ្ញវត្ថុ) បានរៀបចំឥណទានឡើងវិញជូនដល់ប្រជាជនសរុប ៦១៨ ៨២០ គណនី ក្នុងទំហំឥណទានប្រមាណ ៧ ១៧២ លានដុល្លា ដោយឥណទានដែលនៅសល់មានចំនួន ៥ ២០៦ លានដុល្លា នៃអតិថិជន៤០៩ ៦១៩ គណនី៕