សមត្ថកិច្ចចម្រុះចាប់រថយន្តដឹកគ្រឿងសមុទ្រ រកឃើញបង្គាចាក់ចាហួយ ៨១ កេស

ខេត្តកំពត៖ គ្រឿងសមុទ្រដែលផ្ទុកក្នុងថយន្តមួយគ្រឿង មានបំណងដឹកជញ្ជូនទៅចែកចាយនៅរាជធានីភ្នំពេញ ត្រូវបានកម្លាំងសមត្ថកិច្ចចម្រុះចាប់ឃាត់ឱ្យផ្នែកជំនាញត្រូតពិនិត្យ ដោយសង្ស័យមានផ្ទុកនូវបង្គាចាក់បញ្ចូលសារធាតុចាហួយ បង្កើនទម្ងន់។

ការឃាត់រថយន្តមួយគ្រឿងនេះ នៅវេលាម៉ោង ២ រំលងអធ្រាត ឆ្លងចូលថ្ងៃទី ២១ ខែមករា ឆ្នាំ ២០២២ ត្រង់ចំណុចផ្លូវបំបែក ឃុំអង្គសុរភី ស្រុកកំពង់ត្រាច ខេត្តកំពត។

លោក ង៉ែត សាវឿន ប្រធានច្រកទ្វារព្រំដែនអន្តរជាតិព្រែកចាក បានឱ្យដឹងថា គ្រឿងសមុទ្រដែលដឹកតាមរថយន្តមួយគ្រឿងនេះ បានចរាចរទំនិញប្រភេទគ្រឿងសមុទ្រមកពីប្រទេសវៀតណាម។ បន្ទាប់ពីសង្ស័យថា មានបង្កប់នូវបង្គាចាក់ចាហួយ ទើបកម្លាំងចម្រុះស្ទាក់ចាប់បាន និងប្រគល់ជូនជំនាញត្រួតពិនិត្យ។

លោកបានបញ្ជាក់ទៀតថា ក្រោយពីបានពិនិត្យ កម្លាំងជំនាញឃើញថា ក្នុងចំណោមបង្គាចំនួន ១៤៣ កេស មានបង្គាចាក់សារធាតុចាហួយចំនួន ៨១ កេស ស្មើនឹង ១ ៤៨៤ គីឡូក្រាម។ រីឯគ្រឿងសមុទ្រផ្សេងទៀតដែលពុំមានពាក់ព័ន្ធនឹងបទល្មើស ដូចជា មឹក មានចំនួន ១៩ កេស ទម្ងន់ ៣៧៤ គីឡូក្រាម បង្កង ៦ កេស ទម្ងន់ ១២០ គីឡូក្រាម អយស្ទ័រ ៦ កេស ទម្ងន់ ១៩៨ គីឡូក្រាម ខ្យងហូល ១ កេស ទម្ងន់ ១០ គីឡូក្រាម កន្ទាយ ១៤ កេស ទម្ងន់ ៤២០ គីឡូក្រាម និងក្តាម ៣ កេស ទម្ងន់ ៩០ គីឡូក្រាម មន្ត្រីជំនាញនឹងធ្វើការពិន័យទៅតាមច្បាប់។ ចំពោះបង្គាដែលមានចាក់ជាតិចាហួយ​ ៨១ កេស មន្ត្រីជំនាញនឹងដឹកជញ្ជូនទៅដុតកម្ទេចចោលទាំងអស់ នៅរសៀលថ្ងៃដដែល។

គួរបញ្ជាក់ថា ចាប់ពីយប់ថ្ងៃទី ១៦ ខែមករា ឆ្នាំ ២០២២ រហូតដល់ថ្ងៃទី ២១ ខែ ឆ្នាំ ដដែល កម្លាំងចម្រុះដែលដឹកនាំដោយ លោក ឃឹម សាមី អភិបាលរងស្រុកកំពង់ត្រាច លោក ង៉ែត សាវឿន ប្រធានច្រកទ្វារព្រំដែនអន្តរជាតិព្រែកចាក និងក្រោមកិច្ចសម្របសម្រួលនីតិវិធី ពីលោក ឈាវី ម៉ារ៉ូ ព្រះរាជអាជ្ញារង អមសាលាដំបូងខេត្តកំពត បានបង្ក្រាបរថយន្តដឹកគ្រឿងសមុទ្រល្មើសច្បាប់ ដែលចរាចរឆ្លងកាត់តំបន់ខេត្តកំពត ជាបន្តបន្ទាប់៕

អត្ថបទ៖ សេង ណារិទ្ធ