លោកជំទាវ ម៉ែន សំអន ជំរុញឲ្យក្រុមការងារ គ្រប់មូលដ្ឋានបន្តអនុវត្តន៍ នូវភារកិច្ចចម្បងៗចំនួន ៥យ៉ាង

លោកជំទាវ ម៉ែន សំអន តំណាងរាស្ត្រមណ្ឌលស្វាយរៀង និងជាអនុប្រធានគណបក្សប្រជាជនកម្ពុជា បានជំរុញឲ្យក្រុមការងារ គ្រប់មូលដ្ឋានទាំងអស់បន្តអនុវត្តន៍ នូវភារកិច្ចចម្បងៗចំនួន ៥យ៉ាង ដើម្បីបម្រើផលប្រយោជន៍ ជូនប្រជាពលរដ្ឋតាមតម្រូវការ ឲ្យកាន់តែរលូនថែមទៀត។ 

លោកជំទាវ ម៉ែន សំអន បានជំរុញបែបនេះ ខណៈអញ្ជើញជាអធិបតី ក្នុងកិច្ចប្រជុំបូកសរុបលទ្ធផល នៃការអនុវត្ត របស់ក្រុមការងារគណបក្ស ចុះមូលដ្ឋានខេត្តស្វាយរៀងប្រចាំឆ្នាំ ២០២១ និងទិសដៅភារកិច្ចសម្រាប់អនុវត្តបន្ត កាលពីថ្ងៃទី ២៣ ខែមករា ឆ្នាំ ២០២២។

ក្នុងឱកាសនោះ លោកជំទាវបានថ្លែងអំណរគុណ ដល់រដ្ឋបាលខេត្តស្វាយរៀង ក៏ដូចជាក្រុមការងារគណបក្ស ចុះមូល ដ្ឋានខេត្តស្វាយរៀងទាំងអស់ ដែលបានយកចិត្តទុក្ខដាក់ ក្នុងការបំពេញការងារនៅតាមបណ្តាមូលដ្ឋាននីមួយៗ ទទួលបានលទ្ធផលគួរជាទីមោទនៈ ជាពិសេសលើដំណើរការទប់ស្កាត់នៃការឆ្លងរីករាលដាលនៃជំងឺកូវីដ-១៩។ មកដល់ពេលនេះ ខេត្តស្វាយរៀង មានអ្នកជំងឺកូវីដ-១៩ តែម្នាក់គត់ បាននិងកំពុងសម្រាកព្យាបាល នៅមន្ទីរពេទ្យ។

បើទោះបីជា ទទួលបាននូវលទ្ធលល្អយ៉ាងណាក៏ដោយ ក៏លោកជំទាវបានស្នើឲ្យសមាជិក-សមាជិកាទាំងអស់ ត្រូវបង្កើនការយកចិត្តទុក្ខដាក់បន្ថែមទៀត លើការងារចម្បងៗចំនួន ៥យ៉ាងដូចជា៖

ទី១. ត្រូវរួមគ្នាថែរក្សាសុខសន្តិភាព ដែលជាកត្តានៃការអភិវឌ្ឍន៍។ ទី២. ត្រូវបម្រើសេវាសាធារណៈឲ្យបានល្អ នៅតាមបណ្តាមូលដ្ឋាននីមួយៗ ដើម្បីចូលរួមចំណែកក្នុង ការអភិវឌ្ឍន៍របស់ខេត្ត។ ទី៣. ត្រូវរៀបចំសន្និបាត គណៈកម្មាធិការគណបក្សឃុំ-សង្កាត់ ឲ្យបានរួចរាល់ក្នុងខែមករា ឆ្នាំ ២០២២។ ទី៤. ត្រៀមរៀបចំផែនការសកម្មភាព និងប្រតិទិនការងាររបស់ខ្លួន តាមតួនាទីភារកិច្ច និងគោរពទៅតាមគោលការណ៍ របស់គណៈកម្មការជាតិ នៃការរៀបចំបោះឆ្នោតបានកំណត់។ ទី៥. ត្រូវបង្កើននូវការប្រុងប្រយ័ត្នឲ្យបានខ្ពស់បន្ថែមទៀត ទោះបីជាស្ថានភាព នៃការឆ្លងរីករាលដាលជំងឺកូវីដ-១៩ បានថយចុះគួរឲ្យកត់សម្គាល់យ៉ាងណាក៏ដោយ ដើម្បីទប់ស្កាត់នូវការឆ្លងរីករាលដាលចូល ក្នុងសហគមន៍ ជាពិសេស ត្រូវអនុវត្តឲ្យជាប់ជាប្រចាំ នូវវិធានការណ៍ ៣ការពារ ៣កុំ តែម្ដង៕

អត្ថបទ៖ វិមាន

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត