ព័ត៌មានជាតិ
ឯកឧត្ដម ហ៊ុន ម៉ាណែត ៖ គោលដៅធំបំផុតរបស់ក្រុមការងារក្រៅប្រទេស គឺផ្សព្វផ្សាយអំពីការពិត និងសមិទ្ធផលដែលកើតមាននៅក្នុងប្រទេស
ឯកឧត្ដមបណ្ឌិត ហ៊ុន ម៉ាណែត បេក្ខភាពនាយករដ្ឋមន្ត្រីបន្តវេនរបស់គណបក្សប្រជាជនកម្ពុជា បានលើកឡើងថា ក្រុមការងាររៀបចំអង្គការចាត់តាំង យុវជនគណបក្សប្រជាជនកម្ពុជានៅក្រៅប្រទេស ចេញទៅក្រៅប្រទេសមានគោលដៅធំបំផុត គឺផ្សព្វផ្សាយអំពីការពិត អំពីគោលនយោបាយ និងសមិទ្ធផល ដែលកើតមាននៅក្នុងប្រទេសកម្ពុជា ឲ្យបងប្អូនខ្មែរនៅក្រៅប្រទេសបានដឹង។
តាមរយៈវីដេអូបង្ហោះនៅលើហ្វេសប៊ុក នាព្រឹកថ្ងៃទី ១០ ខែមេសានេះ ឯកឧត្ដមបណ្ឌិត ហ៊ុន ម៉ាណែត លើកឡើងថា មានក្រុមមួយចំនួននៅក្រៅប្រទេស បានវាយប្រហារលើក្រុមការងាររៀបចំអង្គការចាត់តាំង យុវជនគណបក្សប្រជាជនកម្ពុជានៅក្រៅប្រទេស ថា ទៅដើម្បីបំបែកសហគមន៍ខ្មែរនៅក្រៅប្រទេស។ ការវាយប្រហារបែបនេះ គឺជារឿងមិនពិតទាល់តែសោះ ដោយឯកឧត្ដមបណ្ឌិត បានបញ្ជាក់ថា ក្រុមការងាររៀបចំអង្គការចាត់តាំងយុវជនគណបក្សប្រជាជនកម្ពុជានៅក្រៅប្រទេស ប្រកាន់ខ្ជាប់នូវគោលការណ៍សច្ចធម៌ អហិង្សា ស្មារតីខ្មែរតែមួយ និងការភ្ជាប់ទំនាក់ទំនងរវាងខ្មែរ និងខ្មែរ។
ឯកឧត្ដមបណ្ឌិត ថ្លែងឲ្យដឹងបែបនេះថា «ចំណុចទីមួយ គឺយើងប្រកាន់សច្ចធម៌ យើងចេញទៅគោលដៅធំបំផុតគឺផ្សព្វផ្សាយអំពីការពិត អំពីគោលនយោបាយ និងសមិទ្ធផល ដែលកើតមាននៅក្នុងប្រទេសរបស់យើង ឲ្យបងប្អូនខ្មែរនៅក្រៅប្រទេសបានដឹង និយាយតែពីការពិត និយាយអត់មានភូតកុហក់ ឲ្យឃើញថា គោលនយោបាយគណបក្សប្រជាជនកម្ពុជា ដឹកនាំប្រទេសបានធ្វើអ្វីខ្លះ ហើយអ៊ុំពូមីងបងប្អូនជឿចុះ គណបក្សប្រជាជនកម្ពុជា ដែលដឹកនាំប្រទេស មិនបំផ្លាញប្រទេសទេ នេះគឺជាគោលការណ៍សច្ចធម៌ ដែលយើងបានចេញទៅផ្សព្វផ្សាយ»។
ឯកឧត្ដមបណ្ឌិត ហ៊ុន ម៉ាណែត បានបញ្ជាក់ដែរថា ក្រុមការងាររៀបចំអង្គការចាត់តាំង យុវជនគណបក្សប្រជាជនកម្ពុជានៅក្រៅប្រទេស ប្រកាន់ជំហរមិនឈ្លោះគ្នា មិនវាយប្រហារគ្នា ដោយក្នុងវេទិកានានានៅក្រៅប្រទេស ក្រុមការងារមិនបានវាយប្រហារទៅលើក្រុមណាមួយ នោះទេ។ ប៉ុន្តែ មានតែក្រុមមួយចំនួននៅក្រៅប្រទេសប៉ុណ្ណោះ បានធ្វើបាតុកម្មរំខានដល់ការជួបជុំរបស់ក្រុមការងាររៀបចំអង្គការចាត់តាំង យុវជនគណបក្សប្រជាជនកម្ពុជានៅក្រៅប្រទេស។ ម្យ៉ាងទៀត ក្រុមការងាររៀបចំអង្គការចាត់តាំង យុវជនគណបក្សប្រជាជនកម្ពុជានៅក្រៅប្រទេស ប្រកាន់ជំហរស្រលាញ់រាប់អានគ្នាដោយស្មារតីគ្រួសារខ្មែរតែមួយ។
ឯកឧត្ដមបណ្ឌិត ហ៊ុន ម៉ាណែត ថ្លែងបន្ថែមបែបនេះថា «ចេញទៅក្រៅប្រទេស ពេលដែលបងប្អូនសួរខ្ញុំ បង! ឥឡូវយើងពង្រីកសមាជិកក្រៅប្រទេស ឥឡូវយើង អ្នកដែលធ្លាប់ចូលរួមជាមួយបក្សប្រឆាំង ជេរយើង បាតុកម្មជេរយើង ឥឡួវបើគាត់ចង់ចូលមក តើយើងគួរឲ្យគាត់ចូលអត់? តើចូលមកតិចគាត់មកជេរយើងនៅក្នុងខាងក្នុងអី ខ្ញុំថា កុំពិបាកយើងស្វាគមន៍ជំហរសាមគ្គី សម្ដេចតេជោ គណបក្សយើង បង្រួបបង្រួមជាតិ បញ្ចប់សង្រ្គាមបាន ដោយសារជំហរបង្រួបបង្រួមជាតិ និងបើកឱកាសឲ្យគ្រប់ភាគី រួមទាំងភាគីដែលចង់បំផ្លាញគណបក្សប្រជាជន មករួមរស់ជាមួយគ្នាបាន ហេតុអីក៏ក្រុមការងាររបស់យើងត្រូវប្រកាន់ យើងអត់ប្រកាន់ ហ្នឹងហើយបានជាយើងប្រមូលមនុស្សកាន់តែរីក»។
ឯកឧត្ដមបណ្ឌិត ហ៊ុន ម៉ាណែត បានគូសបញ្ជាក់ដែរថា គណបក្សប្រជាជនកម្ពុជា មិនដែលយកខ្មែរណាជាសត្រូវនោះទេ ដែលនេះជាជំហររបស់គណបក្សប្រជាជនកម្ពុជា គឺប្រកាន់យកការរាប់អានខ្មែរទាំងអស់ ដោយយកទស្សនៈថា «យើងរួមគ្នា យើងសាមគ្គីគ្នា យើងមិនដែលប្រកាន់ទេ»៕
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៧ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៥ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ៤ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ព័ត៌មានអន្ដរជាតិ៦ ថ្ងៃ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង