ព័ត៌មានជាតិ

ជាងបង្ហើបប្រាប់ជួបញឹកណាស់ ប្រើឆ្នាំងសាកដោតតាមឡាន រត់មករកជាងជួសជុលរាល់ថ្ងៃ

បានផុស

៤ years មុន

នៅ

ថ្ងៃពុធ ២ កុម្ភៈ ២០២២

ដោយ

ការប្រើដុំសាកថ្មទូរសព្ទតាមឡាន គួរជ្រើសរើសផលិតផលដែលមានគុណភាព ពីព្រោះជាងនៅផ្សារឃ្លាំងរំសេវបង្ហើបប្រាប់ថា មានបញ្ហាច្រើនណាស់អតិថិជនរត់មករកជាងជួសជុលរាល់ថ្ងៃ។

ម៉ារ៉ាឌី ជាងជួសជុលទូរសព្ទនៅផ្សារឃ្លាំងរំសេវបានប្រាប់បទពិសោធន៍ពីការជួសជុលទូរសព្ទ ដោយសង្កេតឃើញថាបញ្ហាកើតពីការប្រើដុំសាកតាមឡានកើតឡើងញឹកញាប់ សឹងតែមានអតិថិជនមករកមិនលស់ថ្ងៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បុរសវ័យជាង ៣០ ឆ្នាំ បានឲ្យកម្ពុជាថ្មីដឹងថា ការប្រើឆ្នាំងសាកឡាន ឬគេនិយមហៅដុយកន្ទុយបារីនេះ បើទិញប៉ះផលិតផលមិនល្អ កើតបញ្ហាដល់ទូរសព្ទ។

ដោយលើកករណីជាពិសេសតៃកុងឡាន អ្នកបើករថយន្តឈ្នួល ឬរថយន្តដឹកធំៗ តែងតែយកទូរសព្ទមកជួសជុល ដោយសារប្រើដុំសាកឡានគ្មានគុណភាពឆ្លងចរន្តខូចដល់ទូរសព្ទ។

“ជាពិសេសអ្មកបើកបររថយន្តម៉ូយៗ ដែលឧស្សាហ៍ធ្វើដំណើរឡើងចុះតាមខេត្ត និយមប្រើដុំសាកតាមឡាន។ បញ្ហានៅត្រង់ថា បើសិនដុំសាកនោះគ្មានគុណភាពនៅពេលដោតសាកជាមួយទូរសព្ទនាំបញ្ហាដល់ម៉ាស៊ីនទូរសព្ទ រហូតពេលខ្លះត្រូវរុះរើម៉ាស៊ីនចំណាយអស់ច្រើន”។

ម៉ារ៉ាឌី ជាងជួសជុលទូរសព្ទនៅផ្សារឃ្លាំងរំសេវ

ជាការក្រើនរំលឹក ម៉ារ៉ាឌីណែនាំគួរចៀសវាងប្រើដុំសាកឡានដែលគ្មានយីហោត្រឹមត្រូវ គ្មានគុណភាព តម្លៃថោកៗលក់តាមផ្សារ ដើម្បីកុំឲ្យមានបញ្ហាពិបាកខាតពេលយកមកជាងជួសជុល ហើយពេលខ្លះខូចប្រើលែងកើតតែម្តង។

លើការថែទាំប្រើប្រាស់ទូរសព្ទជាទូទៅវិញ យុវជនរូបនេះក៏រំលឹកឲ្យប្រយ័ត្នលើបញ្ហាទឹក។ បើទោះបីទូរសព្ទស៊េរីទំនើបខ្លះមានបច្ចេកវិទ្យាការពារជ្រាបទឹក ជាពិសេសបើទិញតគ្នាពីមួយទៅមួយតាមហាង ក៏មិនអាចទុកចិត្តមួយរយភាគរយដែរដោយសារអាចមានការដោះដូរគ្រឿងក្នុងខុសបច្ចេកទេសដើមពីរោងចក្រផលិត។ បន្ថែមពីនេះការជ្រើសរើសឆ្នាំងសាក ឬ Power Bank ក៏គួរជ្រើសរើសផលិតផលដែលល្អ ធានាគុណភាពច្បាស់លាស់ចៀសវាងប្រើប្រាស់នាំប៉ះពាល់ដល់ទូរសព្ទ៕

អត្ថបទ៖ ប៊ុណ្ណារ៉ា