បារាំង-អាល្លឺម៉ង់​ សុំឱ្យ​កម្ពុជា​រួមដៃ​ថ្កោលទោស​រុស្ស៊ី​ លើបញ្ហា​សង្គ្រាម​នៅអ៊ុយក្រែន​ ខណៈ​មេដឹក​នាំ​កម្ពុជា​បញ្ជាក់​ជំហរ​ឱ្យ​ភាគី​ទាំង​ពីរ​ចរចា​បញ្ចប់​សង្គ្រាម​​

លោក ហ្សាក់ ប៉ឺឡេ ឯកអគ្គរដ្ឋទូតបារាំងប្រចាំកម្ពុជា និងលោក គ្រីស្យង់ ប៊ែរហ្សេ ឯកអគ្គរដ្ឋទូតអាល្លឺម៉ង់ប្រចាំកម្ពុជា បានអញ្ជើញទៅជួបជាមួយលោកស្រី សឿង រ័ត្នចាវី រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ នាថ្ងៃអង្គារ៍ ទី១ ខែមីនា ឆ្នាំ ២០២២។

លោកឯកអគ្គរដ្ឋទូតទាំងពីរបានអំពាវនាវឱ្យកម្ពុជាចូលរួមយ៉ាងសកម្មនៅក្នុងចលនាអន្តរជាតិ ដើម្បី​គាំទ្រប្រទេសអ៊ុយក្រែន ហើយថ្កោលទោសការឈ្លានពានរបស់រុស្ស៊ីទៅលើប្រទេសនេះ។ នេះបើតាម​ទំព័រហ្វេសបុក​ផ្លូវការ​​ស្ថាន​ទូតបារាំង​ប្រចាំ​ក​ម្ពុជា​។

បញ្ហានេះ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានបង្ហាញជំហរឱ្យ​ភាគី​ទាំង​ពីរ​ចរចា​ដើម្បីបញ្ចប់​សង្គ្រាម។​

លោកទូត​ទាំងពីរបានអំពាវនាវឱ្យមានការគោរពអធិបតេយ្យភាព និងបូរណភាពដែន​ដីរបស់​ប្រទេសអ៊ុយក្រែន ហើយឱ្យមានការដកទ័ពរុស្ស៊ីភ្លាមៗ និងគ្មានល័ក្ខខ័ណ្ឌចេញពីទឹកដីអ៊ុយក្រែន។ លោកទាំងពីរបានរំឭកពីការអំពាវនាវរបស់បារាំង និងអាល្លឺម៉ង់ឱ្យមានការគោ​រពច្បាប់មនុស្សធម៌​អន្តរជាតិ ការចាប់ផ្តើមការចរចាឡើងវិញ និងការដោះស្រាយជម្លោះដោយសន្តិវិធី។

ទន្ទឹមនឹងនេះ ឯកអគ្គរដ្ឋទូតទាំងពីរ​បានស្នើឱ្យប្រទេសកម្ពុជាមិន​ត្រឹមតែបោះឆ្នោតគាំទ្រដំណោះ​ស្រាយ​មួយ​ដែលកំពុងដាក់ជូនអង្គប្រជុំវិសាមញ្ញបន្ទាន់​នៃមហាសន្និបាតអង្គការ​សហប្រជាតិប៉ុណ្ណោះទេ ក៏ប៉ុន្តែធ្វើជាប្រទេសផ្ចុងផ្តើមដំណោះស្រាយ​នេះជាមួយប្រទេស​ផ្សេងៗទៀត​ផងដែរ។ ប្រឈមនឹងការឈ្លានពានរបស់រុស្ស៊ីលើប្រទេសអ៊ុយក្រែន ដែលជាការ​រំលោភលើ​គោលការណ៍​គ្រឹះសំខាន់បំផុតនៃសណ្តាប់ធ្នាប់អន្តរជាតិ ការបោះឆ្នោតអនុប្បវាទ​មិនមែនជាជម្រើសនោះទេ។

ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន មានប្រសាសន៍នៅថ្ងៃទី ០២ មីនា ២០២២នេះថា បញ្ហារវាងរុស្ស៊ី-អ៊ុយក្រែន មិនអាចយកសង្គ្រាមបញ្ចប់សង្គ្រាមបានទេ ការចរចាគឺជាជម្រើស​មួយ​ល្អ​សម្រាប់ការបញ្ចប់សង្រ្គាមនៅក្នុងប្រទេសអ៊ុយក្រែន។

សម្ដេចតេជោ ហ៊ុន សែន បន្តថា ការផ្ដល់ជំនួយយោធាពីបណ្តាប្រទេសមួយចំនួននៅអឺរ៉ុបទៅឲ្យអ៊ុយក្រែន គឺជាការលើកទឹកចិត្តក្នុងការធ្វើសង្គ្រាម ហើយសង្រ្គាមនេះ នឹងកាន់តែខ្លាំងឡើង។

សម្ដេចតេជោ ហ៊ុន សែន បានបញ្ជាក់ថា៖ «ខ្ញុំនៅតែរក្សាទស្សនទានដដែល គឺមិនអាចយកសង្គ្រាមដើម្បីបញ្ចប់សង្គ្រាមបានទេ គោលជំហររបស់យើងតាំងពីដើមរហូតមក គឺមិនគាំទ្រការប្រើប្រាស់កម្លាំង ឬការគំរាមកំហែងប្រើប្រាស់កម្លាំង ពីភាគទីមួយប្រឆាំងនឹងភាគីមួយទៀត នេះជាគោលជំហរផ្លូវការរបស់យើង។ ព្រោះនេះគឺជាការចង់បានរបស់យើង ដែលខ្ញុំធ្លាប់បានប្រាប់បានថ្លែងនៅឯអង្គការសហប្រជាជាតិ»។

បើតាមសម្ដេចតេជោ ហ៊ុន សែន ឥឡូវជម្លោះនេះ កំពុងក្លាយជាអឺរ៉ុបបនីយកម្មសង្គ្រាមជាមួយរុស្ស៊ី ដែលពីមុន គឺជាការវាយប្រហារពីរុស្ស៊ីទៅកាន់អ៊ុយក្រែន ប៉ុន្តែឥឡូវនេះប្រទេសនានានៅក្នុងអឺរ៉ុបបាននាំគ្នាផ្តល់មនុស្ស ផ្តល់អាវុធ ផ្តល់យន្តហោះចម្បាំង ដើម្បីវាយតបរុស្ស៊ី ហើយដែលមានរហូតមកដល់ពេលនេះមានប៊ុលហ្គារី និងប៉ូឡូញទេ ដែលបដិសេធ។ បើដូច្នេះ សង្គ្រាមរវាងអ៊ុយក្រែន និងរុស្ស៊ី មិនមែនជាសង្គ្រាមអ៊ុយក្រែន និងរុស្ស៊ី ទៀតទេ ជាសង្រ្គាមរវាងរុស្ស៊ី និងអឺរ៉ុប តាមរយៈការផ្ដល់ជំនួយយោធា ដែលជាការលើកទឹកចិត្តបន្ថែមក្នុងការធ្វើសង្គ្រាម។

ប្រមុខរាជរដ្ឋាភិបាលកម្ពុជាបានបញ្ជាក់ទៀតថា៖ «គោលជំហរផ្លូវការរបស់យើង សម្រាប់ក្របខណ្ឌអាស៊ាន នឹងមើលទៅតាមការវិវត្តន៍នៃសភាពការណ៍ យើងមិនដាក់ការប្រដៅចំពោះប្រទេសណាទាំងអស់ ប៉ុន្តែយើងគ្រាន់តែបញ្ជាក់ពីគោលជំហររបស់យើង យើងលើកទឹកចិត្តឲ្យមានការចរចា»៕

អត្ថបទ៖ ឡេង ដេត