តំបន់​ជាច្រើន​នៅកម្ពុជា​មានភ្លៀងធ្លាក់​ដោយសារ​ឥទ្ធិពល​សម្ពាធទាប​

ក្រសួងធនធានទឹក និងឧតុនិយមបានឱ្យដឹងថា តំបន់ជាច្រើន នៅតាមបណ្ដាខេត្តមួយចំនួន​មានភ្លៀងធ្លាក់លាយឡំខ្យល់កន្ត្រាក់​ពីតិចទៅច្រើនបន្តបន្ទាប់ ខណៈដែលស្រុកមួយចំនួនក្នុងខេត្តកំពង់ចាម ក៏បន្តធ្លាក់ភ្លៀងនៅព្រឹកថ្ងៃទី ៧ ខែមីនានេះ។

នារយៈពេលប៉ុន្មានថ្ងៃនេះ មានភ្លៀងធ្លាក់ ក្នុងកម្រិតពីតិចទៅច្រើន និងលាយឡំ​ខ្យល់កន្ត្រាក់​ដូចជានៅខេត្តឧត្តរមានជ័យ ក្រុងប៉ៃលិន ខេត្តកោះកុង កំពង់ចាម​ព្រៃវែង និងខេត្តស្វាយ​រៀងជាដើម។

ក្រសួងធានធានទឹក បានប្រកាសនៅដើមខែមីនានេះថា កម្ពុជាទទួលរងឥទ្ធិពលជ្រលងសម្ពាធទាប ដែលរុញពីក្រោមឡើងទៅលើ មកពីមហាសមុទ្រឥណ្ឌា និងឥណ្ឌូនេស៊ី ក្នុងកម្រិតខ្សោយ ដែលកើតមាននៅចាប់ពីថ្ងៃទី២ ដល់ថ្ងៃទី ៨ ខែមីនានៅកម្ពុជា និងថៃ ធ្វើឱ្យតំបន់ទំនាបកណ្ដាល តំបន់ខ្ពង់រាប និងតំបន់មាត់សមុទ្រ មានភ្លៀងធ្លាក់លាយឡំនិង ផ្គរ រន្ទះ ក្នុងកម្រិតតិចទៅបង្គួរ៕