អ្នកនាំពាក្យ៖ យ៉ាងហោចណាស់គ្រូនិងសិស្សនៅទូទាំងប្រទេសបានចាក់វ៉ាក់សាំងកូវីដ-១៩ ក្នុងម្នាក់​៣ដូសរួចរាល់

អ្នកនាំពាក្យក្រសួងអប់រំយុវជននិងកីឡា បានមានប្រសាសន៍ថា បច្ចុប្បន្ននេះយ៉ាងហោចណាស់មានលោកគ្រូ អ្នកគ្រូ
និងសិស្សានុសិស្សនៅទូទាំងប្រទេសបានចាក់វ៉ាក់សាំងការពារជំងឺកូវីដ-១៩ ក្នុងម្នាក់៣ដូសរួចរាល់។

លោក រស់ សុវាចា អ្នកនាំពាក្យក្រសួងអប់រំយុវជននិងកីឡា បានមានប្រសាសន៍នៅព្រឹកថ្ងៃទី០៨ ខែមីនា នេះថា «ព្រោះតែលោកគ្រូ អ្នកគ្រូ និងសិស្សានុសិស្សនៅទូទាំងប្រទេសបានទទួលការចាក់វ៉ាក់សាំងការពារជំងឺកូវីដ-១៩ ដោយ ស្ម័គ្រចិត្តគ្រប់ៗ គ្នាទើបរាជរដ្ឋាភិបាលហ៊ានសម្រេចបើកសាលារៀនឡើងវិញ »។

លោកបានបន្តថា ការចាក់វ៉ាក់សាំងគឺជាមូលដ្ឋានដ៏សំខាន់ដែលនាំឱ្យមានការបើកប្រទេសឡើងវិញនិយាយជារួម
និងជាពិសេសការបើកដំណើរការវិស័យអប់រំ និយាយដោយឡែក។ លោកបានបន្តទៀតថា ផ្អែកតាមរបាយការណ៍របស់ មន្ទីរអប់រំ យុវជន និងកីឡារាជធានី ខេត្ត គឺលោកគ្រូ អ្នកគ្រូ និងសិស្សានុសិស្សបានចាក់វ៉ាក់សាំងការពារជំងឺកូវីដ-១៩ យ៉ាងហោចណាស់ក្នុងម្នាក់៣ដូសរួចរាល់ ។

លោកបានបន្ថែមថា ផ្តើមចេញពីកត្តានេះហើយទើបរាជរដ្ឋាភិបាលបានសម្រេចឈានទៅបើកសាលារៀនទាំងរដ្ឋ និង ឯកជនឡើងវិញដោយស្ថិតក្រោមលក្ខខណ្ឌបន្តអនុវត្តវិធានសុខាភិបាល ពិសេស៣ការពារ ៣កុំ ។

លោកបានឱ្យដឹងទៀតថា ក្រសួងអប់រំ សូមកោតសរសើរ និងថ្លែងអំណរគុណចំពោះលោកគ្រូ អ្នកគ្រូ សិស្ស-និស្សិត និងមាតាបិតាដែលបានទៅទទួលយកការចាក់វ៉ាក់សាំងដោយស្ម័គ្រចិត្តដើម្បីចូលរួមបង្ការទប់ស្កាត់ការឆ្លងរាលដាលជំងឺ កូវីដ-១៩ក្នុងស្មារតីបែបនេះជាការការពារអាយុជីវិតខ្លួនឯង និងអ្នកដទៃ ពិសេសរវាងគ្រូ និងសិស្សដែលត្រូវប្រាស្រ័យ ទាក់ទងគ្នា៕

អត្ថបទ៖ សំអឿន