ព័ត៌មានជាតិ

១១ កន្លែងសំខាន់នៅទីក្រុងភ្នំពេញ ទេសចរបរទេសចង់ស្គាល់ មិនអាចរំលងបាន

បានផុស

៨ ខែ មុន

នៅ

ថ្ងៃពុធ ២៣ មីនា ២០២២

ដោយ

ភ្នំពេញជារាជធានីចំណាស់មួយ ដែលមានទន្លេបួនមុខជាអត្តសញ្ញាណដ៏សំខាន់មួយ។ ក្រៅពីជាមជ្ឈមណ្ឌលសេដ្ឋកិច្ច និងនយោបាយ រាជធានីដែលមានប្រជាជនជាង ៣ លាននាក់រស់នៅនេះក៏ជាប៉ូលទេសចរណ៍សំខាន់មួយដែរ។

តាមរយៈក្រុមការងារកម្ពុជាថ្មី មន្រ្តីមន្ទីរទេសចរណ៍រាជធានីភ្នំពេញមួយរូបបានបង្ហាញទីតាំងតំបន់ទេសចរណ៍សំខាន់ៗនៅរាជធានីភ្នំពេញ ដែលពេញនិយមបំផុត ហើយដែលទេសចរបរទេសមិនអាចខកខានក្នុងការទៅទស្សនា។

១. ផ្សារធំថ្មី

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្សារធំថ្មីជាសំណង់បេតិកភណ្ឌដ៏សំខាន់ និងលេចធ្លោក្នុងចំណោមសំណង់នានានៅក្រុងភ្នំពេញ។ផ្សារនេះកសាងឡើង ក្នុងពេលដែលកម្ពុជាស្ថិតនៅក្រោមការគ្រប់គ្រងរបស់អាណានិគមបារាំង។ ការរចនាបែបសម័យទំនើប ធ្វើឲ្យសំណង់ដែលមានអាយុកាលជិត ១០០ ឆ្នាំនេះ ស្ថិតក្នុងចំណោមសំណង់ទាំង ៣០ ដែលសំខាន់បំផុតនៅរាជធានីភ្នំពេញ។

២. វាលពិឃាតជើងឯក

ទីតាំងប្រវត្តិសាស្ត្រជើងឯក មានទីតាំងស្ថិតនៅចម្ងាយប្រមាណ ១៥ គីឡូម៉ែត្រ នាប៉ែកនិរតីនៃរាជធានីភ្នំពេញ។ ទីតាំងប្រវត្តិសាស្ត្រមួយនេះទាក់ទាញភ្ញៀវទេសចរអន្តរជាតិឲ្យចង់ទៅទស្សនាផ្ទាល់កន្លែងពិឃាដមនុស្សយ៉ាងព្រៃផ្សៃ ក្នុងរបបប្រល័យពូជសាសន៍ប៉ុលពត។

៣. វិមានឯករាជ្យ

វិមានឯករាជ្យជាអត្តសញ្ញាណនៃរាជធានីភ្នំពេញ ហើយក៏បញ្ជាក់ពីដួងព្រលឹងនៃប្រជាជនកម្ពុជា។ វិមានឯករាជ្យ ជាស្ថាបត្យកម្មសំណង់ប្រវត្តិសាស្ត្រ ដែលបង្ហាញអំពីការទទួលបានឯករាជ្យពេញលេញរបស់កម្ពុជាពីអាណានិគមបារាំង។ ការសាងសង់វិមានឯករាជ្យនេះឡើង គឺដើម្បីរំលឹកទៅដល់វីរភាពរបស់បុព្វបុរសខ្មែរ ដែលបានតស៊ូពលីជីវិតក្នុងការដណ្ដើមឯករាជ្យពីបារាំងវិញ។

៤. សារមន្ទីជាតិ

សារមន្ទីរជាតិជាសារមន្ទីរធំជាងគេនៅប្រទេសកម្ពុជា ដែលជាទីតាំងប្រមូលផ្ដុំសម្បត្តិវប្បធម៌និងប្រវត្តិសាស្ត្រដ៏សំខាន់។ សារមន្ទីរជាតិមានរក្សាទុករូបសំណាកនិងភស្ដុតាងប្រវត្តិសាស្ត្រកម្ពុជា ចំនួនជាង១ម៉ឺន៤ពាន់ តាំងពីសម័យបុរេប្រវត្តិ សម័យអង្គរ និងសម័យក្រោយៗមកទៀត។ សារមន្ទីរជាតិកសាងឡើងនៅឆ្នាំ ១៩១៧-១៩២០ ដែលមានទីតាំងជាប់ផ្នែកខាងជើងនៃព្រះបរមរាជវាំងក្នុងរាជធានីភ្នំពេញ។

៥. ផ្សាររាត្រី

ផ្សារនេះទទួលបានភាពពេញនិយមក្នុងស្រទាប់យុវវ័យនិងភ្ញៀវបរទេសជាច្រើន ដែលមានទីតាំងសិ្ថតនៅមាត់ទន្លេ។ ប្រជុំទៅដោយតូបលក់សម្លៀកបំពាក់, គ្រឿងបន្លាស់និងម្ហូបអាហារដោយមានការប្រគុំតន្រ្តីនៅចំកណ្តាលដែលមានការសម្តែងផ្ទាល់ដោយមានអ្នកចម្រៀងតន្រ្តីករនិងអ្នករបាំ។

៦. ការជិះទូកកម្សាន្តតាមមាត់ទន្លេ

ការធ្វើដំណើរកម្សាន្ដតាមទូកទេសចរណ៍នៅមុខព្រះបរមរាជវាំង ក៏ជាទីចាប់អារម្មណ៍ទាំងភ្ញៀវជាតិនិងអន្តរជាតិ។ ភ្ញៀវបរទេសមួយចំនួន ក្រោយពីដើរកម្សាន្ដនៅតាមទីកន្លែងផ្សេងៗក្នុងរាជធានីភ្នំពេញ ក៏ជ្រើសរើសការជិះទូកដើរកម្សាន្ដតាមដងទន្លេងសាប និងដងទន្លេមេគង្គ ដើម្បីគយគន់មើលទេសភាព និងសម្រស់ដ៏ស្រស់ត្រកាលនាពេលរាត្រីរបស់រាជធានីភ្នំពេញ។

៧. ព្រះបរមរាជវាំង

ព្រះបរមរាជវាំងជាទីតាំងទេសចរណ៍ដ៏ធំមួយក្នុងចំណោមទីតាំងភ្ញៀវទេសចរណ៍នៅរាជធានីភ្នំពេញ។ មុនផ្ទុះកូវីដ ភ្ញៀវទេសចរណ៍បរទេសបានចូលទៅទស្សនាយ៉ាងច្រើន ពីព្រោះវាជាទីតាំងតំបន់ទេសចរណ៍ដែលបង្ហាញពីវប្បធម៌ និងទំនៀមទម្លាប់ខ្មែរ និងក៏ជាទីប្រថាប់នៃព្រះមហាក្សត្រខ្មែរ ។

៨. ផ្សារទួលទំពួង

ផ្សារទួលទំពូង ដែលបរទេសស្គាល់ផ្សាររុស្សី ដោយសារក្នុងទសវត្សឆ្នាំ ១៩៨០ មានជនជាតិរុស្ស៊ីជាច្រើនចូលចិត្តមកទិញទំនិញផ្សេងៗនៅទីនេះ ហើយមានផលិតផលទំនិញមួយចំនួនក៏នាំមកពីរុស្សីមកលក់ដែរ។ ផ្សារនេះល្បីល្បាញសម្រាប់អ្នកស្វែងរកវត្ថុបុរាណ និងចំណីអាហារក្នុងស្រុក។ ក្រៅពីនេះក៏មានលក់វត្ថុអនុស្សាវរីយ៍ ដូចជារូបចម្លាក់ គ្រឿងអលង្ការ គ្រឿងមាស សំលៀកបំពាក់ជាដើម។

០៩. សារមន្ទីរគុកទួលស្លែង

សារមន្ទីរឧក្រិដ្ឋកម្មប្រល័យពូជសាសន៍ទួលស្លែង ឬសារមន្ទីរទួលស្លែង គឺជាសារមន្ទីរសម្រាប់ការចងចាំអំពើប្រល័យពូជសាសន៍នៅកម្ពុជា។ អតីតមន្ទីរសន្ដិសុខ ២១ នេះ ជាកន្លែងឃុំឃាំងសួរចម្លើយ និងធ្វើទារុណកម្មយ៉ាងព្រៃផ្សៃ និងសម្លាប់មនុស្ស។ មានរូបថត ហ៊្វីល សំណុំឯកសារសារភាពរបស់ជនរងគ្រោះ សម្ភារៈធ្វើទារុណកម្មត្រូវតាំងបង្ហាញជូនភ្ញៀវទស្សនា។ ជាមួយគ្នានេះផ្នូរសពជនរងគ្រោះចំនួន ១៤ នាក់ ដែលស្លាប់ចុងក្រោយគេ ក៏ត្រូវបានកប់នៅទីនោះផងដែរ។

១០. វត្តភ្នំ

វត្តភ្នំគឺជាបេះដូងនៃទីក្រុងភ្នំពេញ ហើយក៏ជាសំណង់សាសនាដែលមានកម្ពស់ខ្ពស់ជាងគេក្នុងទីក្រុងភ្នំពេញ។ ទីសក្តារៈនេះក៏មានប្រវត្តិដំណាលពីការកកើតទីក្រុងភ្នំពេញតាំងពីសម័យព្រះបាទពញាយ៉ាតនាឆ្នាំ ១៤៣៤ ដែលព្រះអង្គបានមកដល់ទីនេះ ហើយបានកសាងទីក្រុងមួយដោយយកឈ្មោះតាមកន្លែងនោះ។

នៅក្នុងបរិវេណវត្តភ្នំ មានចេតិយធំមួយនៅក្រោយព្រះវិហារ ដែលតម្កល់ព្រះធាតុរបស់ព្រះបាទពញាយ៉ាត និងចេតិយសម្រាប់តម្កល់ព្រះធាតុរបស់ព្រះញាតិវង្សព្រះអង្គ។ នៅក្នុងចេតីយ ក៏នៅមានសល់បដិមាព្រះពុទ្ធនៅសម័យអង្គរផងដែរ។

១១. មាត់ទន្លេ

មាត់ទន្លេ គឺជាកន្លែងដែលមានប្រជាប្រិយភាពមួយនៅរាជធានីភ្នំពេញ។ នៅទីនោះភ្ញៀវទេសចរអាចគយគន់ទេសភាពព្រះបរមរាជវាំង ចំណុចប្រសព្វនៃទន្លេទាំងបួន និងស្រូបយកខ្យល់ជំនោរដ៏បរិសុទ្ធដែលបក់តាមទន្លេ។ នាពេលព្រះអាទិត្យអស្ដង្គត ភ្ញៀវទេសចរអាចជិះទូកទស្សនាទីក្រុងភ្នំពេញដែលមានភ្លើងចម្រុះពណ៌ដ៏ស្រស់ស្អាតផងដែរ។

អត្ថបទ៖ ប៊ុណ្ណារ៉ា