​វិស័យ​វាយ​នភណ្ឌ​កាត់ដេរ​ និង​ផលិត​ស្បែក​ជើង​នៅ​តែ​ធន់រឹង​មាំ​ទ្រទ្រង់​កំណើន​សេដ្ឋកិច្ច​

វិស័យវាយនភណ្ឌកាត់ដេរ ផលិតផលស្បែកជើង និងកាបូបកម្ពុជា នៅតែជាវិស័យមានភាពធន់ខ្ពស់ និងបានរួមចំណែកសំខាន់ក្នុងការទ្រទ្រង់កំណើនសេដ្ឋកិច្ចជាតិ។

​លោក​ ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មមានប្រសាសន៍ នៅថ្ងៃទី ២១ ខែមីនានេះថា​ ការនាំ​ចេញ​ផលិតផល​ក្នុងវិស័យសម្លៀកបំពាក់ នៅក្នុងឆ្នាំ ២០២១ កើនឡើង ៨% ស្បែកជើងកើនឡើង ២៥% និងសម្ភារៈធ្វើដំណើរកើនឡើង ៥៥% ធៀបនឹង​ឆ្នាំ​២០២០។

សញ្ញាណងើបឡើងវិញនេះ បាន​បង្ហាញ​យ៉ាងច្បាស់ថា វិស័យកាត់ដេរ ស្បែកជើង​និងកាបូបនៅកម្ពុជា ពិតជាមានភាពធន់ខ្ពស់ និង​បាន​រួមចំណែកសំខាន់ក្នុងការទ្រទ្រង់កំណើនសេដ្ឋកិច្ចជាតិ បន្ទាប់ពីទទួលបានការជួយ​គាំទ្រ​ពីរាជ​រដ្ឋា​ភិបាល។

នៅក្នុងឆ្នាំ២០២១ ការនាំចេញវិស័យវាយនភណ្ឌកាត់ដេរ ផលិតស្បែកជើង និងផលិតផលិតផល​ធ្វើដំណើរ និងកាបូបកម្ពុជា គិតជាទឹកប្រាក់ មានចំនួនជិត១០ពាន់លានដុល្លារអាម៉េរិក ឬប្រមាណ​៦៣​ភាគរយនៃទឹកប្រាក់នាំចេញសរុបរបស់កម្ពុជា។

នៅក្នុងពិធីផ្សព្វផ្សាយ និងដាក់ឱ្យអនុវត្តនូវ “យុទ្ធសាស្រ្តអភិវឌ្ឍន៍វិស័យកាត់ដេរ ផលិតផល​ស្បែក​ជើង និងកាបូបកម្ពុជា ២០២២-២០២៧” កាលពី​ព្រឹក​ថ្ងៃទី២១ ខែមីនា ឆ្នាំ២០២២ លោក ប៉ាន សូរស័ក្តិ បានបញ្ជាក់ថា តាមរយៈការដាក់ចេញនូវវិធានការ​អន្តរាគមន៍​ទាន់​ពេល​​វេលា ចំទិសដៅ ជាពិសេសការដាក់ចេញ​នូវយុទ្ធ​សាស្រ្ត​វ៉ាក់​សាំង ដែលជាយុទ្ធសាស្រ្តគន្លឹះសម្រាប់ដំណើរការសកម្មភាពសង្គម-សេដ្ឋកិច្ច ដែលបានធានា​លំនឹង​ជីវភាពរស់នៅរបស់ប្រជាពលរដ្ឋ និងធុរកិច្ចរបស់វិស័យឯកជនជាតិនិងអន្តរជាតិ ដែលបាន​នាំ​ឱ្យ​សេដ្ឋកិច្ចកម្ពុជាស្ទុះងើបពីការធ្លាក់ចុះក្នុងអត្រា -៣,១% ក្នុងឆ្នាំ២០២០ មកកើនឡើងវិញក្នុងអត្រា ៣,០% នៅឆ្នាំ២០២១ និងគ្រោងបន្តកើនឡើងវិញក្នុងអត្រាប៉ាន់ស្មានប្រមាណ ៥,៦% ក្នុងឆ្នាំ២០២២ និង ៦,៥% ក្នុងឆ្នាំ២០២៣ ខាងមុខនេះ៕