ភូមិចំនួន ៧ នៅស្រុកបូទុមសាគរ បន្តទទួលបានអំពូលសូឡា សម្រាប់លើកកម្ពស់សុវត្ថិភាពពេលយប់

អាជ្ញាធរស្រុកបូទុមសាគរ បន្តផ្តល់ជាអំពូលសូឡា ដើរដោយថាមពលពន្លឺព្រះអាទិត្យ ទៅកាន់ភូមិចំនួន ៧ ក្នុងឃុំអណ្តូងទឹក ដើម្បីជួយលើកកម្ពស់សុវត្ថិភាពរាល់ការធ្វើដំណើរ និងសន្តិសុខសុវត្ថិភាពរបស់ប្រជាពលរដ្ឋ ទៅមកពេលរាត្រី។

លោក ហាក់ ឡេង អភិបាលស្រុកបូទុមសាគរ បានឲ្យដឹងនៅរសៀលថ្ងៃទី ៣០ ខែមីនា ឆ្នាំ ២០២២ថា អំពូលសូឡាចំនួន ១០០ផ្ទាំង ដែលទទួលបានពីការគៀងគរឧបត្ថម្ភ របស់សប្បុរសជនកន្លងទៅអាជ្ញាធរស្រុក នៅតែបន្តយុទ្ធនាការចែកជូនទៅកាន់បណ្តាភូមិចំនួន ៧ សម្រាប់ដំឡើងបំភ្លឺផ្លូវពេលយប់ជ្រៅងងឹត។

លោក ហាក់ ឡេង បានបន្ថែមថា នៅពេលមានអំពូលសូឡា នៅតាមខ្នងផ្ទះរបស់ពលរដ្ឋ គឺបញ្ហាជាច្រើនត្រូវបានកាត់បន្ថយជាអតិបរិមា រួមមាន៖ បទល្មើសលួចឆក់ គ្រោះថ្នាក់ចរាចរណ៍ សត្វពស់ខាំចក់ ព្រមទាំងលើកកម្ពស់សោភ័ណ្ឌភាពពេលរាត្រីផងដែរ។ ដូច្នេះទើបធ្វើឲ្យលោក ផ្តួចផ្តើមរៀបចំតាក់តែងពង្រាយដំឡើងអំពូលសូឡាទាំងអស់នេះ ឡើងក្នុងមូលដ្ឋាន។

គួររំលឹកថា ជាង ១ឆ្នាំកន្លងទៅ អាជ្ញាធរស្រុកបូទុមសាគរ បានដំឡើងអំពូលសូឡាជាង ៦០០ដើមហើយឆ្ពោះទៅកាន់បណ្តាឃុំទាំងអស់ ស្ថិតក្រោមដែនសមត្ថកិច្ចគ្រប់គ្រងរបស់ខ្លួន។ មូលដ្ឋានដែលទទួលអំពូលសូឡាច្រើនជាង គឺឃុំអណ្តូងទឹក និងឃុំកណ្តោល ទទួលបានអំពូលសូឡាច្រើនជាងឃុំផ្សេងៗ ពីព្រោះឃុំ ២នេះ មានមនុស្សរស់នៅចរាចរណ៍ច្រើន។

លោក ឃៀង យិង មេឃុំអណ្តូងទឹក និងប្រជាពលរដ្ឋ បង្ហាញក្តីសប្បាយយ៉ាងខ្លាំង ដែលជាតម្រូវការចាំបាច់សម្រាប់ពួកគាត់រស់នៅ ឬធ្វើដំណើរទៅមកពេលយប់។ ពលរដ្ឋក៏ទទួលស្គាល់ដែរថា ពេលមានអំពូលភ្លឺចែងចាំងបែបនេះ អាចកាត់បន្ថយបទល្មើសផ្សេងៗ ជំនួសមកវិញនូវភាពកក់ក្តៅ ចំពោះការរស់នៅក្នុងមូលដ្ឋាន៕

អត្ថបទ៖ សិរីវឌ្ឍនៈ