ព័ត៌មានជាតិ
អនុប្រធានមន្ទីរកសិកម្មខេត្តកំពង់ស្ពឺ និងនាយខណ្ឌរដ្ឋបាលព្រៃឈើ រងការរិះគន់ពីក្រុមហ៊ុនចិនមួយ
យោងតាមប្រភពដែលទទួលបាន គឺក្រុមហ៊ុនអភិវឌ្ឍរបស់ចិនមួយ ដែលបានមកបណ្ដាក់ទុនរកស៊ី បង្កើតការងារឲ្យប្រជាពលរដ្ឋនៅក្នុងខេត្តកំពង់ស្ពឺ កំពុងតែបង្ហាញក្តីកង្វល់អំពីការអភិវឌ្ឍរបស់ខ្លួន ត្បិតតែមន្ត្រីផ្នែកកសិកម្ម និងមេព្រៃបានរួមដៃគ្នាធ្វើទុក្ខបុកម្នេញ ចំពោះក្រុមហ៊ុនមិនចេះឈប់ឈរ។ ករណីនេះ តំណាងក្រុមហ៊ុនកំពុងតែពិចារណា ដើម្បីដាក់ពាក្យបណ្ដឹងទៅស្ថាប័នមានសមត្ថកិច្ច ជាពិសេសស្នើសុំឲ្យលោករដ្ឋមន្ត្រីក្រសួងកសិកម្ម ជួយអន្តរាគមន៍ផងដែរ។
ជាក់ស្ដែងកាលពីថ្ងៃទី ១២ ខែមេសា ឆ្នាំ ២០២២ មុនចូលឆ្នាំខ្មែរគេបានឃើញវត្តមានលោក យឹម ណន អនុប្រធានមន្ទីរកសិកម្មខេត្តកំពង់ស្ពឺ និងលោក ផល មុនី នាយខណ្ឌរដ្ឋបាលព្រៃឈើកំពង់ស្ពឺ បានចុះទៅដល់ទីតាំងដីរបស់ក្រុមហ៊ុន ស្ថិតនៅក្នុងឃុំទំព័រមាស ស្រុកសំរោងទង ខេត្តកំពង់ស្ពឺ ដែលកំពុងធ្វើការសម្អាតដើម្បីអភិវឌ្ឍន៍។ វត្តមានរបស់លោកទាំងពីរ ដែលចុះទៅដល់ទីតាំងដីនេះ ត្រូវបានប្រភពប្រាប់ថា លោកចុះមកធ្វើការ និងបញ្ឈប់មិនឲ្យមានការសម្អាតដីរបស់ក្រុមហ៊ុនឡើយ មិនដឹងថា ក្រោមហេតុផលអ្វី ឬទទួលបានបេសកកម្មពីថ្នាក់ដឹកនាំណានោះទេ ទើបលោកទាំងពីរចុះមកធ្វើសកម្មភាពបែបនេះ។
លោក អ៊ុង គង្គា តំណាងក្រុមហ៊ុនចិនខាងលើ បានឲ្យដឹងនៅថ្ងៃទី ១៣ ខែមេសា ឆ្នាំ ២០២២ថា លោកពិតជាមិនយល់ទាល់តែសោះថា ហេតុអ្វីបានជាលោក យឹម ណន និងលោក ផល មុនី ចេះតែមករករឿងក្រុមហ៊ុនម្ដងហើយម្ដងទៀត។ លោក អ៊ុង គង្គា បានបន្តថា លោកពិតជាមិនយល់ និងមានចម្ងល់យ៉ាងខ្លាំងចំពោះរឿងនេះ ក្រុមហ៊ុនចូលមក គឺមកធ្វើការអភិវឌ្ឍយ៉ាងស្របច្បាប់ហើយ បែរជាមកជួបរឿងបែបនេះទៅវិញ។
លោកបន្តថា ហេតុអ្វីបានជាមករារាំងការសម្អាតដីរបស់ក្រុមហ៊ុនទៅវិញ? តាមរយៈលោកបានខិតខំកៀងគរវិនិយោគចិន មកធ្វើការអភិវឌ្ឍនៅក្នុងទឹកដីខេត្តកំពង់ស្ពឺនេះ ដល់ពេលមកជួបរឿងបែបនេះ លោកក៏ដូចជានាយកក្រុមហ៊ុនពិតជាមិនយល់ទាល់តែសោះ។
លោក អ៊ុង គង្គា បានបន្តទៀតថា ក្រុមហ៊ុនចូលមកវិនិយោគ គឺបានទិញដីពីប្រជាពលរដ្ឋក្នុងមូលដ្ឋានដោយផ្ទាល់ត្រឹមត្រូវតាមច្បាប់ បើទោះជាបែបនេះក្តីក៏នៅតែមានពាក្យចោទប្រកាន់ ពីជំនាញកសិកម្មថា ក្រុមហ៊ុនចូលមកលួចដីរដ្ឋទៅវិញ លោកចង់សួរថា សម័យនេះហើយបើមិនទិញដីពីប្រជាពលរដ្ឋទេ ប្រជាពលរដ្ឋមិននៅស្ងៀមឲ្យគេដណ្ដើមយកដីគាត់ឡើយ គឺច្បាស់ជាមានការតវ៉ាពីប្រជាពលរដ្ឋមិនខាន តែមកដល់ពេលនេះមិនមានតវ៉ាអ្វីឡើយ តែបែរជាមានមន្ត្រីកសិកម្ម និងមេព្រៃខាងលើទៅវិញ។
ដោយមិនអស់ចិត្ត លោកផ្ទាល់បានទូរស័ព្ទទៅលោក ឈាង តុលា ប្រធានមន្ទីរកសិកម្មខេត្តកំពង់ស្ពឺ ដើម្បីសួរនាំ ស្រាប់ តែត្រូវលោក ឈាង តុលា ប្រើប្រាស់ពាក្យសម្ដីមិនសមរម្យយ៉ាងអសុរោះបំផុត មកលើរូបលោក និងចោទប្រកាន់ថា ក្រុមហ៊ុនចូលមកលួចដីរដ្ឋ ដោយការចោទប្រកាន់នេះ លោកមិនអាចទទួលយកបានឡើយ។ ចំពោះករណីនេះ ខាងក្រុមហ៊ុននឹងរៀបចំដាក់ពាក្យបណ្ដឹង ទៅស្ថាប័នមានសមត្ថកិច្ចពាក់ព័ន្ធ ដើម្បីចាត់ការតាមនីតិវិធី។
លោក អ៊ុង គង្គា តំណាងក្រុមហ៊ុនចិន បានឲ្យដឹងទៀតថា ក្រុមហ៊ុនចូលមកអភិវឌ្ឍ គឺចង់ឲ្យមានការរីកចម្រើនក្នុងមូល ដ្ឋានខេត្តកំពង់ស្ពឺនេះ ហើយក្រុមហ៊ុនក៏ចង់ឲ្យប្រជាពលរដ្ឋនៅតំបន់នោះ មានការងារធ្វើដែរ។ ក្នុងនាមជាតំណាងក្រុមហ៊ុនលោក អ៊ុង គង្គា បានស្នើសុំទៅលោករដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ជួយពិនិត្យមើលសកម្មភាព របស់មន្ត្រីក្រោមឱវាទទាំងពីររូបនេះផង។ ចំណែកឯលោក ឈាង តុលា ក៏ដូចគ្នាក្នុងនាមជាថ្នាក់ដឹកនាំមន្ទីរមួយរូប មិនគួរណាធ្វើការជេរប្រមាថមកលើរូបលោកបែបនេះទេ។
ពាក់ព័ន្ធនឹងការលើកឡើងខាងលើ អ្នកយកព័ត៌មានកម្ពុជាថ្មី បានព្យាយាមសុំការពន្យល់បកស្រាយពីលោក យឹម ណន និងលោក ឈាង តុលា ប្រធានមន្ទីរកសិកម្មខេត្តកំពង់ស្ពឺ តាមរយៈប្រព័ន្ធទូរស័ព្ទដែរ តែមិនអាចទំនាក់ទំនងបានឡើយ ៕
អត្ថបទ៖ មករា
-
ព័ត៌មានជាតិ១ សប្តាហ៍ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ៣ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានជាតិ៨ ម៉ោង ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានអន្ដរជាតិ១ សប្តាហ៍ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
កីឡា៤ ថ្ងៃ ago
ជើងឯកម៉ុងហ្គោលី Erdene អរគុណបុរសធ្លាប់ដឹកដៃ ឈឿង ល្វៃ ធ្វើឲ្យក្តីស្រមៃក្លាយជាការពិត
-
ជីវិតកម្សាន្ដ៣ ថ្ងៃ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»
-
ព័ត៌មានជាតិ៧ ថ្ងៃ ago
សម្តេច ហ៊ុន សែន ៖ ហេតុអ្វីបានជាមកដល់ពេលនេះហើយមានមន្ត្រីយើងប្រព្រឹត្តបែបនេះ ដោយពាក់ស្បែកជើងចូលក្នុងព្រះវិហារ?
-
សន្តិសុខសង្គម៥ ថ្ងៃ ago
បឋម៖ អគ្គិភ័យកំពុងឆេះរោងចក្រជិតផ្សារបែកចាន (មានវីដេអូ)