កសិករចិញ្ចឹមទាសំពៅយកពងលក់បានថ្លៃដោយ​សារការឲ្យចំណីស្រូវនិងលែងឲ្យស៊ីសត្វល្អិតតាម​វាលស្រែ

អ្នកប្រកបរបរចិញ្ចឹមសត្វទាយកពងទុកលក់បាននិយាយដូចៗគ្នាថា ការចិញ្ចឹមសត្វទាសំពៅដែលឲ្យសុីស្រូវ និងសត្វល្អិតតាមវាលស្រែ គឺបានពង(ស៊ុត)ល្អនិងថែមទាំងលក់បានថ្លៃទៀតផង។

បងប្រុស ដុន ថាន បាននិយាយថា​ សព្វថ្ងៃបងប្រុសបានចាប់អាជីពចិញ្ចឹមទាយកពងទុកលក់អស់រយះពេលជាង​៣ឆ្នាំ​មកហើយ បន្ទាប់ពីបងប្រុសបានត្រឡប់ពីសុីឈ្នួលបេះផ្លែឈើឲ្យគេនៅប្រទេសថៃមក។

បងប្រុសបន្ថែមថា ពីដំបូងឡើយគាត់បានចិញ្ចឹមសត្វទាដោយប្រើចំណីប្រើថ្នាំ និងចំណីទិញមកពីផ្សារដែលធ្វើឲ្យទាឆាប់ធំហើយពងបានលឿន ប៉ុន្តែពងដែលបានមក គឺពុំមានរសជាតិហើយពងមិនសូវក្រហមដែលធ្វើឲ្យម៉ូយមិនកុម្មង់ទិញដូច្នេះហើយទើបគាត់ងាកមកចិញ្ចឹមឲ្យសុីស្រូវ និងព្រលែងឲ្យសុីសត្វល្អិតតាមវាលស្រែវិញ។ អ្វីដែលធ្វើឲ្យការចិញ្ចឹមសត្វទាយកពងទុកលក់បែបរាល់ថ្ងៃនេះ គឺអំណោយផលខ្លាំងដោយដីស្រែរបស់ប្រជាពលរដ្ឋក្នុងភូមិលោកមិនទាន់ដាំដុះស្រូវ។

កសិករដដែលបានបញ្ជាក់ទៀតថា សត្វទាដែលគាត់ចិញ្ចឹមរាល់ថ្ងៃមានចំនួន៤០០០ក្បាល ហើយក្នុងមួយយប់ទារបស់គាត់បានពងមិនក្រោម៣០០០ទៅ៣៥០០គ្រាប់។ ហើយតម្លៃលក់ដែលឈ្មួញមកទិញដល់កសិដ្ឋានរបស់គាត់ក្នុង១គ្រាប់៤០០រៀល។ ទីតាំងដែលគាត់ចិញ្ចឹមគឺស្ថិតនៅភូមិក្រាំងដៃឃុំធ្លកស្រុកទ្រាំងខេត្តតាកែវ៕

អត្ថបទ៖ នរា