សៀវភៅស្តីពី ជីវិត និងការងាររបស់ឧត្តមសេនីយ៍ឯក ហ៊ុន ម៉ាណែត នឹងត្រូវ​បញ្ចប់​ការ​រៀប​រៀង​អំឡុង​ខែសីហា

អ្នកនិពន្ធ ពៅ សុខ ដែលបច្ចុចប្បន្នជាទីប្រឹក្សាសម្តេចតេជោ ហ៊ុន សែន នាយក​រដ្ឋមន្ត្រីនៃកម្ពុជា និង​ជាសមាជិកក្រុមប្រឹក្សាភិបាល នៃសមាគមអ្នកនិពន្ធខ្មែរ បានឲ្យដឹងថា លោកនឹងបញ្ចប់ការរៀប​រៀង​ជំហាន​ដំបូងនៃសៀវសភៅ ស្តីពី ជីវប្រវត្តិសង្ខេប ឯកឧត្តមឧត្តមសេនីយ៍ឯក ហ៊ុន ម៉ាណែត អគ្គ​មេ​បញ្ជាការរង នៃកង​យោធពលខេមរភូមិន្ទ និងជាមេបញ្ជាការកងទ័ពជើងគោក នៅអំឡុងខែសីហា ឆ្នាំ ២០២២ខាងមុខនេះ។

លោក ពៅ សុខ ដែលបានរៀបរៀងសៀវភៅ ស្តីពី ជីវិត និងកិច្ចការប្រទេសជាតិរបស់ថ្នាក់ដឹកនាំ (សម្តេច ហ៊ុន សែន) បានប្រ​មាណ ៥ចំណងជើងហើយនោះ បានបន្តឲ្យដឹងថា ចាប់ពីចុងខែធ្នូ ឆ្នាំ ២០២១ បន្ទាប់ពីសម្តេចតេជោនាយករដ្ឋមន្រ្តី ប្រកាសគាំទ្រឯកឧត្តម ហ៊ុន ម៉ាណែត ជាបេក្ខភាព​នាយករដ្ឋមន្រ្តីនាអនាគត រហូតមក​​ដល់​ពេលនេះ លោកបានប្រមូលទិន្នន័យឯកសារផ្សេងៗ ទាក់ទង នឹងជីវិតការសិក្សា និងការងាររបស់ឯកឧត្តម ហ៊ុន ម៉ាណែត បានប្រមាណជាង ៧ពាន់ទំព័រ ហើយ ដែលកាលពីអំឡុងមុនថ្ងៃចូលឆ្នាំខ្មែរ កាលពីពាក់កណ្តាល​ខែមេសា ២០២២ ទិន្នន័យមានតែ​ជាង ៣​ពាន់ទំព័រប៉ុណ្ណោះ។

លោក ពៅ សុខ អះអាងថា បន្ទាប់ពីការស្រាជ្រាវទាំងលើឯកសារដែលមានស្រាប់ ការចុះទៅ​ដល់​ទីតាំងផ្ទាល់ និងការ ជួបអ្នកដែលធ្លាប់ស្គាល់ ឯកឧត្តម ហ៊ុន ម៉ាណែត មួយចំនួន គឺឯកឧត្តម ឧត្តម​សេនីយ៍ឯក មានគុណតម្លៃ និងគុណ​​សម្បត្តិចំនួន៣ធំៗ ទី១ គឺការកែសម្រួល ឬកែទម្រង់វិស័យកងទ័ព ទី២ វត្តមានរបស់ឯកឧត្តម ហ៊ុន ម៉ាណែត នៅសមរភូមិព្រំដែន ធ្វើឲ្យមានការចរចាសម្របសម្រួល ជម្លោះ​ព្រំដែនកម្ពុជា-ថៃ កាលពីឆ្នាំ ២០០៨ ដល់ ២០១៣ និងនៅព្រំ​ដែនឡាវ អំឡុងឆ្នាំ ២០១៧ កន្លង មក។ ទី៣ ដែលក៏ជាគុណសម្បត្តិដ៏ធំ​ធេង របស់​ឯកឧត្តមដែរនោះ គឺវត្តមានរបស់​ឯកឧត្តម ហ៊ុន ម៉ាណែត នៅក្នុងកិច្ចការប្រយុទ្ធប្រឆាំងជំងឺកូវីដ-១៩ តែម្តង។

លោកពៅ សុខ បញ្ជាក់ថា លោកមិនធ្លាប់ជួបឯកឧត្តម ហ៊ុន ម៉ាណែត ទេពីមុនមក។ ប៉ុន្តែកាលពី ៨​ឆ្នាំមុន គឺនៅ​ថ្ងៃទី ៣០ ខែមីនា ឆ្នាំ ២០១៤ ខណៈពេលនយោបាយនៅកម្ពុជា មិនទាន់បាន​ធូរស្រាល​នៅឡើយនោះ លោកបាន​ជួប និងទទួលទានអាហារថ្ងៃត្រង់រួមគ្នាជាមួយឯកឧត្តម ម៉ាណែត ម្តង នៅភោជនីយដ្ឋានវាន់ម៉ (One More) ហើយ​ចាប់ពីពេលនោះហើយ ដែលលោក មានផែនការ​សរ​សេរសៀវភៅ ស្តីពី ជីវប្រវត្តិឯកឧត្តម ហ៊ុន ម៉ាណែត ដោយ​ប្រើចំណងជើងថា កូនប្រុសច្បងដ៏មាន​ឥទ្ធិពលនេះ។

លោក ពៅ សុខ បង្ហើបឲ្យដឹងទៀតថា ក្នុងជំនួបអាហារថ្ងៃត្រង់នោះឯកឧត្តម ហ៊ុន ម៉ាណែត ធ្លាប់​មានគំនិតបង្កើតកិច្ចការសង្គមចំនួនពីរ គឺការជិះកង់សាមគ្គី និងការស្លៀកពាក់ខ្មៅ ចែកបបររាវ ដល់ប្រជាជនកម្ពុជា នៅរៀងរាល់​ថ្ងៃ ៧មករា ដើម្បីរម្លឹកអនុស្សាវរីយ៍ដ៏ជូរចត់របស់ប្រជាជនកម្ពុជា ដែលរងគ្រោះដោយរបបប្រល័យ​ពូជសាសន៍​ប៉ុលពត ពីឆ្នាំ ១៩៧៥ ដល់ឆ្នាំ ១៩៧៩។ ប៉ុន្តែ ក្នុង​ចំណោមផែការទាំងពីរនេះ មានតែផែនការមួប៉ុណ្ណោះ ដែល​បានដំណើរការ គឺការជិះកង់សាមគ្កី។ ការជិះកង់សាមគ្គី ដែលជារឿយៗ ធ្វើនៅទីក្រុងសៀមរាប គឺដើម្បីបង្ហាញពី​សាមគ្គីភាព​របស់​ប្រជា​ជនកម្ពុជាទាំងអស់ ដែលមានទស្សនៈផ្ទុយគ្នា ឬប្រាសចាកគ្នាជាយូរ ឬជាច្រើន​សតវត្សរ៍​មក​ហើយ​នោះ។

លោកពៅ សុខ បានបញ្ជាក់ថា តាមការគ្រោងទុកសៀវភៅនេះ នឹងត្រូវបោះពុម្ពផ្សាយជាសាធារណាៈ នៅចុងឆ្នាំ ២០២២ ឬយូរបំផុត ដើមឆ្នាំ ២០២៣៕