សម្តេចតេជោ ហ៊ុន សែន៖ កម្ពុជាចាត់ទុកទឹកថា “មាស ស” ជំរុញការអភិវឌ្ឍសេដ្ឋកិច្ច-សង្គម ប្រកបដោយចីរភាព

មានប្រសាសន៏នៅក្នុងកិច្ចប្រជុំកំពូលលើកទី៤ ស្ដីពី “បញ្ហាទឹកក្នុងតំបន់អាស៊ី-ប៉ាស៊ីហ្វិក” ក្រោមមូលបទ “ធនធានទឹកសម្រាប់ការអភិវឌ្ឍប្រកបដោយចីរភាព៖ ឧត្តមានុវត្តន៍ និងអ្នកបន្តវេនជំនាន់ក្រោយ” នៅទីក្រុង ខឹម៉ាមូតុ ប្រទេសជប៉ុន នាព្រឹកថ្ងៃទី២៣ ខែមេសា នេះ សម្តេចតេជោ ហ៊ុន សែន កម្ពុជាបានចាត់ទុកទឹកថា “មាស ស” ដែលជាកម្លាំងចលករជំរុញការអភិវឌ្ឍ និងវឌ្ឍនភាពសេដ្ឋកិច្ចសង្គម ប្រកបដោយចីរភាព និងបរិយាបន្ន ហើយរាជរដ្ឋាភិបាលកម្ពុជា តែងទទួលស្គាល់អំពីសារសំខាន់ជាយុទ្ធសាស្ត និងផ្តល់អាទិភាពខ្ពស់ចំពោះវិស័យធនធានទឹក សំដៅជំរុញការគ្រប់គ្រងធនធានទឹកឱ្យកាន់តែប្រសើរ ធានាបាននូវសន្តិសុខទឹកក្នុងក្របខណ្ឌទូទាំងប្រទេស។

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអះអាងទៀតថា កម្ពុជានឹងបន្តកិច្ចសហការជាមួយគ្រប់ភាគីពាក់ព័ន្ធក្រោមយន្តការតំបន់ និងសកល ដើម្បីពង្រឹង និងលើកកម្ពស់អភិបាលកិច្ច និងការគ្រប់គ្រងធនធានទឹក និងអាងទន្លេឆ្លងដែន ឱ្យកាន់តែមានប្រសិទ្ធភាពថែមទៀត ក្នុងការឈានទៅសម្រេចគោលដៅ “ទឹកដើម្បី ការអភិវឌ្ឍប្រកបដោយចីរភាព”។ សម្តេចនាយករដ្ឋមន្ត្រី មានជំនឿយ៉ាងមុតមាំថា ឆន្ទៈនយោបាយកម្រិតខ្ពស់, ការខិតខំប្រឹងប្រែង និងការធ្វើសកម្មភាពរួមគ្នារបស់យើង នឹងធានាបាននូវជោគជ័យក្នុងការសម្រេចគោលដៅខាងលើ។

បើតាមសម្តេចតេជោ ហ៊ុន សែន កម្ពុជាទន្ទឹងរង់ចាំលទ្ធផលប្រកបដោយផ្លែផ្កា នៃកិច្ចប្រជុំកំពូលលើកទី៤ ស្តីពីបញ្ហាទឹកនៅតំបន់អាស៊ី-ប៉ាស៊ីហ្វិក ជាមួយនឹង “សេចក្តីប្រកាសក្រុងខឹម៉ាមូតុ” ដែលនឹងក្លាយជាឯកសារបង្ហាញផ្លូវដ៏មានសារសំខាន់សម្រាប់ពង្រឹងកិច្ចខិតខំប្រឹងប្រែងរួមគ្នារបស់យើង ដែលធានាឱ្យបាននូវការប្រើប្រាស់, ការអភិវឌ្ឍ និងការគ្រប់គ្រងទឹក ប្រកបដោយចីរភាព និងបរិយាប័ន្ន សម្រាប់មនុស្សជាតិគ្រប់ជំនាន់។

សម្តេចតេជោ ហ៊ុន សែន បានមានប្រសាសន៍ដែរថា ទឹកគឺជាធនធានដ៏មានសារសំខាន់សម្រាប់ការអភិវឌ្ឍ និងការរស់នៅប្រកបដោយគុណភាព ប៉ុន្តែធនធាននេះពីមួយថ្ងៃទៅមួយថ្ងៃ កាន់តែកម្រទៅៗ ដោយសារសកម្មភាពរបស់មនុស្ស ធ្វើឱ្យប៉ះពាល់ជាអវិជ្ជមានដល់ប្រភព និងគុណភាពទឹក, ការប្រែប្រួលអាកាសធាតុ, គ្រោះទឹកជំនន់ និងភាពរាំងស្លូត, ការកើនឡើងនូវចំនួនប្រជាជន និងការបន្តរីកចំរើនយ៉ាងឆាប់រហ័ស ដែលបាននិងកំពុងបន្តដាក់សម្ពាធដល់ធនធានទឹក និងប្រព័ន្ធអេកូឡូស៊ី ដែលទ្រទ្រង់ប្រភពទឹកផងដែរ៕ កោះកែវ