ប៉ៃលិនធ្លាប់ជាតំបន់ក្តៅ ឥឡូវរីកលូតលាស់​ហេដ្ឋារចនាសម្ព័ន្ធ​សំណង់អគារ

ការអភិវឌ្ឍទីក្រុងប៉ៃលិន គឺធ្វើឡើងស្របទៅតាមគោលនយោបាយអភិវឌ្ឍប្រទេសជាតិ ដែលបច្ចុប្បន្ននេះ មានការរីកចម្រើនទៅលើហេដ្ឋារចនាសម្ព័ន្ធនានា ដូចជា ផ្លូវ ស្ពាន សាលារៀន មន្ទីរពេទ្យ វត្តអារាម ប្រព័ន្ធធារាសាស្រ្ត ទឹកស្អាត និងអគ្គិសនីជាដើម។ បច្ចុប្បន្ននេះ ខេត្តប៉ៃលិន ក៏ខិតខំកែលម្អសោភ័ណភាពខេត្ត ជាពិសេសតំបន់ទេសចរណ៍ដើម្បីចូលរួមចំណែកដល់កំណើនសេដ្ឋកិច្ចជាតិ និងលើកស្ទួយជីវភាពពលរដ្ឋនៅក្នុងតំបន់ឱ្យបានប្រសើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធនឹងខេត្តប៉ៃលិននេះ សម្តេចតេជោ ហ៊ុន សែន នាយករដ្ឋមន្រ្តី បានលើកឡើងនៅពេលដែលជួបជាមួយមន្រ្តី អ៊ុនតាក់ នាពេលថ្មីៗនេះថា ខេត្តប៉ៃលិន ពីមុនជាតំបន់សង្គ្រាមគំរាមភ្នំព្រឹក រហូតដល់ម៉ាល័យ សំពៅលូន ដែលពេលនោះទាំងប្រធាន អនុប្រធានអ៊ុនតាក់ មេបញ្ជាការយោធាអ៊ុនតាក់ ត្រូវបានទាហានខ្មែរក្រហមហាមឃាត់ ដោយដាក់ឬស្សីមួយដើមពាំងផ្លូវមិនឱ្យចូល។ ប៉ុន្តែសម្តេចថា ឥឡូវនេះ ក្រោយបញ្ចប់សង្រ្គាមប្រទេសមានសុខសន្តិភាព នៅខេត្តប៉ៃលិន បានប្រែមុខមាត់ថ្មី មានទាំងសំណង់អគារខ្ពស់ៗ សាលារៀនបីបួនជាន់ ជាអំណាយរបស់សម្តេច។

សម្តេចសង្កត់ធ្ងន់ថា សន្តិភាពពិបាករកខ្លាំងណាស់ បើចង់ការពារវិស័យផ្សេងៗ ដែលកំពុងរីកលូតលាស់នេះបានល្អ ត្រូវចូលរួមការពារសន្តិភាព។

ទាក់ទងនឹងការអភិវឌ្ឍខេត្តប៉ៃលិននេះដែរ លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចនវត្ថុកម្ពុជា បានមើលឃើញថា ខេត្តនៅជាប់ជាយដែនមួយនេះ កំពុងមានការរីកចម្រើន តាមរយៈការសាង់សង់អគារ អភិវឌ្ឍខឿនសេដ្ឋកិច្ចនៅក្នុងតំបន់។ លោកថា ដើម្បីឱ្យខេត្តប៉ៃលិន កាន់តែរីកលូតលាស់បានលឿនថែមទៀត ទាមទារឱ្យរដ្ឋាភិបាល កៀរគរ អ្នកវិនិយោគក្នុងស្រុក និងអន្តរជាតិ ចូលទៅអភិវឌ្ឍ ធ្វើដូច្នេះលំហូរនៃការអភិវឌ្ឍនឹងរីកចម្រើនកាន់តែខ្លាំងនាពេលអនាគត៕