ចាប់ខ្លួនពលករខ្មែរពីរនាក់ក្លែងជាព្រះសង្ឃបិណ្ឌបាតក្នុងប្រទេសថៃ

យុវជនខ្មែរចំនួន២នាក់ ត្រូវបានកម្លាំងអន្តោប្រវេសន៍ខេត្តសមុទ្រប្រាកាន តាមឃាត់ខ្លួនដល់ក្នុងព្រៃ ខណ:ដែលពួកគេទាំង២នាក់ បានសំងំលាក់ខ្លួនធ្វើជាសង្ឃដើម្បីដើរបិណ្ឌបាតយកបច្ច័យពីអ្នកភូមិ។

យោងតាមសារព័ត៌មានក្នុងប្រទេសថៃបានសរសេរថា ការឃាត់ខ្លួនសង្ឃក្លែងក្លាយនេះ បានធ្វើឡើងកាលពីវេលាម៉ោង១ និង៣០នាទី រសៀលថ្ងៃទី១ ខែឧសភា ឆ្នាំ២០២២ នៅក្នុងព្រៃរបោះមួយកន្លែង ស្ថិតនៅខាងក្រោយផ្សារណាត់សុីរ៉ាក់ ក្នុងឃុំថាយបានម៉ៃ ស្រុកមឿង ខេត្តសមុទ្រប្រាកាន ប្រទេសថៃ។

ពួកគេទាំង២នាក់មានឈ្មោះ រ៉ាត់ អាយុ២៧ឆ្នាំ និងឈ្មោះ សុីណា អាយុ៣០ឆ្នាំ ជាពលករខ្មែរ លួចឆ្លងដែនខុសច្បាប់ នៅក្នុងពេលនោះដែរ កម្លាំងតម្រួតថៃបានដកហូតវត្ថុតាងមួយចំនួនរួមមាន ក្រដាសប្រាក់ប្រភេទ២០បាត និង១០០បាត ជាច្រើនសន្លឹក ស្បង់ជីពរ និងគ្រឿងតែងកាយជាសង្ឃមួយចំនួន ដោយក្នុងនោះគេសង្គេតឃើញមាន កន្ទេលក្រាលដេក មុងចងការពារមូស និងសំបកដបស្រាបៀរជាច្រើនថែមទៀត។

ក្រោយការឃាត់ខ្លួនពួកគេបានសារភាពថា គេបានឆ្លងដែនទាំងគ្រងស្បង់ជីពរ ប្រមាណជិត១០នាក់ រួចនាំគ្នាឡើង​ជិះរថយន្ដក្រុងឆ្ពោះទៅកាន់ខេត្តសមុទ្រប្រាកាន ដោយបានបំបែកគ្នារស់នៅតាមគុម្ពោធព្រៃ ដោយព្រឹកឡើងនាំគ្នាចេញបិណ្ឌបាតតាមភូមិ បានបាយ ម្ហូប និងលុយចាប់ពី៤០០ ទៅ៥០០បាត ក្នុង១ថ្ងៃ លុះពេលល្ងាច គេនាំគ្នាស្លៀក ពាក់ខោអាវ ពាក់មួក ចេញទៅទិញស្រាបៀរមកផឹកលេង។

ក្រោយពីបានសាកសួររួចមក សមត្ថកិច្ចថៃបានបញ្ជូនពួកគេទៅកាន់ស្នងការខេត្ត ដើម្បីអនុវត្តន៍តាមផ្លូវច្បាប់ ពាក់ព័ន្ធនឹងការលួឆ្លងដែនខុសច្បាប់ និងការក្លែងកាយជាព្រះសង្ឃ៕

អត្ថបទ៖ សោ និយមរ័ត្ន