ក្រុមគ្រូពេទ្យស្ម័គ្រចិត្ត លោក ហ៊ុន ម៉ានី ព្យាបាលជំងឺមិនគិតប្រាក់ ជូនពលរដ្ឋជាង ៥ ០០០ នាក់

ប្រជាពលរដ្ឋជាង ៥ ពាន់នាក់ មកពីឃុំ៩ ក្នុងស្រុកកំពង់លែង ខេត្តកំពង់ឆ្នាំង បានទទួលការពិនិត្យសុខភាព និងព្យាបាលជំងឺពីក្រុមគ្រូពេទ្យស្ម័គ្រចិត្តរបស់ លោក ហ៊ុន ម៉ានី ជាង ៤០០ នាក់ ដោយពិនិត្យមិនគិតប្រាក់ នៅក្នុងវិទ្យាល័យ ហ៊ុន សែន កំពង់លែង ស្ថិតក្នុងភូមិកំពង់បឹង ឃុំកំពង់ហៅ ស្រុកកំពង់លែង។

រួមជាមួយនឹងការចាក់វ៉ាក់សាំងជំងឺកូវីដ-១៩ ជាដូសមូលដ្ឋាន និងដូសជម្រុញ ជូនប្រជាពលរដ្ឋផងដែរ ដែលដឹកនាំដោយលោក លេង ផាលី រដ្ឋលេខាធិការក្រសួងផែនការ និងជាប្រធានប្រតិបត្តិក្រុមការងារគ្រូពេទ្យស្មគ្រចិត្ត របស់លោក ហ៊ុន ម៉ានី។

លោក ស៊ុន សុវណ្ណារិទ្ធ អភិបាលនៃគណៈអភិបាលខេត្តកំពង់ឆ្នាំង បានថ្លែងថា ក្រុមគ្រូពេទ្យស្ម័គ្រចិត្តរបស់ឯកឧត្តម ហ៊ុន ម៉ានី បានចុះពិនិត្យ និងព្យាបាលជំងឺជូនប្រជាពលរដ្ឋដោយមិនគិតប្រាក់ ជិត ៧ពាន់នាក់ នៅវិទ្យាល័យក្រុងកំពង់ឆ្នាំង រួចម្ដងមកហើយ។ ក្នុងពេលនេះដោយមានការស្នើសុំពីរដ្ឋបាលខេត្តកំពង់ឆ្នាំង ក្រុមគ្រូពេទ្យស្ម័គ្រចិត្តជាង ៤០០ នាក់ របស់ឯកឧត្តម ហ៊ុន ម៉ានី បានចុះមកពិនិត្យនិងព្យាបាលជំងឺជូនប្រជាពលរដ្ឋម្ដងទៀត ដោយមិនគិតប្រាក់ឡើយ។

ក្នុងនាម គណៈអភិបាលខេត្ត  ក្រុម ប្រឹក្សាខេត្ត រដ្ឋបាល ស្រុកកំពង់លែង និងរដ្ឋបាលឃុំទាំង៩ លោកអភិបាលខេត្ត សូមថ្លែងអំណរគុណដល់ក្រុមគ្រូពេទ្យ ពិសេស លោក ហ៊ុន ម៉ានី ដែលបានយកចិត្តទុកដាក់គិតគូរពីសុខភាពប្រជាពលរដ្ឋ និងបានជួយបញ្ជូនក្រុមគ្រូពេទ្យជាង ៤០០ នាក់មកពិនិត្យព្យាបាលជំងឺជូនប្រជាពលរដ្ឋ៕

អត្ថបទ៖ ឈៀង ថារិទ្ធ