ផលិតករល្បីមួយរូប ចង់ឃើញភាពយន្តខ្មែរ​បច្ចុប្បន្នរីក​ចម្រើនដូចកាលទសវត្សរ៍៦០ និង៧០

លោក ហ៊ុយ យ៉ាឡេង ផលិតករភាពយន្ត អ្នកនិពន្ធ និងជាអ្នកសម្តែងល្បីឈ្មោះមួយរូប មានបំណងចង់​ឱ្យវិស័យភាពយន្តខ្មែររីកចម្រើនគ្រប់ទម្រង់ ដើម្បីទាក់ទាញមនុស្សគ្រប់វ័យឱ្យទស្សនា មិនថា តែមនុស្សចាស់ យុវវ័យ ឬកុមារឡើយ។

ថ្លែងប្រាប់អ្នកសារពត៌មាន នៅក្នុងសន្និសីទកាសែត ស្តីពី «គ្រោះជីវិតកូវីដ-១៩» នៅថ្ងៃ ១២ ខែឧសភា លោក ហ៊ុយ យ៉ាឡេង បានលើកឡើងថា «ខ្ញុំចង់ឱ្យភាពយន្តខ្មែរមានភាពរីកចម្រើនដូចទៅនិងភាពយន្តខ្មែរក្នុងទសវត្សរ៍ ៦០និង៧០ មិនថាតែ ប្រភេទរឿង ស្នេហា អភិនិហា ភ័យរន្ធត់ រឿងខ្មោច និងអប់រំក្នុងសង្គមឡើយ គឺអាចធ្វើឱ្យមនុស្សគ្រប់ វ័យទស្សនាបានទាំងអស់»។

អ្នកនិពន្ធរឿង ”ដើម្បីកូន“ ដែលបង្ហូរទឹកភ្នែកមហាជនគ្រប់ស្រទាប់វណ្ណ:រូបនេះ បានបញ្ចេញទស្សនថា ដើម្បីឱ្យភាពយន្តខ្មែរមានភាពរីកចម្រើនទៅបាន លុះត្រាតែមានការគាំទ្រពីប្រជាជនទូទៅ ទើបអ្នកនិពន្ធមានទឹកចិត្ត​ផលិតបន្តឱ្យកាន់តែមានគុណភាពស្តង់ដារ អាចប្រកួតប្រជែងជាមួយបណ្តា​ប្រទេសជិតខាងបាន។

គួរបញ្ជាក់ថា វិស័យភាពយន្តខ្មែរ មានការធ្លាក់ចុះយ៉ាងខ្លាំងនៅក្នុងរយ:ពេលជាងពីរឆ្នាំកន្លងមកនេះ ដោយសារតែ​ការឆ្លងរីករាលដាលនៃជំងឺ កូវីដ-១៩។ ក្នុងនោះ ផលិតករ និងអ្នកវិនិយោគនៅក្នុងវិស័យនេះ ភាគច្រើន បានផ្អាកការផលិតភាពយន្តរបស់ខ្លួន ដោយសារតែរោងកុនទាំងអស់ត្រូវបានបិទ ខណ:ស្នាដៃដែលផលិតហើយ ត្រូវបានផ្អាកជាបណ្តោះអាសន្ន៕ អត្ថបទ៖ នាង រតនៈ